Luke 24

Jesura Kú'o 'Urinajina

(Matiu 28:1-10; Maka 16:1-8; Joni 20:1-10)

Hura natohwi sú'usú'u napara kajija senisia ka'ene pura amairia irechavajaho 'eke muna ara kajino roara. Pu vai'i kavajaho muna ka'ene vwicha'e kunavajaho tahuma apene ruva'ara kavara. 'Enakaivo pu va'e vaji aruvajaho Jesu ka'ene Natohwi jihuni haha pakavara. Pu puruva renaume ijá nami'eme ni'aha kwino ea no'ohe'i ateha sajasa'imaa savi'ina puni nina kajino namijara. Napara kajija niho'o tea juna'eme nuana vetiume parua kajipo ijá 'iava Ja ichá vene ea ka'ene kwamasahi'ina kihipuni vaji ea ka'ene mai'o hiji'inijaho savo? Hu ikaho pana kaivo Hu ni'urinana. Hu Karari hiji'i ja 'waramajaho ja pavwihajo? Hu ja ijá 'iamane Ema Puni Harihijaho apene ea sisea veji'ina'e mihe icha 'ahi 'anaa kwama namuva'o na'ia no'opisu pa'are'eje kú'o 'urihuna 'iamajaho ja pavwihajo? 'iavara. 'Ejume napara kajija iji'a Huni vu'a vwihajara. 'Ene eucha are'i 'unama va'e ea iropu ropu kwinu 'ee ea 'aho'iji 'u'o uneunecha mapoka kajaho ijano 'waravara. 10 Napara kajija Meri Matarini ho Joana ho Meri ka'ene Jemisi oni ohijaho 'ee napara 'aho'a ka'ene pu pu'úmo 'urahe ojujipo apasorua uneunechakaho 'waravara. 11 'Enakaivo vu'a ka'ene pura 'wara'avajaho mavumaa sa'ina rejume pu panimaa rojara. 12 'Enarena Pitara 'urine ninuma va'e muna ari 'e'une aruhi kamajaho ateharu navume kimana. 'Enarena hu 'uname huni ari vai'i uné raki renana ronarena vwihaji'i va'ana.

Imeasi Va'ajina

(Maka 16:12-13)

13 Vea nikwinu'ina kajino ea no'ohe'i ara iha Emeasi va'ara. Ara kajaho Jerusaremi rena va'ujaho kwaa jora'omo (11 kiromita) 14 pu vai'i uneunecha mapoka ka'ene renaji 'wama apena va'ara. 15 Pu ijí 'wavi'i va'eme Jesuho roarena pu pu'úmo va'ana. 16 'Ejume puni nia nuhiume pu kavara kaivo pahena pakavara. 17 'Enarena Jesura pu ijá 'iama Ja no'o jajasumano vu'a iraka'e 'wavi'i va'ajivo? 'iavume pu no'o nina kaja'a ajuarasa'eme namijara. 18 'Ejume ea iha Kariopasira eha vene Hu ijá 'wama 'Ú A Asumano ikaho Jerusaremi ura vene roana'omo uneka ka'ene vea ikino rejajaho A pahenane? 'wamana. 19 'Ejume Hu pu ijá 'iama 'Ú uné raki renane? 'iamana. 'Ejume pu Hu ijá 'wava Uneka ka'ene Jesuka Nasareti ora'e renajaho A vi henane? Ea ikaho poropetia 'ee ea uneunecha ani'ina mapoka'e mama'ina vene 'ee Godiho 'ee ea mapoka'e ikihipuni una'i vu'a mama'ina 'waramuna. 20 'Enakaivo núni pirisitia mama'ina 'ee ea 'ajoha'ina mama'inijipo apene 'anaa kwa'amarono mihume pu Hu icha 'ahi 'anaume kwamana. 21 'Ejume nú vwihajajaho Hu roe Isureri ora 'imena 'eka'i 'ahaume roana. 'Enakaivo ijiru pana vo uneunechakipo rejajaho iviasi na'i no'opisu pa'arenu. 22 'Enakaivo napara 'aho'a ka'ene nú pu'úmo ahuma oji'inijipo sú'o euchi va'e roe tatatúara. 23 Pu Huni haha pakamareja roe ijá 'úva Pu 'ona oji'ina visoni vaji kivume pu Hu mai'o hinu 'úvara 'wavara. 24 'Ejume ea 'aho'a ka'ene nú pu'úmo ahuma hijajipo eucha kaji va'ara kaivo niareri napapo 'waruva ja'ina'e Hu pakavara 'wavara. 25 'Ejume Hu pu ijá 'iama Ea ka'ene niho'o pavwihaji'inakije uneunecha mapoka ka'ene poropetiepo 'waravajaho ja marako'a panimaa rojara. 26 Kerisoho uneunecha mapoka sisea Huni haha 'ahi marako rejakama'e iji'a Huni ara ka'ene hanaji'iniji vahuna 'iamana. 27 'Enarena Mosisi oni aneja rene roe poropetia maho'o puni vaji Godoni irijara Hua'e rone 'waramaji maho'o najahana. 28 Puni ara ka'ene pu va'iro va'ajaho usehuna nituranana. 'Ejume Jesuho Hu maihename va'i 'ahaume venana. 29 'Enakaivo pu ijá 'wava Vea nusirevu'e vea nipa'arenukúne nú pu'úmo hina 'wavara. 'Ejume Hu pu pu'úmo va'e hinana. 30 'Ejumakame Hu pu pu'úmo ahuma 'iruma'e i'i 'ahaume puretia apene siporua 'one teimani 'wamarena tuama vajihana. 31 'Ejume puni nia ka'ene nuhiajaho jaraume pu Hu kavara kaivo Hu puni rora kajano va'ume pakama arevara. 32 'Enareja pu hine pira'arame ijá 'wava Hu 'unamutoi 'warume 'ee Godoni ira vaji namuji naju'eju'e núni oja vaja hianuma parajara 'wavara. 33 'Enarena pu vea muka kajino 'urine Jerusaremi ea iropu ropu kwinu 'ee 'aho'a ka'ene pu pu'úmo ahuma hijujino 'unama va'e ijá 'iava 34 Natohwijaho nimaa nimaa 'urinana'omo Saimani oni una'i samaahiravume

