Mark 1

Joni Papitisitara Najahajina

(Matiu 3:1-12; Ruku 3:1-18; Joni 1:19-28)

Jesu Keriso ka'ene Godoni Harihijihuni vu'a maijihuni aneja. Poropetia Aisea nitama ika'ina'e heha vaji venana.

Heha! Na Nuni 'ona oji'ina oni una'i ranave hu oni 'unama amairihuna.
Hu nechi'i namine ajira 'ume'ena Ja Natohwijara rohunijihuna'e Huni 'unama amairie arira'e renama 'umehuna.
Joni Papitisita nechi'i 'waravume ea puni sisea vwihane temukavume areva jihuna'e Joni pu 'unirame toa vaji samaume 'urijara. 'Ene ea mapoka Jutia ora 'ee Jerusaremi ora va'e toa iha Jotani puni sisea nahama 'waravume Jonira 'unirama toi samaume 'urijara. 'E'eme Joni kameru sapasi ateha vene 'ee huni sisijino charia vejara'omo ijí same aneura riha 'ee pújúharu inuna. Jonira najahe ijá 'iama Ea pina ka'ene nuni túna'i roujaho Hu niho'o natohu kaivo na natohwa pana. 'Enajihuna'e na Huni mumora hwana aja rasahuna areri pareniu. Na ja toi vaji samauta kaivo Hu ja Godoni 'Avenijino samahuna 'iamana.

Jesu Toi Apúsame 'Ee Vena Kamajina

(Matiu 3:13-4:11; Ruku 3:21-22; 4:1-13)

Ijí vea kajino Jesuho Nasareti Karari vaji rene roume Jotani Jonira 'unama toa vaji apúsamana. 10 Hu ni'aha kwino toa vaji rene 'uriji'i kavume akúpa jara'eme Godoni 'Avena marahu'ora puna'i ariha Huni roana. 11 'E'eme ira kahi akúpa 'ahi rena roe ijá 'wama A Nuni Hariha'omo Na A oja mahu. 'Ene Na A kavujaho niho'o teamanimu 'wamana. 12 'Ejume ni'aha kwino Godoni 'Aveni 'ejahae Jesuho nechi ahema va'ana. 13 Hu na'ia mapoka (40) nechi'i hi'eme Setanira roe Hu vena kamana. Hu hanuha nea pu'úmo hi'eme 'ona oji'inapo roe Hu 'ajoahara.

Jesura Najahe 'Ee Tisaiporua Amura Aheramajina

(Matiu 4:12-22; Ruku 4:14-15; 5:1-11)

14 Joniho tipura vaji hi'eme Jesuho Karari roe Godoni vu'a 'waramana. 15 Hu ijá 'iama Vea niapejume ja 'ajoha'inijaho Godi niranavume roana. Joni sisea vwihane are'i kaivo Godoni vu'a mamaa nimai ro'avara 'iamana. 16 'Ejume Jesu Karari rori vai'i kavume Saimaniho 'ee huni 'u'ua Enituru'o úa vesavi'ina'omo puni namea soha vaji 'oname hijara. 17 'Ejume Jesu ijá 'iama Ja Na 'ararihie roe Nara ja najahe jara kija'e 'ekuja'ina'e ea ahera'ejakúna 'iamana. 18 Pu ni'aha kwino namea puna irecha'i kaivo 'urina Hua'e 'ararihae va'ara. 19 'Ejume Hu toa kajihuni rora kaji vai'i kivume Jepati huni harihija Jemisi huni 'u'ua Joni sisima 'ahi hine puni namea turamana'omo pu ijí hine hwearikara. 20 Hu pu ni'aha kwino 'umenaume oma puna Jepatiho sisima vaji pwehwa pu'úmo irechami'i kaivo pu Hu 'arariha va'ara.

