1 Corinthians 14

Godoni 'Aveni Jihuni Swara 'Aho'a U'una

Oja mihuni 'unamijaho 'ararihaha kaivo veje 'Avena Huni swariji 'ekahunijara ura rena'amana kaivo swara ka'ene poropeti puni iri 'waravuji niho'o ura rena para'amana. Ijihuna'e ei pini ira ani'ini 'waramujaho hu emaa'e 'warahuna pana kaivo Godi 'waramuna. Ijihuni maijaho ea pahejura kaivo hu hemiji huni 'avena vaji 'waramuna. 'Enakaivo ea ka'ene poropetia puni iri 'waramujaho hu emaapo emare'asa'avarono 'warame 'ee ni'ajihe 'warame 'ee oja sonahi'amarono 'waramuna. Ea pini hu ira ani'ini 'waramujaho hu huhusu ni'ajaramuna. 'Enakaivo ea ka'ene poropetia puni iri 'waramujaho sosia ni'ajahu'e emarena 'urinuna. Na ura ja ea maho'o ira ani ani'ina 'wahuna ura reniu kaivo na natohwa ka'ene ura reniujaho jara poropetia puni iri 'warahunijara ura renia paranu. 'Enajihuna'e ea ka'ene poropetia puni iri 'waramujara ea ka'ene ira ani ani 'waramujaho asimana. 'Enakaivo hu ijí ira kaji ta'arohe 'wara'amaji'a sosia pirave emarehuna. 'Eje iji'a pu no'o areri rehuna. 'Enakaivo vwehu nune na iviamaa roe ira ani ani'ini 'wara'ujaho na ichá'ina ja ni'aji'ejo? Na areri 'unama ka'ene veje samaumaa re'eje 'wara'ujiana 'ee henaka vajijino 'wara'ujiana 'ee poropetia puni iri 'warame naja'ujiana 'ee naja'uji'a ijara samaa'e rehuna. 'Enajihuna'e uneunecha ka'ene mai'o paheji'ina ka'ene areri hurisia ho kita puni ira anuka ka'ene pura savujipo ira areri pa'umejujaho ivi'a ichá'ina'e ijí hurisia ho kita 'aha kajino javaa ira anuka raka ka'ene savujaho he'eja? 'Ene tauja ira hami pa'ume'amajaho hu ichá'ina'e ajira vehuna amairiara'ena? 'Enajihuna'e ja 'u'o ira anuka ka'ene jara 'wavujara paroe samaa'e re'amajaho ivi'a jara raka ka'ene 'wavujaho ichá'ina'e he'eja? Ijihuni maijaho a iruhoa maiji ichutoa kajino nisame avanu. 10 'Ene ira ani ani'ina mapoka mwe'a ikaho navu. 'Ene ira mapoka kajija maa rukina. 11 'Enajihuna'e na ira kajaho pahe'ujaho na ea ka'ene ijí ira kaji 'waramu jihuni una'ijaho ea suja reje 'ee ea ka'ene 'waramajaho nuni una'ijaho 'u'o ea suja'e rehuna. 12 'Enajihuna'e ja 'u'o 'Avena huni swara ura rena paraniu jihuna'e ni'ima'urijaho sosia ni'ajahe emarena 'urihuniji same ura rena'ava. 13 'Enajihuna'e ea ka'ene ijí ira ani'ina 'waramujaho siporua 'ojakame hu areri ijihuni maijaho ta'arohe 'wara'amana. 14 Ijihuna'e na ira ani'ini siporua 'o'ujaho nuni 'avenijara siporua 'onuna kaivo nuni vwiha ijaho maa pa'ana. 15 'Enajihuna'e ijihuni maijaho irake? Na nuni ojiji'i siporua 'one 'ee na nuni vwiha iji'i siporua 'ohuna. 'Ene na nuni ojiji'i javaa vene 'ee na nuni vwiha iji'i javaa vehuna. 16 Ja hine 'avena vajaru ta'aro'avajaho vu ichá'ina'e ea ka'ene swara ija'ina pa'ana ka'ene roe ruha apene hi'amajaho avame Ameni 'wa'ena? Ara siporua ka'ene 'one teimani 'wamujaho ijihuni maijaho hu ara iraka ka'ene rone 'waramujaho pahenuna. 17 A teimani 'wamujaho niarerina kaivo vu ea pinijaho ijaho paveju'e emarenuna. 18 Na Godi teimani 'wavujaho nara ira ani ani 'waravujara ja maho'o asita ranamana. 19 'Enakaivo na ura ira oma iropu heji'i ea ni'ajihe 'warahuna'e ura reniu kaivo vu iji'a ira mapoka mapoka (10,000) ira pahehunijino 'warahunijaho ura pareniu. 20 Vwehu nune sesamaa puna'i pavwiha'avara. Musiapo sisea pavwihaju ja'ina'e vwiha'avara. 'Enakaivo joni vwiha ijija emakinepo vwihaju ja'ina'e vwiha'avara. 21 Varapa vaji Natohwijara ika'ina'e 'waravume vejara.

