Colossians 2

Jaa 'ee ea ka'ene Reatasia hijura 'ee ea maho'o ka'ene nuni urania pakavi'ini jihipuni jihuna'e oja ni'ima'ura hejuji na ura ja hehuna ura reniu. 'Ejakame puni ojijija ni'ajihuna. 'Eje oja 'ekaravuri vajijino ahuma parahuna. 'Ejakame uneunecha ka'ene maho'o hena kavura 'ee henaka ka'ene nimaa Godoni hemiji hena kahuna. Ijaho Kerisona. Huni vaji vwiha mavarasa'ina arira 'ee henaka maho'o rinamiu'e navu. Na ija'ina'e 'waravu jihuni maijaho ea 'aho'apo vu'a ira'atijino pisimisave ja nimaa vena ve'avarono 'waravu. 'Ene hahijaho na ijaho pahiju kaivo 'avena vajijaho na ja pu'úmuna. Jara mamaa'e ojono 'ajo'arame 'ee Keriso nimaa rojuji kirasaha paraju jihuna'e teamanimu.

Hia Ka'ene Keriso Oni Vaji Marana Parahunijina

'Enakaivo ja Jesu Keriso ka'ene Natohwiji apejarakúne Huni vaji 'uraho'avara. 'Enakúne Huni vaji chinuma same emarena aji'avara. 'Ene ja najahe 'waravume hejaja'ina'e joni nimaa roijaho veje kisina'e rena para'avara. 'Ene temari itu'ona parani'eje o'avara. 'Ene paveje emaapuni vwiha 'ee vu'a maa pa'ajipo pisimie 'ee emaapuni tamana 'ee mwe'a kehuni 'unama ani ani'ina najahe 'waravujipo pisimie ani ruva'ava. Ijihuni maijaho ijí 'unama kajija Keriso oni 'unama pana. Hura haha ka'ene apenana vajijino Godoni kara icha'inijaho maho'o Huni vaji navu. 10 'Ene Huni vaji ja maho'o ni areri renaana. 'Ene Hu ea maho'o 'ajohai'ine 'ee harura mapokijihi puni húmata. 11 'Ene Huni vaji ja 'u'o sisa 'uhuahara. Sisa ka'ene emaapo iji 'uhuahuja'ina pana kaivo sisa ka'ene Kerisora 'uhuahajaho sisei jihuni kara ijí 'uhuana. 12 Hua mwe'i vaji apúsavume 'urina ja'ina'e ja 'u'o pu pu'úmo toi samaume 'urijara. 'Ene Hua'e nimaa rojari vajijino Godira Hua'e kwamana ka'ene vejume 'urina ja'ina'e ja 'u'o venaume 'urijara. 13 Vea ka'ene ja joni sisea vajijino kwamasahe 'ee sisa pa'uhuari vajijaho Hura núni sisea maho'o vwihanúe arevume paranana. 'E'ikaivo venume 'urine pu pu'úmo mai'o hiju. 14 'Ene núni chimua 'ee varapijara núa'e ninamu'e ruruhajaho Hura 'eka ruva'e korosi 'ahi 'aniume parajara. 15 Hura 'ajoha'ina 'ee harura mama'ina sisesa ijija Huni vaji korosia 'ahi eriri samaumai túa vetie venaume harura pa'arenaana. 16 Ijihuni hahi paveje ea pina joni 'irumijihuna 'ee toijihuna 'ee sora ijuri vea 'ee masapa maiu'ina huna 'ee Sapatia huni vea panamahi'ina'e re'amana. 17 Ikija raka ka'ene mai'o rohuni jihuni 'avena kaivo nimaijaho Keriso ona. 18 Ja paki'eje ea 'ahopo ja pisimisave joni haha ruarahe 'ona oji'ina oja mihuna'e 'warame visoni toi namuji'i ike veha 'iame 'ejahie 'ee puni vwiha ijí ani ani kehi kehi veji'i 'waravakame joni eha ka'ene 'ekahunijihi are'ejakúne hena pavanami'avara. 19 'Enakaivo pu húmati rene ihena roe haha maho'o kaho ni'ajahuna pana. 'Enavo nú Huni haha 'ahi tanuka 'ee chinumijipo roe ihenuara. 'Enajihuna'e harura ka'ene Godoni rena roujara harura múhe ni'ajúhu'e emareju.

Kwamasahara'e Keriso'i Pu'úmo 'Urina Hijujina

20 Ja Keriso oni vaji mwe'a kehuni 'unama ani ani'ina ka'ene najahujija nikwamasahume paranana kaivo ja irakijihuna'e mwe'a kehuni varapa hara kú'o hijo? Ijija ikehina. 21 Ikaho pa'unira'avara. Ikaho paina he'avara 'ee ikaho pavwena'avara. Ikaho paina he'avara 'ee ikaho pavwena'avara. 22 Ijaho emaapo 'warume najuha jihuna'e nú ikehi 'eke ve'avajaho pa'arehuna. 23 Ike varapa ikija nimaa puna'i rehuna. Ijihuni maijaho puni oja vwiha ijija niijihi miha parane 'ee haha puna ruarahe sise'i 'ahiura. 'Enakaivo ijipo puni vwiha sisesa ka'ene itunavujihi ni'ajihuna pana.

Copyright information for `MCQ