Acts 26

Porura Akuripa Oni Una'i Huni Vu'a Amairiajina

'Ejume Akuripara Poruho ijá 'wama Ivi'a a oni vu'a 'waruma 'wamana. 'Ejume Porura 'urine huni ija ahasiri'i kaivo hu huni vu'a aneja vene 'waramana. Uneunecha mapoka ka'ene Juapo na namihujija na onuno vwihajujaho mamaa vene Kini Akuripa na iviasi oni una'i 'wara'eju. Ijihuni maijaho a tamana 'ee aposaraa ka'ene Jua puni vaji navujaho a niho'o he paraji'ina. Ijihuni hahi na jarirame 'waravukúne masuani hine he'amana. 'Ena'omo Jua hia ichá'ina ka'ene nara sesamu'uru rene hina apene roe iviasi 'e'ujijaho nihene kivura. Na anejijaho ehu nu pu'úmo ike nuni kwaa Jerusaremi vajakino hijuta. Pu marako 'aha jora'e na hena kivajihuna'e pu ura na rone 'wara'i 'ahi'amajaho pu 'warahuna kaivo na Parasi'e hijujaho nuni nimaa roijihuni tamanijaho niho'o kikisima'ura. Godira emahu nuna'e nahama 'waramajara roe nimaa rehuni jihuniji kavi'i hijujihuna'e iviamaa 'otua vaji namiju. Núni ituha iropu ropu no'o nahama 'waravajara roe nimaa re'amarono 'ajaha hiji'i na'ia veiri'a siporua 'oji'i hijura. Oo kini ija'ina'e na 'u'o nimaa rojujihuna'e Juakaho na namihe avaju. Ja rakijihuna'e Godira ea kwamasahi'ina veje 'urihunijija joni vaja panimaa rojo? Nitama na ija'ina vwihajuta. Na uneunecha mapoka sisea areri parehuna venareje Jesu ka'ene Nasareti orijihuni iha ruarahuna'e vwihajuta. 10 Ikaho iraka ka'ene Jerusaremi nara vejujina. Na ea ka'ene nimaa roji'inijija tipurai samahunaru pana kaivo pirisitia mama'inapo harura mihume ea 'aho'a 'aniume kwamasahajaho na 'u'o nimaa vene 'waravuta. 11 'Ene na'ia mapoka na Sinakoku mapoka vajijino pu sise'i 'ahiura 'ee ira sisea 'wara'avarono 'ejahiura. 'Ene niho'o ajinima paranujaho va'e apiopuni kwaa kajino 'anie ruarahura.

Porura Godoni Ea Renaji Rona 'Waramajina

(Akisi 9:1-19; 22:6-16)

12 'Ena'omo pirisiti mama'inijipo harura mihe ranamiume na Tamasikasi va'iro va'uta. 13 Oo kinia vea uariri nami'eme 'unamu toi na va'i kavume akúpa 'ahi ni'ima'ura hana'eme nuni haha hanana. Ijara hananajaho veakara rinujaho asimana. 'E'eme ea ka'ene nú pu'úmo va'ajija 'u'o hananiana. 14 'E'eme nú ni'aha kwinu mwe'i apúsama navi'i na hejume ira kahi akúpi 'ahi rene roe Hipuru puni iri ijá 'wima Soru Soru a irakijihuna'e Na sise'i 'ahiu? Ijí usa rukima'ura 'aha kajino 'anahuna areri pana 'wimana. 15 'Ejume na ijá 'wavo Natohwe A irarane 'wavuta. 'Ejume Natohwijara ijá 'wima Na Jesu ka'ene a sise'i 'ahaujarana. 16 'Enakúne 'urine namina. Nara oni roujihuni maijaho a Nuni kaukara veji'ina rene raka ka'ene Nara vejume a kamaji najahe 'ee Nara naja'uji 'wara'amana. 17 'Ene Nara Jua puna'ijaho 'ajoahe 'ee Jenitaru puni Na a ranamau'e va'ujaho 'ajoahuna. 18 'Ejakame a veje puni nia jaraahuna. 'Ene pu nututi hijujaho are'i kaivo ta'arohe hanaji'iniji roajihuna 'ee Setani oni harura hari hijujaho are'ika'i Godoni rohuna. 'Ejakamareje sisea vwihanie arevujaho apene 'ee ea ka'ene nimaa rojajihuna Na iji pijihujipo aachia ka'ene 'ekahunijaho pu 'u'o ijihuni vaji 'ekahuna 'wimana.

