Luke 1

Vu'a Anejijihina

Ea ni'ina Tiapirasi ese. Ea mapoka'e uneunecha mapoka ka'ene núni vajakino nimaa renajaho heha 'ahi nivejara. Nú raka ka'ene pu 'waravaji pu heha 'ahi vejare 'ee raka ka'ene nitama aneji ea 'ahopo puni nii ki'eme rejaji 'waravara'omo pu heha 'ahi vejare 'ee raka ka'ene vu'a 'waravi'inijipo 'waravaji pu heha 'ahi vena apena roara. Na vwihajujaho mamaijaho na heha 'ahi uneunecha iraka ka'ene kahi aneji rene vena apene roaji ve'ipisana ronare'e veju. Ijihuni maijaho ijí iraka nimaa ka'ene rejajija na hami hami kime hejuta. Na ike vu'akaho ona'e vejujihuni maijaho pu raka maa ka'ene a najahaji he parahuni jihuna'e veju.

Joni Papitisita Nahehuna Nahama 'Waravajina

Vea ka'ene Herotira Jutia opuni kinia renani veijino pirisitia pina Jakaraiasi 'wavujaho hu Apaijara pirisitia ka'ene renaja'ina'e renana. 'Enakaivo huni naparijaho Eroni oni amuja. Huni ihijaho Irisapetina. Pu Godoni una'i niho'o arira 'urahe ojure 'ee Natohwi jihuni tamanijara 'waramu ja'ina'e ojura. Pu no'o amuja pa'ana. Ijihuni maijaho Irisapetiho amuja paveji'ina'e renana 'ee pu no'o ni ema paranaha'e rejara. Na'ii pini Jakaraiasi huni ehi pu'úmo kaukara vehuni vei rejume pirisitiepo Godoni una'i vejuja'ina'e venana. Pirisitia puni tamana'omo pu pipia vene hu iji pijaha jihuna'e hu Temiporu vaji va'e Natohwi jihuni inisenisia jaana. 10 Vea ka'ene inisenisi jaari veijaho ea mapoka ka'ene samai hijajija hine siporua 'ojara. 11 'E'eme Natohwi jihuni 'ona oji'ina huni roe inisenisia jauri 'aijua rori mana'inija'i naminana. 12 Vea ka'ene Jakaraiasi hua kamajaho niho'o tea juma paranana. 13 'Enakaivo 'ona oji'ina kajara ijá 'wama Jakaraiasi tea junamujaho arema. Godiho oni siporua henana'omo oni napara Irisapetiho oni hariha nahehuna. 'Enajihuna'e a huni iha Joni 'i'amana 'wamana. 14 Vea ka'ene hu nahe'amajaho a niho'o teamaname mari'uhuna 'ee ea mapoka teamanahuna. 15 Hu niho'o Godoni rori ea ni'ima'ura mavarasa'ina'e 'urihuna. Hu niho'o 'wainia 'ee toa kikisina paihuna. Hu nahe'avari anejijino rene Godoni 'Aveni samahe tinia apena parahuna. 16 Hura kú'o Isureri oni harihija aherama ta'arohe Godi ka'ene puni Natohwi jihuni rohuna. 17 'Enajihuna'e hura Iraija oni oja 'ee harura ijí same Huni una'i vahuna. 'Ene emahwa puni ojijija ta'arohe harihwaha 'ee ea ka'ene vuataa paheji'inijija veje ea arira maa rehuna. 'Ee ea aherame veje Natohwi jihuni 'unama amairiarahuna 'wamana. 18 'Ejume Jakaraiasira 'ona oji'ina kajaho ijá 'wama Na ikaho ichá'ina'e hena ka'ejo? Na ni emamaa 'ee nuni napara 'u'o ni paranamaa renu 'wamana. 19 'Ejume 'ona oji'inijara eha vena ijá 'wama Na Kepireruna. Na Godoni rori namijura'omo Hura ranamiume na aa'e vu'a maiu'ina mamaake 'wara'i routa. 20 'Enakúne hena! Vea ka'ene nuni vu'ijara nimaa rena roe 'e'u'amajaho nimaa re'ena kaivo a nuni vu'a panimaa ronujihuna'e a iviamaa ira pa'wara'ika'i hi'eje vea ka'ene hariha nahe'amajino ira 'warahuna. 21 'E'eme ea mapoka Jakaraiasi Temiporu vaji 'ajaha hijajaho 'aha jopatu'uma'ura re'eju'e hu iraka vene marako parou ronareja vwihajara. 22 'Enakaivo vea ka'ene hu ro'e'unajaho hu ira areri pa'waramana. 'Ejume pu marako ka'ika'i ijá 'wava Hu visoni Temiporu vaji kamare'e ijihuna'e avanu 'wavara. Hu ira pu pa'wara'ika'i ijaru 'waravi'i hinana. 23 Huni kaukara parajumakame kú'o 'unama huni sei va'ana. 24 Ijihuni túna'ijino na'ii pini huni napara Irisapetiho hari'i nena searu hi'eme masapa iropu pa'arejara. 25 'Ejume hu ijá rona Iviamai Natohwijara na túchamai ika'ina vwihaniana. Na hariha panaheju jihuna'e eriri nuni vahi'a apena va'ana ronana.

