1 John 2

Kerisoho Núni Ni'ajúhi'ina

Sesahu nune ikaho na jona'e vejujihuni maijaho ja sisea pave'avarono veju. 'Enakaivo ea sisea venujaho Ea pina núnijihuna'e Amoni una'i jarima 'waramuna. Hu Jesu Keriso ka'ene arira maijina. Jesura núni sisei jihuni eha apenana. 'Enakaivo núni siseijiru pana vo ea maho'o mwe'akino hiju jihipuna 'u'o apenana. Nú Huni tamana hene vejujihuna'e nú niheju nú Hu hena kavi'ina. Ea pini Na Hu nihejura 'i'i kaivo Huni tamana pavenujaho hu ira'ata apenu. 'Eju'ukamare'e nimaijaho huni oja vaja panamu. 'Enakaivo ea irara Huni ira hene venujaho huni vajijaho nimaa nimaa'e Godi oni oja mihujaho areri rena paranu. Ijihuna'e nú niheju nú Huni vaji hiju. Ea irara Huni vaji hinu 'iamujaho hu Hura 'urahe onaja'ina'e ohuna.

Oja Mwe'a Pamahunijina

Ehu nuna ka'ene na ja oja mihi'inakije ike tamanakaho maiu'ina na paveju kaivo tamana sahasa ka'ene nitama jara apejajina. Tamana sahasijaho Ira ka'ene ja nihejajina. 'Enakaivo na tamana maiu'ina jona'e veju. Tamanakaho Huni vaja nimaa reju'e 'ee joni vaja 'u'o nimaa renu. Ijihuni maijaho nututijaho pa'arene va'eju'e Ira nimaijaho ivi'a hanamana. Hu ea pini ijá 'imujaho Na hanaji'ini hiju 'i'i kaivo vweaha semujaho hu nutuvi'ina vaji hina roe iviamaa 'e'unu. 10 Ea irara huni vwea oja mahujaho hu hanaji'ini hinu. Ijihuna'e hu paveje vweaha amaaresume 'ohuna. 11 'Enakaivo ea irara vweaha kama semujaho hu nutuvi'ini hine 'ee nututi 'urahe onu. 'Eju'e hu ichá ruvahuna puruva renu. Ijihuni maijaho nututa kajara nia supatiana. 12 Sesamae ikaho na jona'e vejujihuni maijaho joni siseijaho Huni Ihijihuna'e Hu vwihana aremana. 13 Emahu núne ikaho na jona'e vejujihuni maijaho ja Hu niheju. Hu nitamatama anejijaho ijí hinana. Kivase ikaho na jona'e vejujihuni maijaho ja 'avena siseuni 'unama arevara. Sesamae ikaho na jona'e vejuta. Ijihuni maijaho ja Amo nihejura. 14 Emahu nune ikaho na jona'e vejujihuni maijaho ja Hu nihejura. Hu nitamatama anejijaho ijí hinana. Kivase ikaho na jona'e vejujihuni maijaho ja niho'o harura rukine 'ee Godoni ira joni oja vaji namujihuna'e 'avena siseuni 'unama arevara. 15 Ja niho'o mwe'a kakaho oja pamahe 'ee uneunecha ka'ene mwe'i navuji 'u'o oja pami'avara. 'Enakaivo ea irara mwe'akake oja mahujaho Amo oni oja mihi'inijaho huni vaja panamu. 16 'Enakaivo sisea ka'ene iki mwe'i navujija ikena. Haha huni ituana 'ee nii kime ituanavura 'ee jarika'e rejujaho Amoni rena rohuna pana. Ijija mwe'a ikehuna. 17 Mwe'akaho uneunecha mapoka 'ee huni ituaniji'i pa'arena vai'i navu kaivo ea ka'ene Godira ura renuja'ina'e vejujijahija majama hihuna.

Majama Hihunijaho Nahama 'Waramajina

18 Sesahu nune ja niheja ja'ina'e vea túchamaa ijina'omo Keriso oni nana'eji'ina rou. 'Ene iviamaa 'u'o Keriso oni nana'eji'ina mapoka urimaravara. 'Eju'e nú ijí hena kavujaho ijaho vea túchamaijina. 19 Pu nú irechamú'i kaivo va'ajihuni maijaho pu núni pwina pana. Pu núni pwina re'ipisa pu nú pu'úmo hija'a. Vea ka'ene pu nú irechamúa va'ajara najuhujaho pu núni pwina pana. 20 'Enakaivo Godira Huni 'Avena joni oja vaji samaha jihuna'e ja ea maho'o nimaa hena kavi'ina'e rejara. 21 Ja paheji'ina pana kaivo ja nimaa nimaa heji'ina ijihunihahi na jona'e veju. 'Enakaivo ijí nimaa nimaijaho ira'ata pana. Ijaho ja niheju. 22 Ira'asina irane? Ea ka'ene Jesu Kerisoho pana 'iamujina. Ijaho Keriso oni nana'eji'ina. Ea ka'ene Amo'o Hariahe'o pataarorahujina. 23 Ea irara Hariha pataarohujaho hu Omaha 'u'o pataaroha avanu. 'Enakaivo ea irara Hariha nimaa ronujaho hu Omaha 'u'o nimaa ronu. 24 Vu'a ka'ene nitama aneja'e hejajaho ranave joni oja vaji na'amana. Ijí nitama ja hejajara joni oja vaji na'avajaho ja na'ia mapoka Amoho 'ee Huni Hariha pu'úmo hami hami hinapena vahuna. 25 Ikaho Hura iraka ka'ene mú'irono nahama 'warumajina majama hihuna. 26 Erapo jaa'e pisiviu jihuna'e ikaho na jona'e veju. 27 Huni 'Avena joni oja vaji samahume ja apejara. 'Enajihuna'e ijí 'Avena kajara joni oja vaji hinajihuna'e ei pini ja najahuna areri pana. Hura samaha kajara uneunecha maho'o najahuna. Ijí uneka ka'ene Hura najahujaho nimaa nimaa kaivo ira'ata pana. Hura ja najaha kaja'ina'e Huni vaji hiha. 28 Sesahu nune iviamaa Jesu pu'úmo hami hami hi'avara. 'E'irakúne vea ka'ene Hu kú'o ro'amajaho nimaa nimaa nú paju'i kaivo matauma Huni una'i namihuna. 29 Ja nimaa heju Hu arira maijihuna'e ea irahipo nimaa nimaa vejujaho pu 'Avena vaji nahenaara.

Copyright information for `MCQ