Ephesians 1

Vu'a Anejijihina

Na Porura Godoni ura ijino Jesu Keriso oni apasorua rejuta. 'Ena'omo Godoni ehija Epasasi hijura ka'ene Jesu Keriso oni vaji uchaha pa'ajihi puna'e veju. Maiji vwihani'ina 'ee matauvi'ina ka'ene Godi núni Oma 'ee Natohwa Jesu Keriso oni rena roajija ja pu'úmuna.

Keriso Oni Vaji 'Avena Huni Merajihi'ina

Núni Natohwa Jesu Keriso oni Godi 'ee Omiji ta'aroha. Hura 'Avena Huni merajihi'ina ka'ene akúpi 'ahi navujija Keriso oni vaji maho'o merajúha paranana. 'Ene Hu nú mwe'a paveji'ini Huni vaji iji pijúhana. 'Ejakame nú Huni una'i oja mahi'ina rene akuavi'ina rene 'ee sisea panamuhi'ina'e re'avarono iji pijúhana. 'Ene Jesu Keriso oni vaji Huni Harihija'e 'ekuhunijaho nitama Huni ura ijino Hu ura renaja'ina'e amairiaramana. 'Ene Huni maiji vwihanii'ini jihuni pinaniji ta'aro'avarono Hura oja múhi'ini jihuni vaji ma'ekuana. 'Ene Hura ori Huni 'aa vajijino ni'ajúhe kú'o 'ekuana. Huni maiji vwihanii'ina ka'ene itu'o'una namuna vajijino núni sisea vwihanúe aremana. 'Ene Hura Huni maiji vwihanii'ina ka'ene itu'ona namuna vajijino vwiha mamaa maho'one 'ee henaka maho'o 'usesamúhana. Godi Huni ura ijihuni hemijaho vejume núnuna'a samaumaa renana. Godi Huni ura ijino Keriso oni vaji Hu ura renaja'ina'e venana. 10 'Ene vea roe areri rena parajakavi'i uneunecha mapoka Keriso oni vaji ichutoi navura 'ee mwe'i navura 'ekaroe Huni harura hari nahuna. 11 Hura nitama Huni ura ijino iji pijúhana. Hura amairiarama ja'ina'e 'ee Huni aachia 'u'o 'ekara. 'Ene uneunecha maho'o Hura ura rene 'ee 'warama ja'ina'e rejara. 12 'Ejakame ikehuni urijaho nú ea ka'ene amura'e Keriso nimaa rojujaho Huni mamaiji ta'arohuna. 13 Ja 'u'o Huni vaji Huni ira nimaiji hene 'ee vu'a maa maiu'ina ka'ene ja ni'ajihana ka ja nimaa rojume Huni 'Avena ka'ene nahama 'waramajaho joni vaji Huni tatua vene mihana. 14 Huni 'Avena ka'ene nú múhajaho Huni aachiji 'ekahuna tatua vene múhana. 'Ene Godi Oma'e rehuna'e kú'o 'uname 'imenúa avanana. 'Ene Huni mamaiji ta'aro'avarono avanana.

Poru Oni Siporua

15 Ikehuni hahi na joni vaji Natohwa Jesu nimaa rojuji hene 'ee jara Godoni ehija maho'o oja mihuji hejujaho pa'uhuname paturana'ika'i 16 na jonijihuna'e joni ihi 'urihe siporua 'one teimani 'wavura. 17 'Ejakame núni Natohwa Jesu Keriso oni Godi 'ee Oma ka'ene pinana rukinijara vwiha ka'ene vwiha mamaa vwihane 'ee jonuna'a veje samaumaa rene 'ee Hu hena kahunijaho samaumaa rehuna. 18 'Ene na siporua 'ojujaho joni oja jaraa kame Hura maa irakijihuna'e ja 'umenaajaho hena kahuna. 'Ene Huni uneunecha mapoka mavarasa'ina ka'ene Huni ehijijipo 'ekujija hena kihuna. 19 'Ene Huni harura ni'ima'ura ka'ene nú nimaa roji'ina kihipuna'i ve'amajaho hena kahuna. Ike harura ni'ima'ura ka'ene núni vaji kaukara venujaho 20 ijí harura kajara Kerisora kwamajaho vejume 'urinana. 'Ene vejume akúpi 'ahi Godoni ija mana'inija'i asuma hinana. 21 Iviamai ikehuni vea ikeru pana kaivo túna'a 'u'o 'ajohai'ina mama'ina harura 'ee harura maho'o 'ee iha icha'ina ka'ene ja 'urihujaho asitaha parane huri hinana. 22 'Ene Godira uneunecha maho'o Huni mumora hari irechamana. 'Ene uneunecha maho'o 'ee sosia Hura húmata rehuna'e mahana. 23 'Ene sosijaho Huni haha ka'ene Hu ijihuni vaji maho'o areri rena paranujina 'ee Hu uneunecha maho'o areri rena paranu.

Copyright information for `MCQ