Noinkamana 'iavara.
35 'Enarena ea no'ohe'i kajipo iraka ka'ene 'unamutoi vene 'ee pu ichá'ina'e Jesu marako kavajaho pahena pakavara kaivo Hu puretia tua'eme ni'aha kwinu pu Hu kavaji rone 'waravara.

Jesura Huni Tisaiporu Puni Una'i Samahiramajina

(Matiu 28:16-20; Maka 16:14-18; Joni 20:19-23; Akisi 1:6-8)

36 Pu hine ijí 'wara'eme ni'aha kwino Jesuho puni rira kajino naminana. 37 Pu niho'o tea juna'eme ijá roja Pu 'avena kavu rojara. 38 'Enarena Hu pu ijá 'iama Ja iraka'e vene puruva retio? 'Ee ja ichá vene joni oja vaja ma'uako panimaa rojo? 39 Nuni ija momorakake piuhiha kiha! Naranakúne! 'Ene haha 'unirime kiha. Ijihuni maijaho 'avena haha 'ee ata areri Nuna ika'ina pana 'iamana. 40 Hu ija'ina 'waramarena Huni ija mumora najahana. 41 'Enakaivo pu hina teamanama parajara kaivo pu ma'uako panimaa ronareja hine vwihajara. 'Ejume Jesu aporame ijá 'iama 'Ú ja unenu'u 'aho'a ihuna vi navo 'iamana. 42 'Ejume pu kija reji'ina mahume Hu apene puni una'a kajino inana. 44 'Enarena Hu pu ijá 'iama Uneunecha ikehija Na ja pu'úmo hijujino 'waravuta. Uneunecha ka'ene Mosisiho poropetiapo 'ee Samusi vaji Na rona 'waravajara nimaa iviamaa renu 'iamana. 45 'Enarena Hu puni vwiha ijija Godi oni iriji hami he'avarono jaraana. 46 'Ejume Hu pu ijá 'iama Ikaho iraka ka'ene Godoni ira vaji vejajina Keriso sise'i 'ahae 'anae kwamareja na'ia no'opiso pa'are'eje kú'o 'urihuna. 47 'Ene Huni iha 'ahiji Jerusaremi rene va'e eaka mapoka ka'ene kwaaka mapokakino hijujija najahe pu puni sisea vwihane temukave aremamaa arevakame Godira puni sisea vwihanie arehuna. 48 'Enajihuna'e ja uneunecha mapokakipo rejajija ja nihene kivara. 49 Heha! Na Nuni Omijara raka ka'ene nahama ja 'waramajaho Nara ranave joni ro'enakúne ja ara natohwa ikino hi'eje Godoni harura kahino akúpa 'ahi rene roe ja sama'amana 'iamana.

Jesura 'Urina Akúpa 'Ahi Va'ajina

(Maka 16:19-20; Akisi 1:9-11)

50 'Enarena Hu aherame ara kajaho are'i kaivo va'e Petani rori hi'eme ija ahasirime merajihana. 51 Hu pu hine merajiharena irechamie va'ana. 52 'Ejume pu 'uname Jerusaremi niho'o teamanama para'eme mari'uvi'i roareja na'ia mapoka kajaho Temiporu vaji hine majamano Godi teamani 'wama ta'arohi'i hijura.

Copyright information for `MCQ