Ea 'Avena Sisei Rosamajina

(Ruku 4:31-37)

21 'Ejume pu va'e Kapeniami usevajaho Sapatia vea'omo Jesuho aruma va'e Sinakoku vaji hine najahana. 22 Hu pu najahume pu hene oja hwa'usahara. Ijihuni maijaho Hu niho'o haruriji'i pu najahana. Areri Sikuraipiepo najahu ja'ina pana. 23 'E'eme ijí Sinakoku vaji ea 'avena sisei ajivi'ini 'urine chirivi'i ijá 'wama 24 Jesu Nasareti orikera 'ú A iraka vetú'ena? 'Ú A núa'e ruaru 'ahaume roane? A ea iraho na nikavu. A Godoni arira maijina 'wamana. 25 Jesura hu 'urarahe ijá 'wama Iruno'a are'i kaivo ariha va'a 'wamana. 26 'Ejume 'avena sisea kajara ea kajaho 'anaa pi'onavume mwe'i nama kuchikuchivuma kavi'i 'avena sisea kajaho eruhi'i ro 'e'ume va'ana. 27 'Ejume ea mapoka oja hwa'usahaume 'urina pira'arame ijá 'wava Ikaho irake? 'Unama maiu'ina harusina'e najuhu. Hu he paraji'ina ijihuni hahi 'avena sisea 'u'o 'waravu'e pu Huni ira hena veju 'wavara. 28 Hu ijá venajihuni vuijaho Karari vaja marako he parajara.

Jesura Ea Mapoka Venaume Maraniajina

(Matiu 8:14-17; Ruku 4:38-41)

29 'Ejume pu Sinakoku are'ika'i Saimani'o Enituru puni sei Jemisi'o Joni pu'úmo va'ara. 30 'E'eme Saimani oni jura paranahijaho atama 'uname haha ohoa re'eme namajaho Hu 'waravume henana. 31 Hu iji 'unama apena 'urijume atama ni'aha kwinu pa'are'eme hu 'urine mataume 'iruma amairia vajihume ijara. 32 Ijí nusirea kajino pu aneja vene atakina 'ee ea ka'ene 'avena sisesapo ajima'ina mapoka'e aherame Jesuni roara. 33 'E'eme ijí nusirea kajino ea ka'ene ara kajino hijujija ijí vwichajiama kajaho niho'o rarene namana. 34 Jesura vejume ea ka'ene atama navi'inijaho atama puna ni'aha kwino pa'arejara. Hu ea ka'ene 'avena siseapo ajima'inijija venaume ni'aha kwino va'ara. Hu 'avena sisesa 'waravume ira pa'wara'i ariha va'ara. Ijihuni maijaho pu Jesu kamareja arihara.

Jesura Karari Vaji Najahajina

(Ruku 4:42-44)

35 Jesuho sú'u vea mai'o aharasama kamino Huhusu 'urine va'e ruha pini ea pa'ajino siporua 'onana. 36 'E'eme Saimaniho napuhwa pu'úmo Hu sama ojara. 37 'Enuva'o pu Hu piuname ijá 'wava Ea mapoka'e A sarama oju 'wavara. 38 Jesu ijá 'iama Roe nú va'e ara 'aho'a mapoka ka'ene ikehuni rori navuji 'u'o Na ira najahuma. Ijihuni maijaho Na ijihuna'e routa 'iamana. 39 'Ejume Hu Karari araka mapoka kajino Sinakoku vaji vu'a najahe 'ee 'avena siseapo ea ajima'iniji sioma ato'arumana.

Jesura Ea Vejume Maranajina

(Matiu 8:1-4; Ruku 5:12-16)

40 'Ejume ea reporosia rukini roe Jesuni una'i nitupari savi'i ijá 'wama A ura rena'amajaho venie na haha maa'e reniama 'wamana. 41 Jesuho niho'o natohwa'e temu'eme ija hahi 'ahi ranavi'i ijá 'wama Na ura reniuna'omo oni hahakaho marana'ena 'wamana. 42 Ni'aha kwinu ijí reporosia kajaho pa'are'eme huni haha maranana. 43 'Ejume Jesu ajira ijá 'wama A viheno! A niho'o ea pina pa'wara'amana! 44 'Enakaivo va'e oni haha pirisiti nahe 'ee Mosisira nitama ka'ene najaha ja'ina'e swasa veje ea mapoka oni reporosia pa'arenajaho hena ka'avara 'wamana. 45 'Enakaivo Hu va'e ea mapoka 'warama ape onajihuna'e Jesu araka mapoka kajaho pa'urahonana kaivo Hu nechi'i rori hi'eme ea mapoka nianaapene Huni roara.

Copyright information for `MCQ