Acts 9

Sorura Ta'arohani Vu'a

(Akisi 22:6-16; 26:12-18)

'Ejume Soruho majama hine Natohwi jihuni tisaiporua juvu vu'a 'warame 'ee 'anie kwamasa'avarono va'e pirisitia ni'inijaho 'waramana. 'Ejumakame hu pasia vene vajahe 'eka va'e Tamasikasi Sinakoku mapokiji vajihe pu hu ni'ajahareje ea ka'ene 'Unama ikehunake veji'ina parui napari piuni'avajaho pu 'eke Soru vajahe kamorame hura 'eka Jerusaremi rohuna. 'Ejume hu Tamasikasi rori ro'eme ni'aha kwino akúpa 'ahi rene hanane huni haha 'aha 'ee huni rora kajaho hanana paranana. 'Ejume hu mwe'i 'oji'i hejume irijara ijá 'wama Soru Soru a rakijihuna'e Na sise'i 'ahiu 'wamana. 'Ejume hu ijá 'wama Natohwe A rarane 'wavume Hu ijá 'wama Na Jesu ka'ene ara sise'i 'ahaujarana. 'Enakúne 'urinareje ari va'a. 'E'eje ara iraka ka'ene vehunijaho ijí 'wara'amana 'wamana. 'Ejume ea ka'ene pu pu'úmo va'a kajija ijí ira pa'wanama'ika'i namine irijaho hejara kaivo ea haha pakavara. 'E'eme Soruho 'urinana kaivo huni niijaho niho'o nutuvumakame uneunecha pakimana. 'Ejume ea kajipo huni iji 'unama apena va'e Tamasikasi ranavara. 'Ejume hu na'ia no'opisu nia panirie 'ee 'iruma paine 'ee toa painana. 10 'Enakaivo tisaiporu pina iha Ananaiasi ijino Tamasikasi hinana'omo Natohujara visoni vaji ijá 'wama Ananaiasi'o 'wavume Ananaiasi ijá 'wama Natohwiji na ikeho hiju 'wamana. 11 'Ejume Natohwijara ijá 'wama A 'urine 'unama ka'ene Arira 'wavujihunijiano va'u va'o va'e Jutasi oni sei ea pina iha Soruho Tarasasi ora'omo hu ijí hine siporua 'oji'i hinu. 'Enakúne a va'e ka'amana. 12 Hu 'u'o visoni ka'eme ea pina huni iha Ananaiasi 'wavujaho va'e ijí arume huni ija huni haha 'ahi irechavumakame huni nia kú'o niriana. 13 'Ejume Ananaiasi eha vene ijá 'wama Natohwe na nihejuta. Ike ea kehuni vu'ijaho hura Oni ehija ka'ene Jerusaremi hijujihi 'eke sise'i 'ahiajaho na nihejuta. 14 Hu ea ka'ene pirisiti mama'inapo harura mahume hu ea ka'ene oni iha 'urahujihi kamorai roana 'wamana. 15 'Enakaivo Natohwijara ijá 'wama Ijí ea kajihuni va'a Nara hu Nuni kaukara ve'amarono iji pijahuta'omo hu Nuni iha apene Jenitaru 'ee kinia 'ee Isureri oni harihija najahuna. 16 Nara Nuni ihijihuna'e hura haha ni'ima'ura ka'ene hiahunijaho nahuna 'wamana. 17 'Ejume Ananaiasi sea kajino va'e arumana. 'Enarena huni ija haha 'ahi ranamahi'i ijá 'wama Soru vwea nunakera. Jesu Natohwa ka'ene ara 'unamutoi kamajara na ranamiume routa'omo a kú'o nia niri'ena. 'Eje Godoni 'Avena oni oja vaja ruha apena parahuna 'wamana. 18 'Ejume Soruho ni'aha kwino unenu'u pina ka'ene huni nia 'ahi namajaho 'o'eme hu 'urine nia kú'o niriana. 'Enarena hu 'urijume toi apúsavara. 19 'Enarena hu 'iruma ine harura apenana.

Sorura Tamasikasi Keriso Rona Najahajina

'Ejume Soruho ijino Tamasikasi tisaiporu pu'úmo na'ia no'onaho no'opisu hinana.
20 'Enarena hu va'e Sinakoku vaji aneja vene Jesu rone najahe ijá 'iama Hu nimaa nimaa Godoni Hariha 'iamana. 21 'Ejume pu ea ijí hene oja hwa'usunaha'eme pu ijá 'wava 'Ú ikaho ea ka'ene Jerusaremi ea ka'ene Jesu nimaa roju'ukame hu pu ruarahu jarane? Hu iviamaa iki roe ea ka'ene Jesu nimaa roji'inijihi kamorame va'e Pirisiti mama'ini jipuni irecha'i roajaho ikene 'wavara. 22 'Enakaivo Soruho huni haha harura re'ejume aneja vene Jua ka'ene Tamasikasi hijujihi Jesuho Kerisona 'iavume pu niho'o puruva retiara. 23 'Ejumakame na'ia mapoka pa'are'eme Jua mapoka Soruho 'ana'irono 'wamapene ojara. 24 'Enakaivo pura raka ka'ene ve'iro vejajaho Soruho nihenana. 'Eju'ukame pu hu 'ana'i 'ahiu'e na'ia veiri'a ijaho ara vwichia kajino 'ajoha ojura. 25 'Ejumakame Huni Tisaiporuepo apene namea vaji niarikara. 'Enareja ea ka'ene vwicha 'ajoha namija kajihi juhame apene vera 'aha kaji ajima va'e karo'ahuni apúsavume va'ana.

