Luke 8

Napara Ka'ene Jesui Pu'úmo Va'ajina

Na'ii pini Hu ara mama'ina 'ee ara ma'u'umaa kajino 'urahe oji'i Godoni vu'a maa maiu'ina ka'ene Godoni ariji huni vu'a najahana. Huni tisaiporu iropu ropu no'o pu pu'úmo va'ara. Napara 'aho'a ka'ene 'avena sisea ajimahi'ina 'ee 'aho'a puni atama vejume marani'inijihi pu'úmo va'ara. Meri ka'ene Matarinina 'wavujihuni haha 'aha kajino 'avena sisea iropu no'o hi'eme siomahana. 'Ene Chusa ka'ene Heroti oni kukua 'ajohi'ini jihuni napara Joanaho 'ee Susana 'ee napara 'aho'a kajipuhipo puni monijikano pu ni'ajihara.

'Ina 'Oji'inijihuni Haa

(Matiu 13:1-9; Maka 4:1-9)

Ea mapoka ara 'oi'oi vaji roe Hu ka'i 'ahiu'e roajivume Hu haa ika'ina'e 'waramana. Ea pina huni 'ina 'o'i 'ahaume va'ana. Hu 'ina kajaho ato'aruvume 'aho'a arihe 'unamutoi navume emaapo tautiume 'ee 'aho'a ukapo roe ijara. 'Aho'a muna 'ahi arihara 'ee pu riama ajivara kaivo sirua pa'ajihuna'e sarasahara. 'Aho'a ija sisea oma rukina vaji arihe riavara kaivo ija kajara 'urine raurihume pamarasahara. 'Enakaivo 'aho'a mwe'a mavarasa'ina 'ahi arihe riame maa mapoka mapoka'e (100) rejara 'iamana. 'Ee Hu ijá 'iama ja ataa rukina re'avajaho heha 'iamana.

Haa Kajihuni Maijina

(Matiu 13:10-17; Maka 4:10-12)

'Ejume Huni tisaiporu apoma ijá 'wava Ike haa ikehuni maijaho iraka'e rona 'warumo? 'wavara. 10 'Ejume Hu ijá 'iama Godoni ira ka'ene vaji namujaho ja samaumai 'waravu'e ja hena kavu kaivo ea 'aho'akija hai 'waravu'e ijihuni maijaho pahena pakavu.

Jesura 'Ina Oji'inijihuni Haiji Nahama 'Waramajina

(Matiu 13:18-23; Maka 4:13-20)

11 Ike haa ikehuni maijaho ikena. 'Inijaho Godoni Irakena. 12 'Ina ka'ene 'unamutoi arihajihuni maijaho ea pu Godoni ira heju kaivo 'avena siseijara roare'e ijí vu'a kajaho oja vaja puna kajino 'etujiha va'una. Vejuro'i pu

Noinnimaa roje Godira pu ni'aji'amarono avanuna.
13 'Ina ka'ene muna 'ahi arihajihuni maijaho ea Godoni ira hene teamana'eju'e apejura kaivo ira kajaho mai'o hamia oja vaja puna chinuma pasamuna. Pu ma'uako nimaa rojura kaivo vea ka'ene sisei puni haha 'ahi renujaho pu marako rana va'ura. 14 'Ina ka'ene ija sisea oma rukina vaji arihajihuni maijaho ea Godoni ira hejura kaivo puni temuka vwihane 'ee uneunecha 'ee monia'e vwihane 'ee temarijara rareju'e pataarohura. 'Eju'e puni 'ina renuna vo mai'o patuvura. 15 'Ina ka'ene mwe'a mamai arihajihuni maijaho ea Godoni ira hene puni oja vaji irechavukame pu hina vena apena va'u va'u'e va'e pu 'ina niho'o maa rejura.

Naheha Si'uara Hari Namajina

(Maka 4:21-25)

16 Ea mai'o ira 'ene si'uara vaji paapúrinanavura 'aho puni suha harijino ranavu'e namuna kaivo Hu ira kajaho ira'e irechavu'e navujino navukame pu ea ijino kavi'i roajivura. 17 'Ene unenu'u pina apúrinanavu'e namujaho roe samaahirahuna 'ee unenu'u pini hemi nave pakahuna kaivo mapoka kajija samaahirave kihuna. 18 'Enakúne hami heha! Ea irara mapoka rukina'e re'amajaho kú'o mapoka huri vajahuna. 'Enakaivo ea irara pa'ana'e re'amajaho huna ka'ene ma'uako navujaho 'etujahuna 'ee kukua 'aho'a 'eka'iro vwihaji'i hi'amajaho 'etujahuna.

