1 Thessalonians 1

Vu'a Anejijihina

Nú Poru ho Sivenasi ho Timoti ho ijano sosia ka'ene Tesaronia Godi Amoho 'ee Natohwa Jesu Keriso puni vaji hiju jihipuna'e pasikaho veju. 'Ene maiji vwihaniujine 'ee matauvi'inijaho jona.

Tesaronia Puni Nimairoa 'Ee Ichá'ina Hijuji Teimani 'Wavajina

Nú jonijihuna'e Godi teimani 'wavura. 'Ene nú na'ia mapoka siporua 'ojuri veijaho nú joni iha 'urihi'i 'ojura. Na'ia mapoka'e jara nimaa rohuni kaukara ijí vene 'ee ea oja mihe 'ee nimairoa ka'ene núni Natohwa Jesu Keriso oni vaja 'ee núni Godi 'ee Omijihuni una'i ija kisina 'unama hijuji vwihaniura. Vwehu núne Godi ja oja mihe 'ee Hura ja iji pijihajaho hena ka'avara. 'Enajihuna'e vu'a maa maiu'ina ka'ene nú apena roajaho iraru pa'waravara kaivo harura 'ee Godoni 'Avena vaji roe raka ka'ene núra 'waravajaho nimaa hene ja nimaa rojara. 'Ene nú jonijihuna'e ichá'ina ka'ene hijajaho ja nikúvara. Ja 'u'o núra vejuja'ina'e vene 'ee Natohwijara venaja'ina'e vejara. Uneunecha sisea ani ani rejara vo ja Godi oni 'Avena vajijino teamana'eme ira ikaho apejara. 'Enajihuna'e ja 'unama maa ka'ene veju kaji Masatonia 'ee Akaia ora ka'ene nimaa roji'inaka hijujihija 'unama kaji najahara. 'Ena'omo iviamaa Natohwi jihuni vu'ijaho joni rene rausahe va'e Masatonia 'ee Akaiaru pava'ara vo kwaaka mapokaki va'ana. Jara Godi nimaa nimaa rojujaho pu nihe parajara. Ijihunihahi nú pu areri unenu 'aho'a pa'warahuna. Pu opuipo núra ja ki'i roume jara 'unama ichá'ina ka'ene 'ekuajaho 'waruvara. 'Enareja jara godia ira'ata ka'ene iji vejuji nimaa rojujaho are'i kaivo ta'arohe Godi nimaa ka'ene majama hiji'iniji oja mahujaho 'waruvara. 10 'Enajihuna'e ja iviamaa Huni harihijara kú'o akúpa 'ahi rena rohuniji 'ajaha hiju. Jesu ka'ene Hura vejume kú'o 'urinajara sena ka'ene roajaho vahanumana.

Copyright information for `MCQ