Acts 21

Porura Maritasi Rena Jerusaremi Va'ajina

'Ejume nú pu 'ajoramareja irechamie va'ara. Nú va'e sisima 'ahi ajime arira va'e Kasi usevara. 'Ena'omo ijihuni sú'uhijino 'urina va'e Rotesi usemareja va'e Patara va'ara. 'Enareja nú ijino sisima ka'ene Ponisia vahunijaho piunamareja ijihuni toi ajima va'ara. 'Enareja nú Siria va'iro vai'i Saiparasi 'ana'inija'i kavi'i va'e Taia Siria vaja kajina'omo va'ara. Sisima kukua 'aho'a irecha'irono va'ana. 'Enareja ijino tisaiporuepo ijí hi'ava ronareja sarama kimareja hura kwino ijí pu pu'úmo hijara. 'Ejumakame Godoni 'Avenijara 'waravume pu Poruho Jerusaremi pava'amarono 'waravara. 'E'eme veijaho paare'i vejume pu 'urine va'e pu pu'úmo napahwaha 'ee sesahwaha ijihi pu'úmo ara kajaho are'i kaivo va'e soha rori nitupari same pu pu'úmo hine siporua 'ojara. 'Enareja ea kwinu kwinu ija 'eka'e 'ajoravume va'ara. 'Enareja nú pu pu'úmo 'ajosarame nú va'e sisima 'ahi ajivume pu kú'o 'unama ari va'ara. 'Enareja ijino Taia rene va'e kehi hijajaho Tarimeisi usevi'i kivajaho ea ka'ene nimaa roji'inijija 'ajorame na'ia kwino pu pu'úmo ijí nejara. Ijihuni sú'uhijino nú 'urina roe Sesaria usevara. 'Enareja Piripu ka'ene Ivenijarisi jihuni sei va'ara. Hu ea iropu no'o pijihara vajijino ea pina ka'ene pijahajina. Ea ikehuni 'apahija no'ona no'ona parua paveji'ina kaivo pu poropetia. 10 Nú ijino na'ia mapoka'e hi'eme ea pina huni iha Akapasina 'wavujaho Jutia rena roana. Hu 'u'o poropetia. 11 'Ena'omo hu núni roana. 'Enarena hu Poru oni charia ka'ene hu 'ahi iramajaho rasame huni ija mumoraji'i vevahavi'i ijá 'iama Godoni 'Avena na ijá 'wima Ike charia kehuni omijaho Juapo kahino Jerusaremi apene ika'ina vevahame apene Jenitarua mihuna 'wimu 'iamana. 12 'Ejume núa 'ee ea mapoka ka'ene ijino hijajija Poruho Jerusaremi pava'amarono rarejara. 13 'Ejume Porura eha vene ijá 'iama Ja raka vene niramaruvu'ukame nuni oja tura'i 'ahio? Na Natohwa Jesuni ihijihuna'e Jerusaremi va'e tipura vahune 'ee kwahunijaho pavwihaju 'iamana. 14 'Ejumakame núra ijí rarehuna areri parenana. 'Ejume nú ijá 'wava Maka'eje raka ka'ene Natohwijara ura renuja'ina venama 'wavara. 15 Nú ijihuni túna'i 'urine núni uneunecha 'eka Jerusaremi va'ara. 16 'Ejumakame tisaiporu 'aho'a Sesaria ora nú pu'úmo vu'ajivara'omo pu nú aherume Nesani ka'ene Saiparasi orijihuni sei va'ara. Hu niho'o nitama tisaiporua rene hinapene roajihuni sei hijara.

Porura Jemisi Ka'i Va'ajina

17 Nú va'e Jerusaremi usevume vwehu núna niho'o teamana'eme nú 'ajorume aheruvara. 18 'Ena'omo ijihuni sú'uhijino Poruho nú pu'úmo va'e Jemisi ka'i vai'i kivajaho sosi puni eruta ijí hijara. 19 'Enarena hu pu 'ajoramarena Hura kaukara ka'ene venana vaji Godi raka ka'ene Jenitaru ijihipuni vaji venajaho hine kwinu kwino tahe 'waramana. 20 'Ejume pu ijí henareja Godi ta'arohara. 'Ene pu ijá 'wava Vwea núne Jua mapoka mapoka nimaa rojura. 'Enakaivo pu Mosisi oni tamana vehuniji niho'o harura veju. 21 Pu ijá 'wava Ara Jenitaru puni ari hina 'onuji'i najahukame pu Mosisi oni tamana pataarohu. 'Ene pu puni harihija sisa pa'uhu'avarono 'waravu. 'Ene Jua puni tamana pave'avarono 'waramuna 'wavara. 22 Ara roajaho pu nimaa he'eja. 'Ena'omo nú ichá ve'eja? 23 Nú raka a 'warava he'amajaho ijá ve'amana. Ike ea no'ona no'o ikija 'aura arevara. 24 Ara pu pu'úmo va'e pura raka ka'ene ve'avajaho a 'u'o ijá ve'amana. Ara oni húmata 'usimareje ea no'ona no'o ikihi 'usimahakivi'i a puni eha ve'amana. 'Ejakame pu ea mapoka hena kamareje oni vu'a ka'ene hejajaho ira'ata re'amana. 'Enakaivo a 'u'o tamana kajaho 'ajohe veji'ina'e ka'avara. 25 'Enakaivo Jenitaru ka'ene nimaa roji'ini jihipuni pasi vene ijá 'waravara Pu 'iruma ka'ene godi ira'atiji vaji'avajaho paine 'ee 'aa paine 'ee hanuha 'aa rukina paine 'ee 'uasa pave'avara 'iavara 'wavara. 26 Ijihuni sú'uhijino Poru 'urine ea kajija aherame tamana kajaho ijá vejara. 'Enareja pu va'e Temiporu vaji arume 'aura are'ira'omo vea ka'ene kú'o 'aura kaji ihunijaho ija'ina nahama 'waravara. 'Enareja pu ea kwinu kwino puni swasa venahara.

