1 Timothy 1

Vu'a Anejijihina

Na Poru Jesu Keriso oni apasorua 'ee Godi ka'ene núni Ni'ajúhi'ina 'ee Jesu Keriso ka'ene núra nimaa rojujara 'warivume rejuta. Timoti a nimaa ronujihuna'e a nuni hariha renana. 'Ena'omo Godi Amo'o Jesu Keriso ka'ene núni Natohwiji'o a maiji vwihanae 'ee numirame 'ee matauvi'iniji 'waramare'e veju.

Siseisei Najahi'inijihi Puni Jujuvu'ijina

Na Masatoniai va'irono a Epasasi hi'amarono 'ejahae 'waravu jihuni maijaho ea ka'ene vu'a ani'ina vajahuji tanu'urihe arehuna'e 'waravuta. 'Enakúne 'waravakame mamiha sisea 'ee amuja nirisaravujaho areva. Ijihuni maijaho ijipo veju'e nakaravi'i hijura. 'Ene ijipo venau'e Godoni kaukara ka'ene nimaaroijaho pani'ajahu'e emarenuna. Nara vu'a ka'ene najahu jihuni maijaho oja 'unama mamaijino 'ekarame 'ee hami vwihane 'ee hami nimaa ro'avara. Pu ea 'aho'a 'unama ikehunakija are'ika'i vu'a ka'ene maa pa'ajihija'e 'wamojura. Pu tamana najahuri tisa ura renau kaivo pu pahena pakavi'ina kaivo vu pura 'wara'avajaho niho'o he paraji'inapo 'waravu ja'ina rehuna. Nú nihena kavu. Ea irara Tamana kaji hene venujaho tamana kajaho mamaa. Nú ja pu'úmo nihena kavu. Tamanijaho nimaa'e ea ka'ene ariri jihipuna'e vehuna pana. 'Enakaivo ea ka'ene varapa tuvi'ina ka'ene vuataa paheji'ina 'ee Godi paheji'ina 'ee sisea veji'ina 'ee paakuavi'i majikari hiji'ina 'ee 'unama aririjihi 'ijahi'ina 'ee opwaha 'ee ohwaha 'aniu'e tirahi'ina 'ee ea 'aniu'e tirahura. 10 'Ene parua ka'ene 'uasa veji'ina 'ee parupo parua hurichavi'ina 'ee napapo napara hurichavi'ina 'ee monihuna'e ea nesi 'eki'ina 'ee ira'asina 'ee ira'atijino ea hemahe 'waravi'ina 'ee uneunecha 'unama aririjaho panajahu jihipuna'e Tamanakaho vejara. 11 'Ene Godi ka'ene merajúhi'inijara vu'a mavarasa'ina ikaho nara naja'urono mihana.

Godira Manumirumaji Teimani 'Wa'avara

12 Na Jesu Keriso ka'ene núni Natohwiji teimani 'wavujaho Hu na harura mihana. Ijihuni maijaho Hu na uchaha pa'ana'e kimarena Huni kaukara'e ve'urono iji pijihana. 13 Na nimarako ijaho 'unamakaho matihe 'ee ea sisei 'ahie 'ee ea sise'i ruarahuta. 'Enakaivo Hu ijihuni vaji na numirimana. Ijihuni maijaho na panimaa rojujihuna'e na pahene pakavi'i avajuta. 14 'Enakaivo núni Natohwi jihuni maiji vwihani'inijaho 'ee nimaa roijaho 'ee oja 'ekarahunijaho Jesu Keriso oni vaji ni'ima'ura rena paranana. 15 Ikaho vu'a nimaa ka'ene nú ea maho'o apehunijina. Jesu Kerisora iki mwe'i roajaho ea sisea veji'ina'e ni'aji'i roana. 'Ena'omo ijihipuni vajijaho sisea ka'ene sisee maijaho nana. 16 Ikehuni hahi na numirivakame nuni vaji ea 'aho'a ka'ene niho'o sisee maijija Jesu Keriso oni masuani ajuarane 'ajiha hinujaho ea ka'ene Hu nimaa rone majama hihuna'e apehunijihi naja'i 'ahaume avanana. 17 Hu iviamaa Kinia ka'ene majama hiji'inijina 'ee pakwavi'inijina 'ee haha pakavi'inijina 'ee Hu Godi nikwinuna 'ee Huni hura venahura 'ee pinanijaho aneja púsa pa'ana'e Huna. Ameni. 18 Ike vu'akaho nuni hariha Timoti na a 'waravu. Nitama poropetiepo a rone 'warava ja'ina'e puni vaji mamaa ijihuna'e 'arasara'amana. 19 'Ene oni nimaaroijaho vwiha hami vwihaji'i 'ajo'amana. Ijihuna'e ea 'aho'a puni nimairoa pata'aroha jihuna'e pu sisima epuna'i tira'usahara. 20 'Ene puni vaja kajino na Haimaneasi'o Arekisanita'o Setani vajahuta. 'Ejakame ijara najahe pu Godi matahujaho arehuna.

Copyright information for `MCQ