2 Corinthians 6

Pura Kaukara Mamaa Ka'ene Vejuji Rone Ta'arohe 'Waravajina

Nú Godi pu'úmo ahuma kaukara vejujihuna'e nú jarirame 'waravujaho ja paki'eje Godira maiji vwihaniajaho majikari apene tau'avara. Ijihuna'e Hu ijá 'waramana

Vea nimaa nimaijino Na oni vu'a ataa apúsavura. 'Ene maraniani veijino Na ni'ajahuta 'wamana.
Heha! Iviamaakaho vea ka'ene nimaa nimaijina. 'Ene iviamaakaho maranahuni veijina 'iamana.
'Ene núra unenu'u pina veje ijara ahija rena nave emaapo kaukara ka'ene núra vejuke namuhuna na ura pareniu. 'Enakaivo uneunecha mapoka nú vejujara ea najahujaho nú areri Godoni kaukara pwea. 'Ene vene kirasahura 'ee varapa vaja 'ee vea kisina vaja 'ee haha hiana vaja 'ee nú hijúhura vaja 'ee tipurai irechamúari vaja 'ee 'uraara vaja 'ee kaukara kisina vejara vaja 'ee nia panotuara vaja 'ee matuna vaji hijara. 'Ene ariramaaru vejara vaja hinaka vaja masuani ajuarasahe hijuri vaja 'ee mamaa'e vene ni'aja'aravura vaja 'ee Godoni 'Aveni jihuni vaja 'ee oja nimaiji mihuri vaji hijara. 'Ene ira nimaa vaja 'ee Godoni harura vaja 'ee kukua arimaijino mana'inija'i 'anihuna'e apene 'ee ana'inija'i tanuhuna apejara. 'Ene ta'aroruhe hura pavenuhura 'ee sisea ronuhe 'wavura 'ee mamaa ronuhe 'wavura 'ee pisimisavi'ina 'wavura vo nú majano nimaa veji'ina. 'Ene areri pahena kúhune sa'ina kaivo hena kúvara 'ee areri kwamasahune sa'ina kaivo nú mai'o hiju. 'Ene sise'i 'ahúara vo pa'anúume kwamasahara. 10 'Ene areri temuki rarenuhuna vo majamano temarasahura. 'Ene uneunecha pa'ana vo nú venau'e ea mapoka puni hia areri renaura. 'Ene nú pa'ana vo nú uneunecha maho'o rukima'ura. 11 'Ene nú ira núnakino samai matauma 'waravara. Oo Korinitinie núni oja vajakaho niho'o jaraa navu. 12 Núra ja oja mihuji tanuhuna pana kaivo jara ojono núnuna'a tanuvu. 13 'Ene nú sesamaa puna'i 'waravu jihuna'e ja 'u'o núnuna'a joni oja jaraa'avara.

Panimai Roji'inijihipuni Jujuvu'a 'Waramajina

14 'Ene panimaa roji'inijihi pu'úmo paahu'avara. Icháina'e arira maiji'o siseiji'o roe ahume napura ve'eja? 'Ene ichá'ina'e hanaji'iniji'o nutuvi'iniji'o ahu'eja? 15 'Ú 'unama irakijino Keriso'o Piriari'o nimaa veti'ara'eja 'ee vu 'unama irakijino ea ka'ene nimaa roji'iniji'o panimaa roji'iniji'o nikwinu'wi re'eje? 16 'Ene ichá'ina'e Godoni Temiporu iji'o godi ira'atiji'o roe nimaa veti'ara'eja? Ijihuni maijaho nú Godi ka'ene mai'o hiji'ini jihuni Temiporua. Godira nú ijá 'warumana

Na puni vaji hine 'ee puni vaji 'urahe ohuna. 'Ene Na puni Godia'e reje 'ee pu Nuni ea rehuna 'úmana.
17 'Enajihuna'e Natohwijara ijá 'iama Puni vaja kajaho are'i kaivo usema roe ea ani'ina'e reha. 'Ene uneunecha ka'ene chiha rukinijaho ija pa'uniraha. 'Eje Na 'ajorame aherahuna. 18 'Eje Na joni Oma reje 'ee ja Nuni harihija 'apahija rehuna. Natohwa ni'ima'urijara ija'ina 'waramana 'iamana.
Copyright information for `MCQ