2 Thessalonians 3

Núni Siporu 'Onu'avara

Vwehu núne túchamaijaho núni siporua 'ojakame Natohwi jihuni vu'akaho mamako rausahakame joni vaji pinana mamaa ka'ene 'urina ja'ina'e ea kajihipuni vaja 'u'o pinana 'uri'amana. 'Ejakame ea ka'ene vuataa pahene 'ee ea sisea ijihipuni vajijaho 'ajohu'amana. Ijihuni maijaho nú ea 'aho'a mai'o panimaa roji'ina. 'Enakaivo Natohwijaho pauchavi'ini jihuna'e Hu ja harura mihe 'ee sisea veji'ini jihipuna'ijaho 'ajoahuna. Jara raka ka'ene venape vahuna ka'ene núra 'waravajaho nú Natohwijihuni vaji nimaa vetiu. Natohwijara joni oja 'ajohe 'eka'e Godoni oja 'ekaravuri vajijino irechamie 'ee Keriso oni vaji kirasahe namihuniji irechamiama.

Kaukara Ka'ene Mahaji Teamana'eje Vehuna

Vwehu núne nú ja Natohwa Jesu Keriso oni ihi 'urahi'i 'waravu. Ea ka'ene núra najahu ja'ina'e pahi'ika'i maiji ucha'asahe hiju jihipuni rora paruva'avara. Ja ojo nihena kavu. 'Enakúne núra vejuja'ina'e niho'o ve'avara. Ijihuni maijaho jara nú kú'eje nú joni vaji karokaha vehuna niho'o pana. Nú joni 'iruma majikari pa'ekara kaivo nú 'imejara. Nú 'iruma 'imehuni jihuna'e na'ia veiri'a harura vene kaukara vejura. Ijihuni maijaho ijara veje joni una'i ahija rehuna nú senumana. Nú jona'e venahu jihuna'e nú ja jarirave ja núni 'iruma venu'ipisa areri reja'a kaivo ja ija'ina venareje joni 'iruma 'ekahuni 'unamiji naja'iro 'ahiu. 10 Nú ja pu'úmo hijari veijino nú ja ni'waravara. Ea irara kaukara pave'ika'i mahi'amajaho 'iruma pai'amana. 11 Nú heju'e ja ea 'aho'a karokaha vene kaukara pave'i ucha'asahe mahine earu ronahura. 12 Núni Natohwa ka'ene Jesu Keriso oni vaji nú jarirame 'waravukúne ea ija'inijija 'warave masuani sonasahe hine puni 'iruma ihuna kaukara opu ve'avara. 13 'Enakaivo vwehu núne ja 'unama mamaa vehunijaho pasena'avara. 14 Ike pasia vajakino raka ka'ene núra 'waravaji ea pini hena pave'amajaho ja hu hami kavi'i pu pu'úmo paahuvakame hu niho'o juma para'amana. 15 Ja hu naka'e 'ahauja'ina paaha'avara kaivo vweuna 'waramu ja'ina'e ira kisina 'warave he'amana.

Vu'a Túchamaijina

16 Natohwa ka'ene matauvi'inijara Huni matauvi'iniji na'ia mapoka 'unama ani ani ja vejujihuniji matauhuna mihu. 'Ene Natohwijaho ja pu'úmo hinu. 17 Na Porura iviamaa 'ajora'i vejukaho na nuni ijakino veju. Nuni pasia mapoka ikihipuni urijaho na nuni iji vejujihuni maijaho ja ki'avajaho nara pasikaho vejuta rohuni jihuna'e veju. 18 Núni Natohwa Jesu Keriso oni maiji vwihaniajaho ja pu'úmuna.

Copyright information for `MCQ