Ira ani'ina 'ee ea ani'ina puni vaji Na emaa vu'a 'warahuna. 'Enakaivo ijí 'u'o pu Nuni ira pahehuna 'iamana.
22 'Ena'omo ira ani ani'inijaho ea ka'ene Godi nimaa roji'ini jihipuni aacha pana kaivo ea ka'ene panimaa roji'ini jihipuni aacha. 'Enakaivo poropeti epuni iri 'waravujaho panimaa roji'ina puni aacha pana kaivo nimaa roji'ina puni aacha. 23 'Enajihuna'e sosia kajipo roe ahuma hine ea maho'o ira ani ani 'wa'eje ijihuni swara paapejajipuna ho ea ka'ene mai'o panimaa roji'inijipo ijí va'e aru'ipisa pu vwiha'avajaho ea ikija húmata siseraniu'e nanamiu roja'a. 24 'Enakaivo ja ea maho'o poropeti epuni iri 'wara'eje panimaa roji'ina ho ea swara ija'ina pa'ajara roe aru'amajaho ijí ea maho'o pura 'waravu kajara huni vwiha jarae 'ee ijara hu sisea veji'inijaho namahuna. 25 'Ene hema ka'ene huni oja vaji navujija veje roe samaahiravakame hu aruha arihe Godi oja mahi'i ijá 'iava'e Godiho nimai joni vaji hinu 'iahuna.

Sosi Vwiha Vajahani Vu'a

26 'Ena'omo vwehu nune ichá'ina ve'eja? Vea ka'ene ja roe ahu'avajaho ea kwinu kwino javaa veje 'ee ea pina najahe 'ee ea pina vu'a hema nahume hununa'a samaumaa'e renaji najahe 'ee ea pina ira ani'ini 'warave 'ee ea pina ijí ta'arohuna kaivo veje uneunecha maho'o ea ni'ajihe emarene 'urihunijiru re'amana. 27 'Ene ea pini ira ani'ini 'wahuna'e re'amajaho veje ea no'ona ho no'opisu 'wara'avara kaivo ei pini 'warame arevakavi'i iji'a ea pina 'wara'amana. 'Eje vu ei pini ijaho ta'arohe ijihuni maijaho 'wara'amana. 28 'Enakaivo ea pina ijí ta'arohe 'warahuna pa'ana'e re'amajaho veje sosia vaja ira pa'arene hi'amana. 'Ene veje hu huhusu no'o Godi 'wa'avara. 29 'Ene veje poropetia no'ona ho no'opisu 'wara'eje vu ea 'aho'ijaho hine 'eke manura vena ki'avara. 30 'Enakaivo ea pina ka'ene asuma hinuji vu'a hema hu mahe hununa'a samaumaa reje hu 'wara'i ve'amajaho ea ka'ene amura'e 'waramujaho ira pa'arehuna. 31 Ijihuni maijaho ja ea 'oi'oi poropeti puni ira 'wara'eje ea maho'o ijija henakame 'ee ijipo ni'ajihava. 32 Ea ka'ene poropeti puni iri 'waravujija puni ojijija puni harura hari navura'omo opo 'ajo'aravi'i 'warahuna. 33 Ijihuni maijaho Godiho ura arini veji'ina 'ee matauvi'ina. Ijihuna'e sosia ka'ene akuavi'ina puni vaja kajaho maho'o pamajikari vejura. 34 Pu napara sosia vaja ira pa'warahuna 'warava jihuna'e ira parasahe hi'avara. 'Enakaivo veje pu areri varapijara 'warama jihuni hari hi'avara. 35 'Ene pu unenu'u pina hena kahuna'e ura rena'amajaho pura sosia vaji vua'e 'warahuna areri pa'ajihuna'e va'e paruhwaha'e puni sea vaji aporave 'warave he'avara. 36 'Ene 'ú joni vaji Godoni irijaho aneja venane? 'Ene 'ú jonaru roane? 37 'Enajihuna'e ei pini vwihaje hu poropetia ho hu 'Avena vaji emarenana'e vwiha'amajaho veje ike uneunecha ka'ene na jona'e vejukija Natohwijara 'waramana'e vejukaho ki'avara. 38 'Enakaivo ea irara ikihi hena pavenujaho ijí ea kajara vu'a 'waramajaho ea hu pahenahuna. 39 'Enajihuna'e vwehu nune nimaa'e poropetia puni iri 'warahunijaho ura rena'e para'avara 'ee ja paki'eje ira ani ani 'waravuji tanuvu ro'ava. 40 'Enakaivo veje uneunecha maho'o 'unama nimaa nimaijino hami vene 'ee ura arini rene ve'avara.

Copyright information for `MCQ