Hebrews 2

Te mothong tova te lel kimer nge a God Itun ile omaing ako i pamimi it.

Na Jisas i mukal nge enselre venen aken, mako aro te ta senu telnger nge riong ako nge a God Itun aken, aro vene mo ar perus nge. Naro i velpol venen aken, eneke God ile riong ako ile enselre o ri esu i a Moses nge, ini a God ile riong nunganga, na tokokoe alavusnga areko o nong sirik na o avsa riong aken, o el paomelaling i pavurvur nge ole omaing aken. Na aro ve God i oma venen aken nge ile riong teltelnga ako ile enselre o ri esu i, aro i oma vava nge it, tova ve te nong sirik nge ile riong sivenga ako aro te el mimiong sivenga nge, ako isivenga Itun i ri esu i a it nge, e? Na aro ve te nong sirik nge ile riong aken, aro te men kine nge ile paomelaling vava, e? Na riong sivenga aken kene Toko Pomnga a Jisas i ritet tel nge a mukaling, lamo areko o nongpol i a i nge, kene o ri esu mun i a it nge, na o pathengal it ako ve, ile riong aken i nunganga. Na God mun i pathengal it mun ako ve, Itun ile riong aken i nunganga selele nge ako i oma pathepolong na pakukukaling pulua, na nge ako i sung Ioni Riringa ile sungong a tokokoere nge, ranga ve ako i sis ve aro i oma i.

Jisas i mukal nge enselre, eneke ini tokokoere ole pamimionga.

Na ler menong panen anga ako tho ri nge ponange, kene God aro i pathealu enselre nge avele. Aveto ako a God ile erere epee omole, toko e ako i ritet ve,

“God, them tokokoere them ini ur le vanga
ako lomum i voth nge them, e?
Na them e tutumemre them ini ur polpolnga,
na i vava ako ong theal senu them, e?
Na wong oma them
naro them voth lelle inga atike a enselre osa thewo,
ave ong papomnga them
na ong paroro them
na ong ateal them
mo ur alavusnga ako ong pamenu or,
aro o voth a semem thewo.”
Buk Song 8:4-6

Na God ile riong aken i ri ve, ur alavusnga aro o voth a ser thewo, na aken i mirenga ve, God isa womo ol ur e ako aro i voth gat a ser thewo, kene avele. Aveto ponange te thepol ako i velpol venen aken a it nge rongan.
Aveto lemir mire nge toko omole ako i velpol venen aken a i nge lale, ini a Jisas ako God i paruru i a enselre nge, nge tovu po pom avele, mo aro i rin nge it alavusnga opoalnger, na aken God ile themosaling i pavelpol i. Na God i paruru i venen aken, aveto palolo avele, nako i papomnga i na i paroro i, eneke i rov sisisong aolonga nge rinong lale.

10 Na i vengveng ako God i oma venen aken nge a Jisas, eneke God ini ur alavusnga tepun, na i pamenu ur alavusnga aken mo ini ile, na i sis ve aro i wola itutun puluangare a Pen a Urvet la, na i sis mun ve aro Jisas i rov sisisong aken, mo i velpol ini toko mukalpoinga nge ur alavusnga, aken kene i thep sovengalo mo i mukalpoa ole a Pen a Urvet la. 11 Aken i nunganga, Jisas tomo nge areko i oma or mo o riri a God itheki, kene oa Vovo inga omole. Mako Jisas ile maral avele ako aro i apet or ve ini ititeinre. 12 Eneke i ria God ve,

“Aro tho ritet titeikre nge wong.
Na nge ako them pathun nge lotuong,
aro tho vo riseangom a voingre a or nge.”
Buk Song 22:22

13 Na i ria mun ve,

“Tho kene aro lemiko nge a God.”
Aisaia 8:17

Na i ria mun ve,

“Thepol!
Ake ini wainlanga areko God i sungu i a tho nge,
na them voth.”
Aisaia 8:18

Jisas i velpol ini toko neneanga mo aro i opoal it.

14 Na wainlanga areken ako God i sungu i a Jisas nge, or ini toko neneangare, mako Jisas i velpol mun ini toko neneanga ranga ve ini or, mo aro i rin mo i pakerenga rinong ile engenging a Satan imeni, 15 mo i pavthopot areko nomenga o ngeip evelelnga nge rinong na o voth a rinong a kinong lemi. 16 Na aken i pathengal it ako ve, ini enselre ako Jisas i opoal or, kene avele. Aveto ini inga a Abraham ititeviere ako i opoal or. 17 Na Jisas i sis ve aro i opoal or venen aken, na i sis ve aro i velpol ini ole mukalpoinga a God nge la, ako i pavurvur nge othemosalnga, na i pavurvur mun ako aro i oma senu a God ile omaing, ranga ve ini prisre oa pomnga. Na i sis mun ve aro i sung sungong a God nge, ako aro i patitepot tokokoere ole vothung kerenga. Na ilemi venen aken, mako sovengalo omole inga i voth ako aro i panes i, kene i vene: I velpol ini toko neneanga, ma i aterungalpot ranga ve ini it ititeinre. 18 Na nge aken i pavurvur ako aro i opoal it nge ako tongporumong i velpoltun it, eneke isivenga mun i el sisisong nge ako tongporumong i velpoltun i.

Copyright information for `MBH