Sorura Jerusaremi Va'ajina

26 Vea ka'ene hu Jerusaremi roajaho tisaiporu pu'úmo ahui venana kaivo pu tea junamana. Ijihuni maijaho hura tisaiporua'e renajaho pu panimaa rojara. 27 'Ejume Panapasira hu ahema apene apasoru puni roe hura Natohwiji 'unamutoi ichá'ina ka'ene kavume Hura vu'a 'waramana 'ee Tamasikasi Jesuni iha 'ahi paju'ika'i 'waramajaho 'waramana. 28 'Ejume hu ijí pu pu'úmo mataume Jerusaremi paju'ika'i Natohwi jihuni iha 'ahi vu'a 'warame ojara. 29 'Enarena hu Jua ka'ene Kuriki opuni iri 'waravujihi pu'úmo hina nakaravara. 'Ejumakame pu hu 'unama ka'ene 'anahuniji savara. 30 'Ejume vwehwapo ijí henareja pu hu ahema kami Sesaria va'ara. 'Enareja pu hu ranavume Tarasasi va'ana. 31 'E'eme sosia ka'ene Jutia hine Karari hine 'ee Sameria hijujija matausaha hiji'i emarene 'ee Natohwiji juhavi'i hijara. 'Ejume Godoni 'Avenijara pu soma'eju'e ea mapoka rena ajima va'ara.

Pitara Rita 'Ee Japa Najahajina

32 'E'eme Pitaho ara ara kajino nimaa roji'ina ka'ene hina apene oja kajihi kima apena onuva'o Godoni ehija 'aho'a ijí Rita hijara'omo ki'i va'ana. 33 'Enarena hu ijí va'e ea pina huni iha Eniasiho pa'uraha o'i kaivo ijí sei vajaru hi'eme juara ija ronu no'opisu pa'arenana'omo ijaho piunamana. 34 'Enarena Pitara hua ijá 'wama Eniasi! Jesu Kerisora veju'e sonahaukúne 'urina oni suha mwama 'wavume hu ni'aha kwino 'urinana. 35 'Ejumakame Rita ora 'ee Sarani ora hua marana kaji kamareja pu ni'aha kwinu maho'o Natohwiji huni ta'arohe ro ranavara. 36 Ara ka'ene Japana 'wavujino tisaiporua pina Tapitana. 'Enakaivo Kuriki puni iri 'urahujaho Tokasina 'wavura. 'Ena'omo ike naparakaho hu ea hami 'ahie 'ee ea ka'ene uneunecha pa'ajihi ni'ajihuna. 37 Ijí vea kajiha kajano hu atami 'unavume kwamana. 'Ejume pu huni hahijaho apene toi rúrahareja ichutoi ruha pini ranavume namana. 38 'Enakaivo Japaho Rita rorina'omo tisaiporu 'ahopo Pitara Rita hinaji henareja pu ea no'o irechamiume va'e mamako nú pu'úmo roa 'wa'irono va'ara. 39 'Ejume Pitaho 'urine pu pu'úmo va'ana. 'Enarena hu va'e 'e'ujume pu ahema ichutoi ruha pipunijino va'ara. 'Ejumakame ijí amunaka mapoka ka'ene Pita oni rori namija kajija ateha ka'ene Tokasira hu mai'o hinani veijino vena useaji kima hine niramaruvara. 40 'Ejume Pitara 'waravume ma'ahi va'umakivi'i hu atoki same siporua 'onana. 'Enarena hu iji'a ta'arohe napara kajihuni hahi namaja'i kavi'i ijá 'wama Tapita 'urina 'wavume hu nia jarae Pita kamajaho hu ni'aha kwino 'urine arini hinana. 41 'Ejumakavi'i hu huni ija mahume 'unama apena 'urijume hu ni'aha kwinu 'uri arini naminana. 'Ejumakavi'i hu ea ka'ene nimai roji'ina 'ee amuna 'umenaume roume hu ea mai'o hiji'ina kajaho pu mihana. 42 'Ejumakame Japa ea ka'ene hijujija hene kavara. 'Enareja pu ea mapoka'e Natohwijaho nimaa rojara. 43 'Enarena Pitaho ijí Japa Saimani ka'ene hanuha sisa amairi'iniji'i na'ia mapoka hinana.

Copyright information for `MCQ