a2.6 Jon 1.1, 5.18
b2.7 Isa 52.13–53.12; Mat 20.28
d2.15 Deu 32.5
f2.25 Flp 4.18

Philippians 2

Gol tǝtoṽ hǝn aYesu nǝlon tomǝdau, sǝnau gai

Datolǝŋon ivoi am len nǝlodato len nab̃onan mai aYesu, na-lǝmas-buni-an san etǝŋov nǝlodat vi pan, datukad nab̃onan len aNunun, nǝlon aYesu itaŋis gidato, ilolosa hǝn gidato. Husur natgalen p̃isi, mitimaskad nǝnauan tesua ŋai, mǝtelǝmas bun gabag hǝn gamito, mitikad nǝlomit tesua, mitikad nalǝŋonian tesua ŋai. Mǝtb̃igol natgalenan, dereh mitigol ginau nepul sǝsǝhov hǝn nakemkeman. Samtehusur nalǝŋonian samit sǝb̃omit ŋai, samtipatpat gamit sǝb̃omit mǝhat, avil len nǝlomit tomǝdau hum mǝttovi ut kǝmas, gamit ideh, tinau ideh am hum totibau sǝhor gai. Gamit ṽisusua satinau nǝsa tovoi hǝn gai sǝb̃on ŋai be tinau nǝsa tovoi hǝn nǝvanuan tile gail am. Mitimaskad nǝnauan top̃itoṽ hǝn nǝnauan aKristo aYesu tokade, ke:

Naut kǝmas tokad nab̃oruan siGot, naut kǝmas tovi aGot,
sǝnau ke tonor hǝn b̃etǝgau gat nap̃itp̃itoṽan mai aGot. a 
Be eriŋ gab̃ulan nǝhes toṽati mai nǝyalyalan san,
ilav nab̃oruan sinaslev sua, b 
egǝm vi vanuan sum̃an nǝvanuan gail,
ikad nǝnahǝnah hǝn nǝvanuan.
Igol nǝlon emǝdau, sǝnau gai gabag,
igol husur p̃is nǝsa aGot tokele,
naut kǝmas togol nǝmatan san.
Be savi nǝmatan ŋai, imat ebun len nǝhai balbal.
Imagenan aGot eputsani vi lan namilen toyalyal a mǝhat p̃isi,
eviol maii hǝn nǝhes toyalyal
sǝhor nǝhes p̃isi,
10 hǝn ke nahǝsan aYesu b̃igol natit p̃isi lǝb̃etǝŋedur,
len nǝmav mai len navile a pan mai len naut nǝmatan,
11 mai nabuŋolit p̃isi lisor vǝhoti ke,
aYesu Kristo evi Masta,
hǝn lǝb̃isal suh nǝyalyalan siGot Tata.
2.11 Hǝn naves 10–11, ris Isa 45.23

Mitigol nǝsa tonor hǝn nǝvanuan gail lǝb̃etǝtoṽ hǝni

12 Gamit notolǝmas bun gamit p̃isi, natgalen lǝb̃imaienan, len nǝlomito mitidaŋ len aGot, len namǝtahwan hǝn nǝyalyalan san, mǝtehisi hǝn mǝtb̃igol nǝsa tonor hǝn nǝmauran aGot tolav kuv gamit dan nǝsaan samito m̃osi. Mitigol natgalegai sum̃an mǝttogol akis hǝn nǝsa notokele, (savi nǝboŋ nototoh mai gamit ŋai, be nǝboŋ nǝsatoh). 13 Husur evi aGot toum len gamito. Igol nalǝŋonian samit inor hǝn esan mai igol mǝtolǝboi mǝtb̃igol husur nalǝŋonian enan san.

14 Len natit p̃isi mǝtb̃igole, mitigole, samtikoblen, samteṽitṽituh, 15 hǝn asike b̃ikad natideh tosa avan ideh tolǝboi b̃ikel husur gamito. Len nǝmauran samito mitiveveu ŋai, namesian teb̃uer, sum̃an anatun aGot gail, naut kǝmas navile a pan nǝmargobut mǝttotoh lan, topul hǝn nǝvanuan nǝlolit tokab̃kab̃ur, topul hǝn nǝsaan. d  Be gamit mitimasm̃ial hum nam̃ial lotom̃ial len margobut hǝn navile a pan, 16 nǝboŋ mǝttotǝgau gat nasoruan hǝn nǝmauran. Mǝtb̃imaienan, len nǝboŋ seKristo dereh nelǝboi nǝb̃isor sal suh ginau ke nǝsǝgam sob̃uer, nǝsaum sob̃uer.

