Luke 16

'Ajohi'ina Ka'ene Ariramaa Pa'ajina

Hu Huni tisaiporu ijá 'iama Ea pina kukua ani reji'ini ea pina apene huni monia'e 'ajo'amarono ranamana kaivo hu he'eme ea 'ahopo ijá 'wava Ea ka'ene oni monia 'ajohi'inijaho monia majikarino ato'arumu 'wavume henana. 'Enarena hu 'umejume roume ijá 'wama Vu'a ka'ene ike 'wavu'e na hejukaho nimaae? Na a ranama'iro vejukúne iviamaa va'e nuni monia ka'ene ichihichihi va'ajihuni 'unamijaho amairiu va'o apena ro najiha kavuma 'wamana. Hu ijá rona Nuni natohwijaho na'e ranami'i venuna'omo na vi ichá ve'eju ronana. Na harura pana'omo na mwe'a areri pa'uhune 'ee na va'e ea'e jarirahuna junimu. Na kaukara ranami'eje nara iraka ka'ene vehunijaho na nivwinimu. Na kaukara ranami'avajaho napuhu nupo 'ajorime puni sei aherima ajihuna. 'Enarena hu ea ka'ene huni natohwiji monia vajahunijija 'umenaume roajivara. 'Ejume ea pina apoma ijá 'wama A 'weru icharo nuni natohwa vajahane? 'wamana. Hu ijá 'wama Na 'weru mapoka mapoka (100) 'ekuta 'wamana. 'Ene hu ijá 'wama Ara moni icharo vehuni heha ijaho ikenakúne asuma hine (50) vena 'wamana. Hu ea pina apoma ijá 'wama A nuni natohwijaho icharo vajahane? 'wamana. Hu ijá 'wama Na 'witia pekia mapoka (100) 'ekuta 'wamana. 'Ejume ea ka'ene ijí kaukara 'ajohi'inijara napusa'i 'ahauma ijá 'wama Ara moni icharo vehuni heha ijaho ikenakúne asuma hine (80) vena 'wamana. Ea ka'ene kukua anesurijarahara ea ka'ene kaukara 'ajohuji kamarena ijá rona Niho'o pisivie paraju kavu ronana. 'Enarena hami vwihaha. Areri ija'ina'e ea ka'ene mwe'a ikino hijujaho 'unama ija'ina'e ea pisimiura kaivo ea ka'ene hanaji'ini hijujija ija'ina pavejura 'iamana. 'Enarena Na ja 'waravu. Monia puni 'unama ariri jihuniji napura ve'irakúne ijara ni'ajihe sisea pave'avara. Ijihuni maijaho 'unama ija'ina'e vene ni'ajihareje ara ka'ene majama hihunijino vahuna. 10 Ea irara uneunecha ma'u'umaa hami vene ihajinanamujaho hu uneunecha mama'ina 'u'o hami vene ihajinanamiuna. 'Enakaivo ea irara uneunecha ma'u'uma 'eke arira pavenujaho hu mama'ina 'u'o arira pavenuna. 11 Ijihuni hahi ja monia ka'ene 'unama sisei jihunijaho arira pa'ajo'avajaho ea irara monia ka'ene aririjaho ja vaji'ena? 12 'Ene ja uneunecha ea 'ahopunijija hamia pa'ajo'avajaho irara vu jona rehunijaho vaji'ena? 13 Pwea pina mai'o mama'ina no'ohe'i puni kaukara pavehuna. Hu ea pina oja ma'ika'i pina sehuna. 'Ee ea pina teama'i kaivo pina sehuna. Ijihuni hahi ja Godi oja mahe 'ee monia oja mahuna areria parehuna 'iamana.

