1 Corinthians 11

Húmata Hwama Godi Oja Mahuri Vu'a

'Enajihuna'e na areri Kerisora venujakaji na vejujihuna'e ja 'u'o nara vejuja'ina'e ve'avara. Ja uneunecha mapoka vajijaho na vwihaniu jihuna'e na iviama ja ta'arorahu. 'Enakúne tamana ka'ene nara ja vajihujija ija kisina'e 'uninamiu. 'Enakaivo Na ura ike hehuna'e ura reniu. Kerisoho parua maho'o puni húmata 'ee napari jihuni húmata. 'Eju'e Godiho Keriso oni húmata. Parua irara huni húmata 'ahi unenu 'aho'a na'eje siporua 'o'ena ho poropeti epuni ira 'wara'amajaho huni húmatijihuni hura pavenu. 'Ene napara ka'ene huni húmata pavaha'ika'i siporua 'onuna ho poropetia puni iri 'waramujaho huni húmati jihuni hura pavenu. Ijihuni maijaho hu areri ea ka'ene huni húmata tihi'ini ja'ina. Napara irara huni húmata kaji pavahana'amajaho veje huni húmata sapasa kajaho usi'amana. 'Enakaivo napara kajara huni húmata 'uhu'ena ho usivakame juha'e re'amajaho veje huni húmata hwa'amana. 'Enajihuna'e paruijaho huni húmata isúa pahwa'amana. Ijihuni maijaho hu Godi vare'ina 'ee Huni temarijina. 'Enakaivo naparijaho paruijihuni temarijina. Ijihuna'e parua napara huni vaji rena rohuna pana kaivo naparijaho parua huni vaji rena roana. Ikaho nimaa. Paruijaho napari jihuna'e vehuna pana kaivo naparijaho parui jihuna'e venana. 10 Ona'oji'ina punijihuna'e napara hura harura hari hinuji najahareje huni húmata sipoa vahanahuna. Ijihuni maijaho huni paruijaho huni 'ajohi'ini jihuna'e vahanahuna. 11 'Enakaivo Natohwi jihuni vajijaho napari paruijaho maka'i huhusu 'ajoarahuna pana 'ee parui naparijaho maka'i huhusu 'ajoarahuna pana. 12 Ijihuna'e napara paruhuni vaji rena roaja'ina'e parua napapu nahenaura. 'Ene uneunecha maho'o Godina'i rena roara. 13 Ja ma ojono ijí mina vene kaha. Napari siporua 'o'iro ve'amajaho hu huni húmata pavahana'amajaho areri re'ena raka? 14 'Ene uneunecha ka'ene mwe'akino rejarakija ja najahu. 'Ene parua ka'ene húmata sapasa jojorijaho ijara hu veju'e jumuna. 15 'Enakaivo napara huni húmata sapasa ka'ene jojorijara reju'e hu teamamuna. Ijihuni maijaho ijí húmata sapasa kajara hu veju'e marana parane 'ee nuhahuna'e mahana. 16 'Enakaivo ea irara hu ijihuna'e ura'e chicha ve'i ve'amajaho nú 'unama 'aho'a 'ararihihuna pa'ana. 'Ene Godoni sosijara 'unama 'aho'a 'ararihihuna pana.

Natohwiji Vwihaji'i Ihuni 'Irumijina

(Matiu 26:26-29; Maka 14:22-25; Ruku 22:14-20)

17 'Enakaivo na vu'a ike 'waravukaho na ja aromahare 'warahuna pana. Ijihuni maijaho ja roe ahuvujaho mara'amarono ahuhuna pana kaivo niho'o siserana parahuna ahuvu. 18 Amurijaho vea ka'ene ja sosi roe ahuvujaho na hejujaho joni vajakaho ahaame hiju. 'Eju'e na ijaho nimaa roju. 19 Joni vaja kajaho ahaavakame nú iji'a ja ea irahipo aririjaho roe samaa'e reje kihuna. 20 Ijihuni hahi ja vea ka'ene roa ahu'avajaho ja Natohwi jihuni puretia 'ee toa i'irono roe ahuhuna pana. 21 Na hejujaho ja ea 'aho'a ea pa'aji'i kaivo jajasu maraku'a ijura. 'Enajihuna'e jara ijuri vajijaho ea 'aho'a matuna'eju'e ja ea 'aho'a niho'o nanamiu. 22 Irake? 'Ú ja sea 'iruma toa ihuna pa'ana raka? 'Ene ja Godoni sosia senavu raka? 'Ene ea ka'ene uneunecha pa'ajihi juna'avarono avajo. 'Ú na ja ija'ina'e 'warahune? 'Ú na ja ta'arorahune? Ikehunijaho na ja pata'arorahuna. 23 Ijihuni maijaho na Natohwi jihuni apejuji na ja 'u'o 'waravu. Ijí na'ia kajino nahama'avarono Hu puretia apenana. 24 'Ene Hu teimani 'wavume parajume Hu tuachavi'i ijá 'iama Ikaho Nuni haha ka'ene jonijihuna'e mihujina. 'Enakúne ika'ina'e veji'i Na vwihani'avara. 25 Ni 'unama nikwinu'ina kajino kapusia 'u'o apeji'i ijá 'iama Ike kapusia toa ikaho 'unama maiu'ina ka'ene Nuni 'aa vaji nimaa vejujinakúne ike vene iji'i na'ia mapoka'e Na vwihani'avara. 26 Vea irakijino ike puretia ike ine 'ee kapusi toa 'eke i'avajaho ja Natohwijara kwamaji 'wame nasaravi'i inava'e Hura ro'amaji 'e'u'avara. 27 'Enajihuna'e ea irara Natohwi jihuni pureti 'ee kapusiji 'unama areri parehuni jihuniji i'amajaho hu Natohwi jihuni haha 'ee 'aa ijihuna'i sisea vehuna. 28 'Enakaivo ea irara puretia 'ee kapusia toa i'irono ve'amajaho marako veje ori piuha'aramareje iji'a i'amana. 29 'Enajihuna'e ea irara huni haha papiuha'ara'ika'i puretia 'ee kapusia toa inujaho hu eha sisea apene huni haha 'ahi rou. Ijihuni maijaho hu Natohwi jihuni hahijaho hami pavwihaji'i majikari inujihuna'e ara'ena. 30 Ikehuni hahi ea mapoka joni vajakaho haha ajuaranie 'ee atami 'unirame 'ee ea 'aho'a kwamasahu. 31 'Enakaivo nú onúno hami piuha'ara'avajaho nú panamúhuna. 32 'Enakaivo vea ka'ene nú namuhujaho Natohwijara núra vu'ataa he'avarono najuhe avanu. 'E'ira'omo ike mwe'a ikihi pu'úmo paahume namuhuna. 33 'Enakúne vwehu nune ja ahuma roe i'i ve'avajaho hami 'aja'ara'avara. 34 'Enakaivo ea irara matu'amajaho hu huni sei 'iruma ina ro'amana. 'E'irakúne ja paroe 'otua hara ahuma aru'avara. 'Enakaivo vu'a 'aho'ijaho nara vea ka'ene vu'ujino ichá'ina'e vehunijaho 'warahuna.

Copyright information for `MCQ