Acts 18

Poru Koritia Vaji Hinajina

Ikihi puni túna'i hu Etenisi areme 'urine Koriniti va'ana. 'Enarena hu ijino Jua pina huni iha Akwiraho piunamana. Ea kajaho Ponitasi nahejara. 'Ena'omo hu naparaha Pisira'i Itari rene roara. Ijihuni maijaho Korotiasira Jua maho'o Romu are'avarono 'waramana. 'Ena'omo hu puni roana. 'Ejume hu pura kaukara ka'ene vejuja'ina'e hu 'u'o venuna'omo hu pu pu'úmo ahuma hine kaukara vejara. Ijihuni maijaho pu harai ara veji'ina. 'Enare'e Sapati vea mapoka kajija hu va'e Sinakoku vaji Jua 'ee Kuriki epo hununa'i ro'avarono 'waramana. 'E'eme Sairasi'o Timoti'i Mesatonia rene roara. Poruho na'ia mapoka huni vea natohwa Godoni ira toi raname hine Jua najahe ijá 'iama Jesuho Kerisona 'iamana. 'Ejume Jua kajija pu huni ira pataarohe pu hine ira sisea 'waravara. 'Ejume hu huni ateha túa tairevi'i ijá 'iama Joni 'aa ijaho joni húmata 'ahina'omo na ahija pa'ana. 'Ena'omo na iviasi rene Jenitaru puni vahuna 'iamana. 'Enarena hu ijaho are'ika'i va'e ea pina huni iha Taitasi Jasitasi ka'ene Godi oja mahi'ini jihuni sei va'ana. Huni seijaho Sinakoku romaina. 'Enakaivo ea pina huni iha Karisipasina hu Sinakoku 'ajohi'ina'omo hu Natohwijaho nimaa ronana. 'Ejumakame huni kachi'ina no'one 'ee Korinitia ora mapoka hene nimaa rojara. Ijihuna'e pu toi samaara. 'E'eme na'ii Natohwijara Poru visoni vaji ijá 'wama A niho'o paju'amana kaivo siheria pave'ika'i 'wara'amana. 10 Na a hu'úmuna'omo ea pina niho'o a pasise'i 'ahahuna. Ijihuni maijaho Nuni ea mapoka'e ara ikino hiju 'wamana. 11 'Ejume Poruho juara kwinune masapa iropu'a kwino ijí hine Godoni vu'a pu najahana. 12 'Enakaivo vea ka'ene Kario Akaia opuni ea Natohwa renajihuni vea kajino Juapo 'urine Poruna'i sena vejara. Pu hu apena 'otua asúki va'ara. 13 'Enareja pu hu namahe ijá 'wava Ike eakaho nuni tamana pataarohe ea 'waravu'e pu Godi ani'ina oja mahu 'iavara. 14 'Ejume Poruho mai'o 'wara'i ve'eme Kariora Jua ijá 'iama Ikaho unenu'u pina sisea re'ipisa na joni ira hene veju'u. 15 'Enakaivo ja joni ira 'ee iha 'ee joni tamana ijihuna apori'avajaho na pahe'ejukúne va'e ojono kaha 'iamana. 16 'E'ikaivo hu 'otua asúka 'ararihiume pu usema va'ara. 17 'Enareja Sositanisi Sinakoku kajihuni ea ni'ina'omo pu 'unama apena 'otua asúka una'i hijahara kaivo Karioho kima pataarorahana.

'Unama Enitioki Va'ajina

18 'Ejume hu Poruho ijino 'aha jora'e hinarena ea ka'ene nimaa roji'inijihija irechami'i kaivo sisima ajime Pisiraho 'ee Akwirai pu'úmo Siriai va'ara. 'Ene Senikeria 'e'une huni húmata sapasa 'uhuana. Ijihuni maijaho hu varapa areme hinana. 19 'Enareja pu va'e Epasasi usemareja hu pu ijí irechami'i kaivo hu va'e Sinakoku vaji arume va'e pu pu'úmo hine 'wame pira'aravi'i hijara. 20 'Enareja pu hu ijí 'aha jora hi'amarono pu jarivara kaivo hu rarenana. 21 'Enarena hu pu irechamie ijá 'iama Godira kú'o na iki ro'urono ura re'amajaho na rohuna 'i'i kaivo hu Epasasi rene sisima 'ahi ajima va'ana. 22 'Ene va'e Sesaria 'e'une ajima va'e Keriso oni ea 'ajoramarena Enitioki va'ana. 23 'Enarena hu ijino na'ia 'aho'a hinarena hu iji'a va'e Karesia 'ee Pirijia opuni ara ara kajino va'ana. 'Enarena hu ea ka'ene nimaa roji'inijija ni'ajihe 'ata kisi nami'avarono 'waramana.

Aporasi Epasasi 'Ee Koritia Vaji Hinajina

24 Jua ea pina huni ihijaho Aparasina. Hu Arekisanituria nahejara 'ee vu'a arira 'waravi'ina'omo hu roe Epasasi hinana. 'Ene hu Godoni ira hena kavi'ina. 25 Hu Natohwi jihuni 'unama nahara'omo huni oja vaja venakaka re'eju'e hu Jesu rone 'warame 'ee arira najahuna kaivo hu Jonira ea toi samaajiru henuna. 26 'Ena'omo hu va'e Sinakoku vaji paju'ika'i najahuna. 'Ejume Akwira'o Pisira'o henareja hu ahema va'e Godoni 'unama huri kú'o hami nahara. 27 'Ejume hu Akea va'iro ura rejume ea nimaa roji'ina ka'ene ijino hijujipo ni'ajahe tisaiporuapo roe hu 'ajahe ahehuna'e vejara. Hu va'e ijí 'e'unarena ea ka'ene maiji vwihani'ina vaji nimaa rojajija ni'ima'ura'e ni'ajihana. 28 Hu ea mapoka kajihi puni una'i Jua ninama'e Godoni irijino najahi'i ijá 'iama Jesuho Kerisona 'iamana.

Copyright information for `MCQ