Poru Temiporua Vaji Kamovajina

27 Hura kwinu pa'are'i ve'eme Jua ka'ene Esia orijipo kavume hu Temiporu vaji hijume kama pu aneja vene ea mapoka puni oja inaume pu hu iji 'unavara. 28 'Enareja pu ira ajira'e ijá 'umeja Isureri orakije roe ni'ajúha. Eakara kwaaka mapokijino eaka mapokijija ehu núna 'ee núni tamana 'ee ruhakaho ninama 'waramujiru pana kaivo hu Kuriki aherame núni Temiporua vaji rou'e akuavuri ruhakaho niho'o siseranu. 29 Pu ijá 'wavajihuni maijaho pu ki'eme Turopimasi ka'ene Epasasi oriji'o Poru'o ijino ari 'urahojara. 'Enareja pu vwihajajaho Porura hu aheme ijino puni Temiporu vaja kaji aruma va'ana ro'ika'i avajara. 30 'E'ikaivo pu ea mapoka ajinama parajume ni'aha kwino ninukujaha roe ahumareja pu aruma va'e Temiporu vaji Poruho 'uname tairie apena roe ma'ahi ro'eme vwicha kajaho marako kuvara. 31 Pu hu 'ana'irono 'unama sa'eme vu'arena va'e Romu puni sorutia ni'ini jihuni va'ana. 'Ejume Jerusaremi niho'o mi'ija puna'i tamui namana. 32 Hu ni'aha kwino sorutia 'ee puni mama'ina 'aho'a aherame ninukujahe puni va'ume pu sorutia 'ee puni natohwiji kimareje Poru 'anaajaho arevara. 33 'Ejumakame ea ni'inijara vu'e iji 'una'i kaivo 'waravume pu seni no'ohe'i 'eke kamome aneja vene hu irane 'ee hu iraka'e venaji apovara. 34 Pu ea 'aho'a 'urine ani 'waravume pu ea 'aho'a ani ani 'waravara. 'Ejumakame ijí ea natohwa kajaho 'unama ka'ene ichá'ina venareja ijí vejajaho puruva renana. 'Ejumakame hu huni ehija 'waravume pu Poruho aheme kahino huni sea ka'ene amiapo hijujino va'avarono 'waramana. 35 Hu Poruho pu pu'úmo 'urina va'e kami vwicha jiami va'ume amia kajipo apene pikima ichutoi 'unama va'ara. Ijihuni maijaho eaka mapokijipo 'ana'iro vejumakame avajara. 36 'Ejumakame ea mapoka puni túna'i vai'i 'anae kwamama 'umenapene va'ara.

Porura Huni 'Unama Amairie Juapuni Una'i 'Waramajina

37 'Enare'e ijí sorutia kajipo Poruho apene puni sei vaji va'i vejumakivi'i hu iji amia epuni ea natohwa kajaho ijá 'wama 'Ú na unenu'u pina a 'wara'ejo? 'wamana. 'Ejume hu ijá 'wama 'Ú a Kuriki puni ira henune? 'wamana. 38 Ivi'a a Ijipiti ora ka'ene ni'ahuka ea mapoka mapoka (4,000) ka'ene ea 'aniu'e kwamasahi'ina oja ina'e aherame nechi'i va'ajaho pane? 'wamana. 39 'Ejume Poru ijá 'wama Na Jua Tarisasi ora Sirisia vajina kaivo ara kajaho natohu varesima'ura. 'Enajihuna'e na ura ea mapoka vu'a 'wara'i 'ahiu. 'Enajihuna'e na ura jarirame 'waravukúne ruha aremie na ea ikija vu'a 'waravuma. 40 'Ejume hu ruha aremahe nijina 'wavume Poruho ijí siasa 'aha kajino nami'i kaivo huni iji hararajihana. 'Ejume ea mapoka iruno'a are'eme hu Hipuru puni iri 'waramarena ijá 'iamana.

Copyright information for `MCQ