Jesura Vu'a 'Aho'a Ka'ene 'Waramajina

(Matiu 11:12-13, 5:31-35; Maka 10:11-12)

14 'Ejume Parasia ijí henareja Hu apene 'ijahara. Ijihuni maijaho pu monia'e oja mihuni jihuna'e avajara. 15 'Ejume Hu pu ijá 'iama Ja emaapo ki'eju'e hami 'urahe oju kaivo Godira joni oja vaja nihe paraji'ina. Ijihuni maijaho iraka ka'ene emaapo vwihaju'e mama'ina rejujaho Godira kimujaho ijijahija niho'o sisemaa. 16 Nitama rene varapa tamana 'ee poropetiapo 'waramape rouva'o roe Jonira hinaji 'e'ujara. Vea kaji rene Godoni arijihuni vu'ijaho najahukame ea mapokakaho ijí 'unama kajino va'aru'iro piijaravu. 17 Mwe'a 'ee akúpakaho pa'arehuna kaivo Godoni ira niho'o papa'arehuna. 18 'Enajihuna'e parua ka'ene huni napara kaji ranamajara veje hu parua pina ve'amajaho pu sisea vehuna. 'Ee ea irara napara ka'ene ranavi'iniji 'wa'amajaho hu 'u'o sisea vehuna.

Uneunecha Mapoka Rukiniji'o Rasarasi Puni Vu'ijina

19 Nitama ea pina ateha niho'o mavarasa'ini same 'ee uneunecha mapoka ani re'eju'e ara mavarasa'ini 'iruma mamai iji'i hinuna. 20 'E'eju'e ea pina pivuji'ina huni iha Rasarasina 'wavujaho niho'o 'iruma pa'ana 'ee matana reji'ina'omo roe ea ka'ene 'iruma ani reji'ina kajihuni vwicha jiami 'iruma sahura ka'ene arihuji i'i 'ahau'e roe hinuna. 'E'eju'e 'uapo roe huni matana sihura. 22 'Enuva'o ea ka'ene 'iruma pa'ajaho kwavume Godoni 'ona oji'inapo apene va'e Eparahami oni rori rana'eme ea ka'ene 'iruma ani reji'inija 'u'o kwavume kwananavara. 23 Hu vena ka'ene pautarutusavi'inijino reji'i a'ama kavume Eparahami oni rori Rasarasiho hinana. 24 'Ejume hu ijá 'umena Nuni oma Eparahami na numirime Rasarasi ranave roe ija toi apúsame nuni mitara 'ahi ranave ohoa ka'ene renujaho paha renama. Ijihuni maijaho na niho'o ni'ima'ura hiani'eju'e vena rirakino hijukúne 'umenana. 25 'Enakaivo Eparahamira ijá 'wama Harihe a mwe'i hinajaho vwiha'amana. A mari'uvi'i hinana. 'Ene uneunecha mamaa 'ekana kaivo Rasarasiho sisea'e piunama jihuna'e hu iviamaa mamaa piuname teama'eju'e a haha ni'ima'ura hianamu. 26 'Ene nú areri ea ka'ene ika'ahuni hijukija kara'ahuna pavu'e 'ee karahuni hijujija ika'ahuna parohuna. Ijihuni maijaho raraha natohwa ronu ronu rejara'omo ijí apúsama kara'i ajihuna niho'o areria pana 'wamana. 27 'Ejume ea ka'ene uneunecha mapoka ani reji'inijara ijá 'wama Oma nune na jarirame 'waravukúne Rasirasiho ranave nuni omijihuni sei va'amana. Ijihuni maijaho popu nuna iropu hijukúne 'warave pu ike ara ka'ene haha hianavi'inakaho ea pina paro'amana 'wamana. 29 Eparahamira ijá 'wama Popuana Mosisiho 'ee poropeti 'waravi'inijija hijukúne ijipo 'warave heja 'wamana. 30 'Ejume hu ijá 'wama Pana. Nuni oma Eparahami ijaho mai'o areri pareni'ena kaivo ei pini kwamani 'urina va'e 'wara'ipisa pu areri puni sisea ta'aroha'a 'wamana. 31 Pu areri Mosisiho 'ee poropeti panimaa rojuji'huna'e ei pini kwamani 'urina va'e 'waramajaho pu panimaa rohuna 'wamana.

Copyright information for `MCQ