17 Avil naut kǝmas leb̃igol nǝb̃imat, naut kǝmas nǝda hagw b̃isel hum nǝwain ahai tutumav tob̃iri len naviolan totutumav hǝni van hǝn aGot, nohǝhaṽur. Gamito, mǝtukad nadǝlomian len aKristo ale mǝtoviol kavkav hǝn gamito mai aGot hǝn mǝtb̃igol nǝsa tolǝŋoni. Ehum ahai tutumav toviol kavkav hǝn nab̃uluk totutumav hǝni van hǝn aGot. Husur ke notoviol kavkav hǝn ginau mai aGot ale gamit mǝttoviol kavkav hǝn gamito mai aGot, naut kǝmas lǝb̃igol nǝb̃imat, nukemkem, nub̃on mai gamit p̃isi len nahǝhaṽuran.
2.17 2Tim 4.6. Datolǝboi datb̃ikel namilen len nasoruan top̃itol maiegai: Nǝboŋ notokel ur na-kel-uri-an tovoi mai gamito, mǝtodǝlomi, ale mǝtoviol hǝn nǝmauran samito mai aGot hǝn mǝtb̃igol nǝsa gai tolǝŋoni. Imagenan, naut kǝmas lǝb̃igol nǝb̃imat sil na-kel-uri-an tovoi enan, nukemkem, nub̃on mai gamit p̃isi len nahǝhaṽuran.
18 Sum̃an ginau, gamit am mitimashǝhaṽur, b̃on mai ginau len nakemkeman.

ATimoti mai aEpafrotitus

19 B̃evi nalǝŋonian siNasub̃, nuvatvat viri ke asike dareh nesǝvat aTimoti van hǝn gamito. Ale nǝboŋ b̃etǝlmam nǝlogw tevi pan len nǝsa b̃ikel uri husur gamito. 20 Nǝsǝkad avan ideh sum̃an aTimoti tolǝmas bun gamito, tonau masuṽ hǝn gamito hum ginau. 21 Husur galit am lumasulsul hǝn natit salit gail sǝb̃olit ŋai, savi natit gail siYesu Kristo. 22 Gamit mǝtolǝboi aTimoti tia, nab̃oruan san tovoi, mai nauman san tovoi, husur eum mai ginau len nauman hǝn na-kel-uri-an tovoi hum tovi natǝtai toum mai atǝman. 23 Imaienan nuvatvat viri ke, nǝboŋ nǝb̃elǝboi nǝsa b̃evisi hǝn ginau, len nǝboŋ en ŋai dereh nesǝvat aTimoti van hǝn gamito. 24 Avil len Nasub̃ nodǝlomi ke, ginau gabag m̃au dereh nivan hǝn gamito.

25 AEpafrotitus evi ahai pispisul samito mǝttosǝvati hǝn b̃evi tarhǝt sagw. Evi wawa nadǝlomian sagw tob̃on mai ginau len nauman, tob̃on mai ginau len nǝb̃alan hum nasoltia. Be len nǝboŋ egai ginau m̃au nunau ke nǝb̃esǝvati van hǝn gamit bai. f  26 Husur elǝŋon masuṽ hǝn b̃eris gamito ale elǝŋon isa husur mǝttosǝsǝloŋ hǝni ke tomǝsah. 27 Nokitin ke emǝsah habat, pǝpadaŋ imat. Be nǝlon aGot itaŋisi, savi gai ŋai be nǝlon itaŋis ginau am hǝn asike nǝb̃ikad nalolosaan vǝsa batbat tomaienan. 28 Ŋa nǝnauan sagw idaŋ am hǝn nǝb̃esǝvati van hǝn gamito, hǝn ke, nǝboŋ mǝtb̃erisi, mitikemkem ale hǝn nǝlogw asike b̃etuhatuh maiegai am. 29 Nǝboŋ b̃ibar gamito, kel nahǝhaṽuran samit maii len nakemkeman hum awawa samit len Nasub̃. Nǝvanuan lotosum̃an gai, mǝteputsan galito len nǝnauan samito, 30 husur pǝpadaŋ imat m̃os nauman seKristo. Nǝmauran san pǝpadaŋ imasig hǝn b̃evi tarhǝt sagw, gel gamit mǝttodǝdas mǝtb̃igole.

Copyright information for `MASKELYNES