Ephesians 6

Sesamae 'Ee Emahwaha Puni Vu'a

'Enajihuna'e sesamae Natohwi jihuni vaji emahu jopuni ira hene veha. Ijihuni maijaho ijaho 'unama aririjina. 'Ene oni omiji'o ohiji'u puni hura hami ve'amana. Ikaho varapa amura ka'ene eha mihuna'e nahama 'waramajina. 'Ejakame oni hia mamaa'e reje a 'aha jora'e iki mwe'i hina vahuna. 'Enakúne emahwahe ja paveje sesahu jona ajina'avara. 'Enakaivo Natohwijihuni 'unamijino opuipo 'ajo'arahunijaho najahe hena ka'avara.

Pwea 'Ee Puni Mama'ina

'Ene pwea joni mama'ina ka'ene mwe'i hiju jihipuni ira hene tea juname 'ee simarame 'ee oja nimaiji same Keriso ona'e vena'ama ja'ina'e ve'avara. 'Enajihuna'e ja paki'eje joni mama'ina puni nia 'aharu vene 'ee joni mama'ina'e teamanahuni jihuna vehuna pana kaivo Keriso oni pweapo puni ojiji'i Godi oni ura ijí vejuja'ina'e ve'avara. 'Ene ja emaapuni kaukara'e ve'avajaho teamana'eje areri Natohwijihuna'e venahu ja'ina'e vena'avara. 'Enajihuna'e nú nihena kavu. Pwe'ina ho matauma oji'ini uné raka mamaa'e ve'amajaho ijí raka ka'ene hu vena kajihuni eha Natohwi jihuna'i apehuna. 'Ene mama'ine ja 'u'o pununa'a 'unama ija'ina ve'avara. 'Ene ja veju'e pu tea junavujaho are'avara. Ijihuni maijaho ja nihena kavuja'ina'e puna 'ee joni Natohwijaho akúpa 'ahi hinu. 'Ene Hu ronu kwino pareji'ina.

Godoni Nana'ejuri Kukua

10 'Ene vu'a túchamaa ijaho ikena. Natohwi jihuni harura ni'ima'ura vajijino kirasahe para'avara. 11 'Enakúne Godi oni kukua ka'ene nana'e'irono savujino maho'o sa'avara. 'Ejakame ja Setanira pisimisamuni 'unamijija areri kisina'e rene namihuna. 12 Ijihuni maijaho nú ea haha rukina 'ee 'aa rukina pu'úmo nana pa'eju. 'Enakaivo 'ajoha'ina 'ee harura 'ee harura nutuvi'ina ka'ene iki mwe'i hijura 'ee 'avena sisesa ka'ene ichutoi hijujihi pu'úmo nana'eju. 13 Ijihuni hahi Godi oni nana'ejuri kukuijino maho'o saha. 'E'irakúne vea ka'ene vea sisea kajara ape'amajaho ja ijihuna vaji rarara'avara. 'Ene ja uneunecha maho'o ve'ava jihuna'e ja areri kisina'e rene namihuna. 14 Ja ika'ina'e ve'avajara reje ja areri kisina'e rene namihuna. Joni 'aha mo'oa charia ka'ene nimaijino irame 'ee joni túra ariramaijino vahanaha. 15 'Ene joni umora ira maiu'ina ka'ene matausahuji saha. 16 'Ene ikehuni pwina ijaho tarera ka'ene nimairoiji ape'irakúne Setani oni juha ka'ene jaijasahe roujija iji 'aniku'avara. 17 'Ene i'esa ka'ene marani'inijino same 'ee 'Aveni jihuni so'wijaho Godi oni irijinakúne ape'avara. 18 'Ene na'ia mapoka'e siporua 'ojuri veijaho 'Avena vaji 'o'avara. Na'ia mapoka'e nia nirii'i siporua ea ka'ene nimaa roji'ini jihipuna'e 'one ihajinanami'avara. 19 'Ene nuni siporua 'onihakame nuni ira nasina re'eje na vu'a maiu'ina kehuni hemijaho paju'i kaivo najahe pu hena ka'avara. 20 Ijihuni maijaho na Godi oni iruhoa apene 'waravu jihuna'e na tipurai hijura'omo vea ka'ene ijí 'wara'ujaho na ichá'ina'e 'warahuni ja'ina'e matauma 'warahuna.

Túchamaa 'Ajoramajina

21 'Enakaivo Tichikasiho núni vwea nú oja mahi'ine 'ee uchaha pa'ana ka'ene Natohwi jihuni kaukara veji'inijara ichá'ina ka'ene nununa'i rejujija maho'o 'warave ja hehuna. 22 Na ike 'warahuni maijihuna'e ranavu'e vu'u. Hura núra ichá'ina ka'ene hijujaho 'warave ja hene oja sonahihuna. 23 'Ene matauvi'ina 'ee oja mihi'ina nimairoa ka'ene Godi Amo 'ee Natohwa Jesu Keriso oni rena roajaho vwehi pu'úmuna. 24 Ea ka'ene Natohwa Jesu Keriso oja aririji mahi'inijija maiji vwihani'inijaho maho'o pu pu'úmuna. Ameni.

Copyright information for `MCQ