Mark 11

Niho'o Temaraji'i Jerusaremi Vaji Roe Arumajina

(Matiu 21:1-11; Ruku 19:28-40; Joni 12:12-19)

Pu Jerusaremi rori roe Petapeje'o Petani'o puni rori huri'a Arivi useme Jesu Huni tisaiporu no'ohe'i irechamiuma va'umakivi'i Hu ijá 'iama Ja va'e ara pina kama'aji usevi'i kave tonikia 'u'ua ea ijihuni toi pahiji'ina ka'eje aji i'ivananave namija ka'avajinakúne rasamapene ro'avara. 'E'eje ea pina ja aporamareje ijá 'iava Ja rakijihuna'e tonikia 'u'ua apejo? 'i'amajaho ja ijá 'wa'avara Nú apena va'e núni Natohwijara unenu'u pina venareja'e iji'a kú'o marako ranave ro'ena 'wa'avara 'iamana. 'Ejume pu no'o vai'i kavume tonikia 'u'ua vwicha rori i'ivananava jaho kamareja rasavara. 'E'eme ea 'aho'a ka'ene namija kajipo ijá 'iava Ja no'o raka vene tonikia 'u'ua kajaho rasavo? 'iavara. 'Ejume Jesura raka ka'ene 'waramajaho pu ijá 'waravume pu maki'eme pu no'o apena va'ara. 'Ejume pu tonikia 'u'ua apene Jesuni roume pu puni atehiji tonikia 'ahi irechame Jesu ijihuni 'ahi hinana. 'E'eme ea mapoka kajipuhipo puni ateha 'ee icha tuame 'unama kajino tahitavara. Ea mapoka urasaha va'ume ea 'aho'a túna'i va'a kajipuhipo mwasirivi'i ijá 'umeja

Hosana A Godoni iha 'ahi roajihuna'e Hu A merajahu.
10 Nuni oma Tevitira kwaa ara 'ajohuna ka'ene rohunijaho Godi merajaho Hosana niho'o ichutoa mai hinu 'umejara.
11 Jesu roe Jerusaremi Temiporu ajimarena vea nipa'arena jihuna'e maniriapenonu va'ume 'urine Huni tisaiporua iropu ropu no'o aherama Petani va'ara.

Jesura Mataka'e Sirimajina

(Matiu 21:18-19)

12 'Ena'omo sú'o Petani rena 'unama roaji'eme 'unama toi Hu matumana. Hu niri'i kamajaho mataka kamarena Hu vwihanajaho 'ina ijí navu ro'i kaivo vai'i kamajaho 'ina paki'eme a'aru rena namana. Ijihuni maijaho mataka kajara 'ina rehuni vea pana. 14 'Ejume Hu icha kajaho ijá 'wama Ea kú'o oni 'ina paihuna 'wamana. Hu ijá 'waravume Huni tisaiporu hejara.

Jesura Temiporu Vaji Va'e Amairiajina

(Matiu 21:12-17; Ruku 19:45-48; Joni 2:13-32)

15 Pu Jerusaremi va'ajimareja Jesu Temiporu aruma vai'i kivume ea mapoka hina 'iruma 'imeji'i hijumakivi'i Hu va'aji ea monia senisu veji'ini jihipuni 'aiju 'unama pita'arohe ea uka 'imeji'inijijahija 'ee ea mapoka arukunie 'ararihiume pitapa juhahara. 16 Hu ea 'aho'a Temiporu vaja uneunecha 'aho'a pa'eke roe aruma vahuna'e Hu tanumana. 17 Hu ea mapoka najahi'i ijá 'iama Godira heha vaji ijá 'úma Nuni seijaho eaka mapokijihipo Nuni siporua 'ohuni sea kaivo ja vejume seakaho nesapejuri sea renana 'úmana 'iamana. 18 'Ejume Sikuraipia 'ee pirisitia mama'inapo Jesu 'anaa kwahuni 'unamiji savara. Pu Jesu 'anaa kwahuna kaivo ea mapoka Hu najahu'e Huni túna'i va'ujihuna'e pu Hu juhavara. 19 Vea nusire'eme pu Jerusaremi arema va'ara.

Matakijara Najuhajina

(Matiu 21:20-22)

20 Sú'u 'urine vai'i kavume mataka sarana paranana. 21 'Ejume Pita kama vwihana ijá 'wama Najuhi'ine kare kama. Mataka ka'ene Ara sirimajaho niho'o saranana 'wamana. 22 Jesu ijá 'iama Ja Godi nimaa ro'avara. 23 Nimaa Na ja 'waravu Ea irara huri'a kare ijá 'wa'amajaho 'auma va'e sohi 'ona 'wa'i kaivo huni oja vaja papuruva reti'i kaivo nimaa ro'amajaho iraka ka'ene hura 'waramujaho rehuna. 24 Ijihuni hahi Na ja 'waravu Iraka ja siporua 'ona 'waravajaho nimaa roji'i nú ni'eku rojakamareje ja 'eka'avara. 25 Vea ka'ene a 'urina siporua 'o'amajaho ara ea 'ahoa sise'i 'ahiajaho vwihania arevakame oni Oma ka'ene akúpi 'ahi hinujaho oni sisea vwihana are'amana. 26 'Enakaivo erapo ja sise'i 'ahie ja puni sisea pavwihana are'avajaho joni Oma ka'ene akúpi 'ahi hinuji 'u'o joni sisea pavwihania arehuna 'iamana.

Jesuni Haruriji Rona Apovajina

(Matiu 21:23-27; Ruku 20:1-8)

27 'Ejume pu kú'o 'uname Jerusaremi roajime Jesu Temiporu vaji 'uraho'eme pirisiti mama'ina 'ee Sikuraipi 'ee emaipo ni'aha kwino Huni roajivara. 28 Pu Hu apoma ijá 'wava Irara 'waravume ija'ina venane 'ee Irara harura mahume A ija'ina venane? 'waravara. 29 Jesu pu eha ijá 'iama Na ja apora'ejukúna ja eha 'warivakame iji'a Na harura irakijino vejujaho Na ja 'warahuna. 30 Irara 'waravume Joniho ea toi samauma 'urijare? Godira 'waramana 'aho ei pini 'waramane? Ja eha 'wariha 'iamana. 31 Pu hina ira kukari ijá 'wava Nú akúpi 'ahi rena roana 'wa'avajaho Hu ijá 'úhune Irakijihuna'e ja hu panimaa vetiare? 'ú'ena. 32 'Enakaivo nú ema puni rena roana 'wa'eja vo pu ea mapoka'e juhavara. Ijihuni maijaho ea mapoka'e vwihajujaho Joniho nimaa'e poropetia. 33 'Ene pu eha vene Jesuho ijá 'wava Nú puruva retúu 'wavara. 'Ejume Jesura pu ijá 'iama Ijina'omo Na 'u'o harura iraki apene uneunechake vejujaho pa'wara'eju 'iamana.

Copyright information for `MCQ