Jesu Nahehuna Nahama 'Waravajina

26 'Enakaivo ivi'a masapa iropu kwinu pa'are'eme 'ona oji'ina Kepireriho Godira ranavume Karari vaji ara natohwa ka'ene Nasaretina 'wavuji roana. 27 Hu Josapi ka'ene Teviti oni amujijara 'asúra ka'ene 'wahuni jihuni vu'a apena roana. 'Asúra kajihuni ihijaho Merina. 28 'Ejume 'ona oji'inijara huni roe ijá 'wama Esi. A maiji ani'ina'e vwihanaajina. 'Ene Natohwijaho a hu'úmuna 'wamana. 29 Hu vu'a ka'ene 'waramaji henajaho niho'o puruva rene teajuvume huni vwiha vaji ijá rona Iraki reni'amarono 'ajorime 'warimu ronana. 30 'Ejumakame 'ona oji'inijara ijá 'wama Meri tea junamujaho arema! Godiho a maiji ani'ina'e vwihanaana. 31 'Enakúne hena! A hari'i nenareje hariha nahene huni ihijaho 'ime Jesuna 'wa'amana. 32 Hu niho'o Natohwa rene 'ee Hu maho'o Ichuto Maijihuni Hariha 'wahuna. 'Ene Godi ka'ene Natohwijara Teviti oni ruhijaho Hu mahuna. 33 'Eje Hu Jekapi oni amuhi puni Natohwa'e majama rehuna 'ee Hura kwaa ara ka'ene 'ajo'amajaho niho'o majama nahuna 'wamana. 34 'Ejume Merira 'ona oji'iniji ijá 'wama Ijaho ichá'ina'e re'ena? Ijihuni maijaho na 'asúra 'wamana. 35 'Ejume 'ona oji'inijara eha vene ijá 'wama Godoni 'Aveni samahuna. 'Ee harura ka'ene maho'o Ichuto Maijihunijara raorahuna. Ijihuni hahi Hariha ka'ene arira maiji nahe'amajaho Godoni Hariha 'wahuna. 36 'Enakúne hena! Oni vwina ka'ene Irisapetiho amuja pa'ana 'wavura vo hu iviamaa niparanaha reji'i hari'i nena hi'eju'e masapa iropu kwinu pa'arenu. 37 Ijihuni maijaho unenu'u pini Godi oni una'i kisina pa'ana 'wamana. 38 'Ejume Merira ijá 'wama Na niheju. Na Natohwi jihuni pweakúne ara iraka ka'ene 'warimu ja'ina'e veje reniama 'wamana. 'E'eme ona'oji'inijaho iji'a ranama va'ana.

Merira Irisapeti Ka'i Va'ajina

39 Ijí vea kajino Meriho marako 'urine ara natohwa Juta vaji kwaa ka'ene huri'a rukiniji va'ana. 40 Hu Jakaraiasi oni sei va'e arume Irisapeti 'ajomana. 41 Vea ka'ene Merira 'ajomaji Irisapeti he'eme hariha huni tea vaja kají pipijuku'eme Godoni 'Aveni Irisapeti oni vaja ruha apenana. 42 'Ejume hu ira ajira'e ijá 'wama A napapuni vajijino niho'o merajaha paranana. 'Ee Hariha ka'ene oni hahi vaji hinujaho nimerajahana. 43 'Ú irakijihuna'e nuni Natohwi jihuni ohakaho na uvani'i roane? 44 Ike hena! A 'ajorivume na he'eme harihaka nuni tea vaji hinujaho teamavume pipijukumana. 45 Natohwijara raka ka'ene hua'e rone 'waramajara roe nimai rehuniji hu nimaa ronajihuna'e merajahana 'wamana.