Porura Huni Kaukara Ijí Rona 'Waramajina

19 'Enajihuna'e O kini Akuripa akúpa huni visoni ka'ene kavujaho na pauchavuta vo vejuta. 20 'Enakaivo na marako Tamasikasi najahuta. 'Enarejo iji'a roe Jerusaremi najahe va'e Jutia puni ara kwaa vaja najahuta. 'Ene Jenitaru 'u'o najahuta. 'Enarejo Na ika'ina 'waravuta Pu puni sisea niarevarepo hine ojuja'ina'e o'avarono 'iavuta. 21 Ijihuni hahi Jua 'ahopo Temiporu vaji apene 'anie kwa'urono vejara. 22 'Eju'e Godira ni'ajiha apene rou va'o roe iviamaa 'e'unukena. Ijihuna'e Godira ni'ajihukame na iviamaa ikino ea ma'u'umae 'ee ea mama'ina puni nii 'ahi vu'a 'waravu. Ijí nara 'waravu kajaho ea ka'ene poropetia 'ee Mosisi pu'úmo raka ka'ene rehuna'e 'waravaji na rone 'waravuta. 23 Pu ika'ina 'waravara. Kerisoho Hu sise'i 'ahae kwamareje kú'o 'urihuna kaivo Jua 'ee Jenitaru Hura amura'e vu'a ka'ene hanaji'iniji najahe 'wara'ena 'iamana. 24 Poruho huni vu'iji vahame 'waravume Pesitasira ira ajira ijá 'wama Poru! Oni henaka ni'inijara venau'e a nanamu 'wamana. 25 'Ejume Porura ijá 'wama Pesitasi ka'ene ea natohwakera na niho'o pananavu kaivo na vu'a nimaa 'waravu. 26 Kinijaho ike raka ka'ene rejajaho nihene kimuna. 'Enajihuna'e na raka'e hu 'wara'i ve'uji 'u'o matauma 'warahuna. Na nihejura raka ka'ene rejajaho hu nihena kivi'ina. Ijihuni maijaho ijí vu'a kajaho nesi parejara. 27 'Ú kini Akuripa a poropetia nimaa vetiune? Ara ija'ina ka'ene venujaho na niheju 'wamana. 28 'Ejume Akuripara eha vene ijá 'wama Poru iviamaa vea tu'uakino a na venie na Keriso oni ea re'i veju 'wamana. 29 'Ejume Porura ijá 'wama Ike senia ka'ene nuni haha 'ahi namujina vo Na vea tu'ua 'wara'eju 'uho jora 'wara'ujaho nijina. Na Godi jarivu jihuna'e na ura a'asu pana vo ja ea mapoka ka'ene hina nuni vu'a iviamaa heju kijahija nara rejuja'ina'e ja rehuna 'wamana. 30 'Ejume kinijine kavana ijine Penisine 'ee ea ka'ene ijí pu pu'úmo asuma hijajija 'urijara. 31 'Ene pu 'urina kararu va'i aneja vene ijá 'wava Eakaho unenu'u pina sisea ve'ira'omo kwahuna ho tipurai apehuna pana 'wavara. 32 'Ejume Akuripara Pesitasi ijá 'wama Ea kara Sisa oni va'e 'otua ve'irono 'waramajaho pa'are'ipisa a hu ranave va'a 'wamana.

Copyright information for `MCQ