Jesuni Oha 'Ee 'U'uhija

(Matiu 12:46-50; Maka 3:31-35)

19 Huni oha 'ee 'u'uhwaha roara ka'i ea niho'o ani rejumakame pu paroe Huni roara. 20 Ea 'ahopo Hu ijá 'wava Ohuna 'ee 'u'uhuana kameho ma'ahi Aa'e ka'irono 'úvi'i namiju 'wavara. 21 Hu eha vene ijá 'iama Nuni oha 'ee

Noin'u'uhija ea ka'ene Godoni ira hene veji'inijina 'iamana.

Jesura Puura'e 'Waravume Ajuaranajina

(Matiu 8:23-27; Maka 4:35-41)

22 Na'ii pini Hu Huni tisaiporu pu'úmo sisima 'ahi ajima ijá 'iama Roe ja pu'úmo kara'ahuni va'a 'iavume pu aneja vene va'ara. 23 Pu va'aji'eme Hu ariha va'e sisima vaji nenana. 'E'eme puura natohwa ijí soha 'aha kajino hiramarena soha kajara ameurahe sisima vaji ariharena itu'o'iro 'ahaume vejumakame pu niho'o vahuna areri parenana. 24 'Ejume pu 'urina va'e Hu sae ijá 'wava Natohwe! Natohwe! Nú nikwamasa'i veju 'wavara. 'Ejume Hu 'urine puura kajaho 'urarahume areme 'ee soha ka'ene amenajaho pa'are'eme soha kajaho niho'o mavarasa renana. 25 'Enarena Hu pu ijá 'iama 'Ú jara nimaa rojujaho ichine 'iamana kaivo pu niho'o oja hwa'usahe tea junavume aposarame ijá 'wava 'Ú ikaho Ea irane? Hu puura 'ee soha 'u'o 'waravu'e Huni ira hene veju 'wavara.

Jesura Ea 'Avena Siseapo Rosavaji Siomahana

(Matiu 8:28-34; Maka 5:1-20)

26 'Enareja pu va'e Kekasinisi puni kwai Karari ropuna'i va'ara. 27 Hu karino amari varihajaho ara kaji'ura ea pina 'avena sisei 'aha jora ajivi'ina piunamana. Hu vwiha pa'a 'uraha one 'ee ara pahinuna vo va'e euchi hinonuna. 28 'Ena'omo vea ka'ene Jesu kamajaho hu 'ona arihe mwe'a 'ahi Huni una'i ninavi'i ira ajira ijá 'umena Jesu ka'ene Godi niho'o Natohwijihuni Harihakera A na ichá'ina 'ahi'iro ura renao? Na A jariravukúne paruarihe sise'i 'ahi'amana 'umenana. 29 Hu ija'ina 'warama jihuni maijaho Jesura 'avena sisea ka'ene huni haha vaji hijajaho 'ejahie ariha 'iamana. Na'ia mapoka'e ea kajaho jihevu'ukame ea 'aho'a hu apene kamome ranavu'e namuna kaivo hu 'urine senia kajaho turame irecha'ika'i nechi'i va'una. 30 Jesura apoma ijá 'wama Oni iha irane 'wavume hu ijá 'wama Nuni iha Mapoka 'wamana. Ijihuni maijaho 'avena sisea mapoka'e hua ajivara. 31 Ijí 'avena sisea kajipo Hu jarimaa ijá 'wava Paato'arumu'e nú ma'oa vaji va'avara 'wavara. 32 Maha mapoka'e puni rori hareha 'aha kajino 'iruma ine 'urahojara'omo ijí 'avena sisea kajipo Hu jarimaa ijá 'wava Nú irechamúe kare maha karehi súmaha 'wavara. 'Ejume Hu pu irechamiume va'ara. 33 'Ejume 'avena sisea kajija useme maha kajihipuni vaji va'ume maha kajija hareha 'aha kajino ninukujaha va'e rarahi arihe úi imwasamiume kwamasahara. 34 Ea ka'ene ijí maha 'ajoha hija kajipo uneka ka'ene rena kaji kamareja va'ajime ea ka'ene ari hijujija 'warame 'ee ea ka'ene ijino rori hinojajija 'u'o 'waravara. 35 Ea mapoka Hura raka ka'ene vejume renaji ka'i 'ahiume va'ajivara. 'Ejume pu roi'i kavu'e ea ka'ene 'avena sisei súmahi'inaka Jesura vejume maranajaho Jesuni mumora rora kajino vwiha irame asuma mavarasa'ina'e hijume pu ijí kavajihuna'e tea junamana. 36 Ea ka'ene 'avena sisei ajivi'iniji vejume maranaji kavajipo ea mapokijija 'waravara. 37 Kekasinisi ora ea mapoka kajija tea junavume Hu va'amarono 'waravara. 'Ejume Hu sisima 'ahi ajima toa ropuna'i 'unama va'ana. 38 'Ejume ea ka'ene Hu vejume 'avena sisea usevajara Hu hu'úmo va'i 'ahaume jarima ijá 'wama 'Warive na A hu'úmo vu'uma 'wamana kaivo Jesura hu raname ijá 'wama 39 'Unama ari va'e Godira iraka ka'ene a vetaaji ea 'wara'amana 'wamana. 'Ejume ea kajaho ara mama'ina mapoka vaja kajino va'e Jesura iraka ka'ene hua'e vetiajaho 'waramana.