Merira Godi Ta'arohe Javaa Venajina

46 'Ejume Meri ijá 'wama Nuni oja Natohwiji ta'arohu. 47 Nuni 'avenijaho Godi ka'ene na ni'ajiha jihuna'i temaranu. 48 Ijihuni maijaho huni pweijara masuani ajuarana hinajihuna'e Hu huni hura venana. Heha! Iviasi rene amuja amuja na rone merajihana 'wahuna. 49 Ijihuni maijaho Natohwijara uneunecha mapoka mama'ina nuna'e venana. 'Ene Huni ihijaho niho'o aririjina 'wavura. 50 Ijihuni maijaho amuja amuja kwinu kwinu irahipo Huni hura vejujaho Hu numirama apena rouna. 51 Hu Huni iji uneunecha mama'ina vene 'ee ea ka'ene kehi kehi oji'ini jihipuni oja vwiha veju'e ani ani va'ura. 52 Hura ea mama'ina veju'e puni ruha mama'inijija pa'arejura 'ee Hu ea ka'ene masuani hiji'inijihi 'unirame ahasirimauna. 53 Hu ea ka'ene matunavi'inijija uneunecha mamaa areri vajihuna. 'Ene ea ka'ene uneunecha ani reji'inijija irechamiu'e ija maisu va'ajivura. 54 Hu huni pwea Isureri ni'ajahuna. 'Ene Hura pu numiramuji vwiha'amarono ni'ajahuna. 55 'Ene opunúna'e Eparahamiho 'ee huni sesahwahiji 'warama ja'ina'e majama 'waramu 'wamana. 56 'Ene Meriho masapa no'opisu hinarena kú'o 'unama huni ari va'ana.

Joni Papitisita Nahejajina

57 Ivi'a Irisapetira hariha nahehuni vea roume hu hariha nahenana. 58 'Ejume huni amuja ea ka'ene huni rori hijura 'ee huni vwea vwina Natohwijara hu numimarena venaji henareja pu pu'úmo temarasahara. 59 'Enarena vea oma iropu no'opisu para'eme pu hariha kajaho sisa 'uhua'irono apena roara. 'Enareja pu omahoni iha Jakaraiasi 'i'i 'ahiume vejara. 60 'Enakaivo huni ohijara ijá 'iama Pana. Huni iha Jonina 'wa'eja 'iamana. 61 'Ejume pu hu ijá 'wava Ijaho oni vwea vwina pina iha ija'ina 'uraha 'wahuna pana 'wavara. 62 'Ejume pu huni omijaho ijaru ijá 'wava A iha irá 'ihuna ura renao? 'wavara. 63 Jakaraiasi heha 'waravume mahume hu ika'ina venamana. Huni iha Joni venana. 'Ejumakame pu ea mapoka niho'o oja hwa'usahara. 64 Ijihia kajakaro rena Jakaraia oni ira ka'ene pa'arenajaho ira 'warame 'ee Godi ta'arohana. 65 'Ejumakame ea ka'ene rora rora kají hijujija niho'o tea junama paranana. 'E'eme Jutia huri'a vaja kajaho raka ka'ene renaji 'wamapenojara. 66 Ea ka'ene ijí hejajija pira'arame ijá 'wava Sesamaakaho ichá'ina'e re'ena? Ijihuni maijaho Natohwijara Hu 'ajohau 'wavara.

Jakaraiasira Túna'i Rehuniji 'Waramajina

67 Huni oma Jakaraiasiho Godoni 'Aveni tinia apejume raka ka'ene iji'a rehunijaho ika'ina 'waramana. 68 Natohwa ka'ene Isureri opuni Godi ijí ta'aroha. Hu ehwaha'e uvanie 'ee kú'o 'unama 'imenae 'eka'i roana. 69 Huni pwea Teviti oni amuja vajijino núni Ni'ajúhi'ina Natohwa vejume 'urinana. 70 Ikaho Hura nitama iraka ka'ene Huni poropetia arimaijihi puni vaji 'waruvara. 71 Hu núni naka 'ee ea ka'ene nú kúme senavi'inijihi puni vaji ni'ajú'i roana. 72 Ijihuni maijaho Hu opunúna numirame 'ee Hura nahama 'waramaji vwihanuna. 73 Hu nimaa nimaa núni oma Eparahami nahama 'waramana. 74 'Ene Hu núni nakapuni vaji Hu nú ni'ajúhuna nahama 'warumana. 'Ejakame nú pajuhavi'i Huni kaukara vehuna. 75 'Ene Huni una'i arimaa 'ee nimaa nimaa núra hi'avari veijaho hina vena apene vahuna. 76 'Ene harihakere a poropetia ka'ene maho'o Ichuto Maijihuna 'wahuna. Ijihuni maijaho a urana va'e Natohwi jihuni 'unamiji amairiahuna. 77 A Huni ehija ka'ene Hura ni'ajihuniji najahakame puni sisea vwihane arehuniji kama hehuna. 78 Ijihuni hahi Godi ka'ene swasi ma'urijara nú numirume vea kahi ichutoi ranave rina roe hananúhuna. 79 'Ene ea ka'ene nutuvi'ini hijujija 'ee ea ka'ene nikwamasa'iro vejujihija hananihuna. 'Ene Hu núni mumora 'ajohuakame nú matauma hihuni 'unamiji vahuna 'iamana. 80 'Ejume hariha 'u'ua kajaho emarena ajime 'ee huni vwiha 'u'o emarena paranana. 'E'eme hu nechi'eru hinonu va'u iji'a amura Isureri puni una'i sama hiramana.

Copyright information for `MCQ