Galatians 5

Matauhuniji 'Ajohi'i 'Avena Vaji Ohunijina

Nú 'ahijaho unenu'a 'ahopuni harura hara pahihuni jihuna'e Kerisoho nú venume hanasina'e rejara. 'Enakúne majamano kisina'e rene namina va'avara kaivo kú'o pwea rene harura hari hijuja'ina'e pare'avara. Heha! Na Porura ja 'waravu. Ja sisa 'uhua'avajaho Kerisoho jonuna'a maa pa'ana'e rehuna. Na kú'o 'waravu. Ea irara sisa 'uhuujaho hu tamana maho'o 'ararihihuni harura hari hinu. 'Enakaivo ja tamanijara venae arira rehuna'e sara'avajaho ja maiji vwihaniujaho ja niarihume paranana. 'Ene Kerisoho jonuna'a 'uhuusahana. Ijihuni maijaho nú 'Avena vaja 'ee nimairoa vajijino ariramaiji nimaa roji'i 'ajaha hiju. Ijihuni maijaho Jesu Keriso oni vajijaho sisa 'uhuahi'ina ho pa'uhuahi'inijaho natohwa pana kaivo nimaa rone oja 'ekaravujara natohwijahuna. Ja nimamaa'e vejara vo irara tanu'urihu'e nimaijaho pavejo? Ike iraka ka'ene venau'e ja panimaa vejujaho Godi ka'ene ja 'umena jihuna'i rena rohuna pana. 'Enaka'ivo isitia ma'u'ua vo ijara veju'e harava emarena 'urinuna. 10 'Ene na Natohwi jihuni vaji nimaa vetiujaho ja vwiha 'aho'a karaa ani pa'ekahuna. 'Enakaivo ea ka'ene joni vwiha veju'e puruva retiujaho hu ea irara avamajaho hu mai'o huni eha apehuna. 11 'Enakaivo vwehu nune na sisa 'uhuahuji rone majaa najahujaho irakijihuna'e Jua na majaa ruariho? Ija'ina'e re'amajaho korosi jihuni vu'a ka'ene rone 'wavujaho areve parahuna. 12 Maijaho ea ka'ene ja ruarahujija sisa 'ee maiji'i maho'o 'uhuahe paare'ipisa mamaa veja'a. 13 Vwehu nune ijihuni maijaho ja unenu'u 'ahopuni harura hari pahihuni jihuna'e iji pijihana. 'Enakúne hanasina ka'ene jara apejujaho paveje hahijihuni ura ijaho pave'avara. 'Enakaivo oja 'ekaravuri vajijino ni'ajaravara. 14 Ijihuni maijaho varapa mapokijaho roe ira kwinu'wi ikehuni vaji ahume 'waramana. Ja joni haha oja mihuja'ina'e ea ka'ene joni rori hijujija oja mi'avara. 15 'Enakaivo ja kari mwatume iki mwatume 'ee pija'o'aravi'i hi'avajaho hami 'ajo'aravara vejuro'i ja maho'o i'isúmahe pa'are'ejakúne oja ma'ara'avara.

Godoni 'Avena 'Ee Emahuni Karaijina

16 'Ene na ijá 'iavu 'Avena vaji hina onareje hahijihuni ura ijija pave'avara. 17 Ijihuni maijaho hahijihuni ura ijija 'Aveni jihuni ura iji'o ninakaramuna 'ee 'Aveni jihuni ura iji'o hahijihuni ura kwino parena namuna. 'Ene pu no'o ninakaravu jihuna'e ja iraka ka'ene ura renaujija pavejura. 18 'Enakaivo ja 'Avenijara uranie va'amajaho ja tamana huni harura hara pahiju. 19 'Ena'omo hahijara ura reju'e mi'imi'imujaho ikena. 'Uasa vejujine hurecharavujine 'ee hahijara itumujihi vejujina. 20 'Ene godi ira'ata'e oja mihura 'ee masiharame 'ee sena viti'arame 'ee ura'arame ea 'ahopuni ruha ho kukua kime ajiname 'ee matatasu vene 'ee rana'arame 'ee ahaarame 'ee ituha 'oi'oi remaravura. 21 'Ene itunume 'ee toa sisea ine nanamie 'ee ruasarame 'ee uneunecha ika'ina ka'ene na ni'waravu ja'ina'e 'waravu. Ea ka'ene uneunecha sisea ikihi vejujija Godoni ara ka'ene Hura Kinia'e rena hinuni kwaa ijaho areri pavahuna. 22 'Enakaivo 'Aveni jihuni 'inijija ikena. Oja 'ekaravujine 'ee mari'uvujine matauma hijujine 'ee chochumano hijujine 'ee swasina rejujine 'ee mamaa vejujine 'ee paucha'asahi'i vena ihajinanavujina. 23 Vivinui hiji'ine 'ee 'ajo'aravujine uneunecha ika'inijija varapa pa'ana. 24 'Ena'omo iviamaa ea ka'ene Kerisouna'e rejajija pu hahijara itumuna 'ee ura rena paranujija nikorosia 'ahi 'aniara. 25 'Ene nú Godoni 'Avena vaji hijura re'avajaho roe ijí Godoni 'Avena vaja kajino 'urahoja. 26 'Enakúne roe nú pakehi kehi one 'ee ea sivia 'waravujija areme 'ee ea 'ahopuni ruha 'eka ka'irono itunavujija areva.

Copyright information for `MCQ