Galatians 4

Na iviamaa ja 'waravu Omahi kwamajaho hariahi omahoni aachia mapokijaho 'ekahuna. 'Ene ijí hariaha kajaho areri uneunecha mapoka 'ajohi'ina parehuna kaivo vea ka'ene hu emakina re'amajiano hu 'ekahuna. 'Eju'e hariaha kajaho areri pwea sa'ina rena hinu. 'Enaka'ivo hu ea ka'ene hua'e 'ajohau jihipuni hari hine 'ee ijipo aachi'a kajija 'ajoha va'u va'o omahi vea ka'ene ranamaji ape'eju'e iji'a 'ekuna. 'Ena'omo nú sesamaa'e hijajaho nú mwe'a ikehuni ichá'ini jihuni harurijara unúnamúume ijihuni hari hijara. 'Enaka'ivo vea nimaiji roa apejumakavi'i Godi Huni Hariha ranavume roe varapa tamana vajijino napari nahenana. 'Ejakame Hura tamani jihuni hari ea ka'ene hijujija kú'o nú 'imene 'eke piruve Huni harihija nimaa'e re'avarono avanana. 'Ene ijihuna'e ja Huni harihija'omo Godira Huni Harihijihuni 'Avena ranavume núni oja vaji roana. 'Ene Amo Amo 'umenuna. Ijihuni hahi ja pwea pana kaivo Huni harihija'e rejara. A Godoni hariha'omo Godoni vaji aachi'a 'ekahuna.

Porura Karesia Ora Vwihaniajina

'Enavo nú nitama Godi pahene pakavari veijaho nú mwe'a ikehuni godi ira'ati jihipuni hari pwea rene hijara. 'Enaka'ivo ja iviamaa roe Godi hena kavu'e vu ika'ina'e 'warahuna Godiho ja hena kimu kaivo irakijihuna'e ja kú'o 'unama va'e uneunecha maa pa'ana ka'ene sisei jihipuna'a va'o 'ee ijihipuni pwea kú'o 'unama rehuna ura renao? 10 Ja vea masapa juara 'ee vea vutua kwinu kwino puni veijihi hine akuma 'ararihiu. 11 Na jonijihuna'e juvu. 'Ene nara kaukara ka'ene jonijihuna'e vejujaho maa pa'ana vejuta'e roe renu. 12 Vwehu nune na ja jarirame 'waravukúne ro naa'ina'e re'avara. Ijihuni maijaho na varapa tamanijaho niare'i kaivo roe jaa'ina'e rejuta. 'Ene ja na maraku'a pasise'i 'ahiara. 13 'Enakaivo ja nihena kivaja'ina'e na vu'a amura ka'ene najahujaho haha vaja atami 'uniri'eme 'waravuta. 14 'Ene nuni haha vaji atamijaho jonuna'a ahija renana vo ja na papataarorihare 'ee pasenamana kaivo ja na areri Godi oni 'ona oji'ina 'ekau ja'ina'e apeniara 'ee Jesu Kerisora Ori roakame ape'ava ja'ina'e apeniara. 15 Ja marako merajiha paranajaho ichihune? Na ijá roju Ja areri ija'ina vehuna re'ipisa joni niakuha jahene vajiha'a. 16 Na nimai ijí rone 'waravu jihuna'e na ivi'a joni naka rejuta raka? 17 Ira'ata najahi'inijija pu ura rena para'eju'e ja saravu. 'Enakaivo pu mamaa'e ve'irono sarahuna pana kaivo pu ja tanu'urihe ja nuna paro'avarono avaju. 'Ejakame ja puni ura ija'ina'e ve'avarono avaju. 18 'Enakaivo mamaijaho na'ia mapoka'e ura rena para'eje kaukara ve'avara. 'Ene nara ijine ja pu'úmo hi'eje vehunaru pana vo na'ia mapoka'e ve'avara. 19 Sesahu nune na kú'o hejujaho hariha nahe'irono haha ka'ene hejuja'ina'e heju. 'E'eje Kerisoho joni vaja areri rena parahuna. 20 'Enakaivo na ura ja pu'úmo ijí hihuna ura reniu. 'Ene jara ichá'ina ka'ene hine 'ee vejuji hejujaho na ira ichá'ina'e 'warahunijaho puruva retiu.

Heka'o Sera Puni Mina Veji'i 'Warumajina

21 Ijinakúne ja ea ka'ene Varapa Tamanahuni hari hihuna ura renaujija 'wariva hejuma. Ja Varapa Tamani jihuni ira hene vejura raka? 22 Ijihuni maijaho Godi oni ira vaji ija'ina'e vejara. Eparahamiho harihwaha no'ohe'ina'omo pina pwea naparijara nahejume 'ee pina huni napara maijara nahenana. 23 'Ene pwea naparijara hariha ka'ene nahenajaho haha huni ura ijino nahenana kaivo napara maijara nahenajaho 'unama ka'ene nahama 'warama jihunijino nahenana. 24 Ikeja areri haa sa'ina. Ijihuni maijaho napara ikeja tamana no'o ka'ene 'wame nimaa vetiaravajina. 'Ene pina huri'a ka'ene Sainai rena roe sisemaa ka'ene nahenajaho pu pwearu rehuna'e nahenana'omo ijaho Hekana. 25 'Ena'omo ikehuni maijaho Hekaho Sainai huri'a ka'ene Arepia vaji naminujina 'ee ijaho areri Jerusaremi ka'ene iviamaa namujina. 'Ena'omo pu sesahwa pu'úmo pwea rena hiju. 26 'Enakaivo Seraho Jerusaremi ka'ene ichutoi namujina. 'Ena'omo hu varapa huni hara pahinu. Hu núni oha. 27 'Ena'omo Godi oni ira vaji ija'ina'e vejara.

Napara ka'ene amuja paveji'inijija temarasaha. 'Ene ja hariha panahene haha hejujihuna'e mwasiriha. Ijihuni maijaho napara ka'ene temuka apeji'ini jihuni sesamaijija mapoka kaivo parua rukini jihunijaho mapoka pana 'úmana.
28 'Ena'omo vwehu núne ja Aisiki vare'ina ka'ene nahama 'waramani sesamaijihina. 29 'Enakaivo vea kajino hariha ka'ene haha huni 'unamijino nahejajara Godoni 'Avenijara 'wara'eme nahejajaho sise'i 'ahaa rurahana. 'Ena'omo iviamaa ija'ina'e renu. 30 'Enaka'ivo Godoni irijaho ichá'ina'e 'waramane? Ika'ina'e 'waramana. Napara ka'ene pweijaho no'o hariahe'i irechamie va'ava. Ijihuni maijaho pweijihuni harihijaho hariha pina ka'ene napara nimai jihuni aachijija pa'ekahuna 'wamana. 31 'Ena'omo vwehu nune nú napara ka'ene pweijihuni sesamaa pana kaivo napara ka'ene nimai jihuni sesamaa.

Copyright information for `MCQ