Jairasi Oni 'Apaja 'Ee Napari Jesuni Ateha 'Unamajina

(Matiu 9:18-26; Maka 5:21-43)

40 'E'eme Jesuho toa 'ona kara'i va 'e'ujume ea mapoka ka'ene ijí Hua'e 'ajaha hijajipo Hu 'ajovara. 41 'E'eme heha! Ea pina Jairasina 'wavura. Hu Sinakoku 'ajohi'ina natohwa'omo roe ijí 'e'unana. 'Ene hu mwe'i 'ona arihe Jesuni mumora rori navi'i jarime ijá 'wama Nuni 'apaja juara huni iropu ropu no'ona vo kwa'i venukúne nuni sei roe veje maranama 'wamana. Jesuho va'eju'e ea mapoka Huni rora kajaho ani rejara. 43 'E'eme napara pina juara iropu ropu no'o 'ai vurajukame hu va'e juketa puni na'ia mapoka amairiahura kaivo hu pamaranuna. Hu monia mapoka 'úsia 'imenuna kaivo venahujaho pamaranuna. 44 Hu ea vaja kajino Huni túna'i rou va'o Huni ateha 'unavume huni 'aa ka'ene vuramajaho ni'aha kwino pa'arenana. 45 Jesura ijá 'iama Ea irara Na vwenimane? 'iavume pu ea mapoka'e hevara. 'Ejume Pitara ijá 'wama Natohwe ea mapoka Oni rori ani rejujihuna'e puruva renu 'wamana. 46 'Enakaivo Jesura ijá 'iama Oo ea pini Na vwenimana. Ijihuni maijaho Nuni harura va 'e'unu 'iamana. 47 Napara kajaho nikavuma kimareme tatovi'i roe Jesuni una'i ariha ninamana. 'Ejume ijí ea rira kajino nahame irakijihuna'e Hu vwevumakame ichá'ina'e ni'aha kwinu maranajaho nahama 'waramana. 48 'Ejume Hu ijá 'wama Nuni 'apaje ara nimaa ronujara vejume maranaana. 'Enakúne matauma va'a 'wamana. 49 Hu ijí hine 'wara'eme ea pina Sinakoku 'ajohi'ini jihuni sei rene ro ijá 'wama A hine Najuhi'ina apene iha vetiuna arema. Oni 'apaja nikwamanakúna 'wamana. 50 'Enakaivo Jesura ijí henarena Jairasi ijá 'wama Jumujaho are'i kaivo nimaa rojakame oni 'apaja mara'ena 'wamana. 51 Pu va ijí usemareja Hu sea vaji va'i 'ahaume ea 'aho'a tanurihume pu vaja pava'ara ka'i Pita ho Jemisi ho Joni ho 'ee huni oma 'ee oaha ijano 'waravume vaji va'ara. 52 Ea ka'ene ijino hijajaho chora hiji'i niramaruvara. 'Ejume Jesura ea kajija ijá 'iama Niramaruvujaho areha. Napaiseakaho mai'o pakwamana kaivo manenukúna 'iamana. 53 Pu Hu niho'o apena 'ijahara. Ijihuni maijaho pu hena kavajaho hu nikwama jihuna'e pu Hu 'ijahara. 54 'Enakaivo Jesura Huni ija kajino 'unama apene 'uriji'i ijá 'umena Napaisekera 'urina 'umenana. 55 Huni 'avena kú'o 'unama roume hu ni'aha kwino 'urijume Jesura ijá 'iama 'Iruma vajaha 'iamana. 56 Huni oha 'ee oma niho'o oja hianavara kaivo Jesura ea 'aho'a iraka ka'ene renajaho pa'warahuna'e 'waramana.

Copyright information for `MCQ