Mark 4

'Ina 'Oji'inijihuni Haa

(Matiu 13:1-9; Ruku 8:4-8)

'Ejume Jesu kú'o va'e soha rori ea najahana. 'E'eme ea mapoka rouma kimarena Hu sisima 'ahi ajima soha toi va hi'eme ea mapoka soha rori hijara. 'Ene Hu uneunecha mapoka hai najahe ika'ina'e 'iamana. Heha! Ei pini 'ina 'eka 'o'iro va'ana. 'E'eme ika'ina'e renana. 'Ina 'aho'a 'unama ahi arihume ukapo ro ijara. 'Ejume 'ina 'aho'a muna 'ahi mwe'a ma'uako namaji arihajija marako riavara kaivo chinuma jojora parejara. Ijihuni maijaho muna 'aha mwe'a ma'uako namana. 'E'eme vei 'e'unarena ijaho chinuma jojora pa'ana'omo 'anae sarajara. 'Ina 'aho'a ija sisea vaji arihajija riama ajivara kaivo ija sisea ka'ene oma rukina kajipo raorihume siserane 'ina parejara. 'Enakaivo 'ina 'aho'a mwe'a mai arihajaho riama marasahe 'ina 'aho'a mapoka (30) rejume 'aho'a mapoka mapoka (60) rejume 'aho'a niho'o mapoka mapoka (100) rejara. Hu ijá 'iama Ea irara areri he'iro ve'amajaho hu ataa apúsa'amana 'iamana.

Haa Kajihuni Maijina

(Matiu 13:10-17; Ruku 8:9-10)

10 Hu tisaiporuhwaha 'ee ea 'aho'a pu'úmo hi'eme pu apoma ijá 'wava Haa ijihuni maa irake 'wavara. 11 Hu ijá 'iama Godoni hema ijihuni maijaho Hu ja mihu kaivo ea 'aho'a pu haaru heju kaivo ijihuni maa paheju.

12 Ijihuna'e pu ka'avajaho pu kahuna kaivo pu maa pavwihajura. Hehunijaho pu hejura kaivo ijihuni maijaho pahejura. Pu ijihuni maiji he'ipisa Godi pu vwihanie areva'a 'iamana.

Jesura 'Ina 'Oji'inijihuni Haiji Nahama 'Waramajina

(Matiu 13:18-23; Ruku 8:11-15)

13 'Ejume Hu pu ijá 'iama 'Ú ja haa kajaho pahejo? Ja haa kaji pahe'avajaho 'ú ja ichá'ina haa 'aho'a he'eja? 14 Heha! 'Ina ka'ene ei 'onajaho Godoni Ira. 15 'Ina ka'ene 'unama toi arihajihuni maijaho ea Godoni Ira heju'ukivi'i Godoni Ira puni oja vaji navujaho marako Setanira 'etujihuna. 16 'Ina ka'ene muna 'ahi arihajihuni maijaho ea Godoni Ira marako hene teamanavura. 17 'Enakaivo puni vaja chinuma pasama jihuna'e marako pa'arenuna. Ijihuni maijaho Godoni Irijihuni hahi ea 'ahopo sise'i 'ahiura ho hami pahi'avajaho marako arevura. 18 'Ina ka'ene ijí oma rukini vaji arihajaho ea Godoni Ira hehuna kaivo 19 karokaha vehuniji vwihanune 'ee monia ichá'ina'e 'ekahuna ijí vwihanuna 'ee uneunecha mapoka kima ura rena para'avajara oja vaja rareje Godoni Ira puni oja vaji marako pa'arenuna. 20 'Ina ka'ene mwe'i mai 'ojajaho areri ea Godoni Ira hena pu 'eka oja vaji irechame veju. Ea pina hami (30) venune 'ee ea pina hami hami (60) venune 'ee ea pina niho'o hami hami (100) venuna 'iamana.

Naheha Si'uara Hari Namajina

(Ruku 8:16-18)

21 Hu pina ijá 'iama Ea naheha enujaho 'ú hu si'uari vahanamune? 'O suha hari ranamune? Pana hu samaumai ranavu'e hananuna. 22 Uneunecha ka'ene paki'eju vaji navujijahija túna'i samaumaa rehuna. Uneunecha 'aho'a a vahanamiu'e navura'omo túna'i samaumaa rehuna. 23 Ea irara areri he'iro ve'amajaho ataa apúsama he'amana 'iamana. 24 'Ene Hu pina ijá 'iama Ja raka ka'ene he'avajaho vwiha'avara. A 'unama ichá'ina'e ea 'ahi'ama ja'ina'e nikwinu'ina kaja'ina'e a 'u'o hurahara ija'ina'e 'ahahuna.

25 Ea pina hu 'aho'a na'avajaho 'aho'a 'u'o 'ekuna. 'Eje ea pina huna poku pana'avajaho maho'o 'etujahuna 'iamana.

'Ini Riama Ajimajihuni Haa

26 Hu pina ijá 'iama Godoni arijihuni 'unamijaho areri ika'ina. Ei juasi'i soa samuja'ina. 27 Ea hu soa samare'e hu ro 'urahonujaho matauma onuna kaivo 'unamaka marajujaho hu pahena pakamuna kaivo hu nena 'urina va'eju'e 'urine marasahura. 28 'E'eju'e riama ajima a'a rasamare'e túna'i 'ina rejura. 29 'Enare'e tuma marasahukivi'i ijí mena ijura. Ijihuni maijaho juara savuri veijara roana 'iamana.

Kwava 'Ina Huni Haa

(Matiu 13:31-32, 34; Ruku 13:18-19)

30 'Ejume Hu pina ijá 'iama 'Ú Godoni 'unama ichá'ina najahune? 'Ú haa iraki areri Godoni arijihuni 'unamijaho najuhune? 31 Godoni 'unamijaho areri kwava 'ina puna'i ma'u'umaa'omo mwe'i 'ahi 'ojura. 32 'Enakaivo 'ina kají mwe'i vaji 'onavujaho riama icha ni'ima'ura renuna. Anuama ataukavi'i uka roe ajime nesa vene icha'a vaja kaji hijura 'iamana. 33 Hu Godoni vu'a mapoka hai emaapo hehuni ja'ina'e Hu 'waramuna. 34 Hu ea haaru 'waramuna kaivo tisaiporuhwa pu'úmo hine haa kajihuni maijaho najahuna.

Jesura Puura'e 'Waravume Ajuaranajina

(Matiu 8:23-27; Ruku 8:22-25)

35 Veaka nikwinu'ina kajihuni nusirei Hu Huni tisaiporu ijá 'iama Nú karo'i toa ropuna'i va'ukúna 'iamana. 36 'Ejume pu ea mapoka toa rori irechami'i kaivo pu Hu aheme sisima 'ahi ajime toi ropuna'i va'iro vai'i kivajaho sisima 'aho'a pu pu'úmo va'ara. 37 Pu va'eme puura ni'ima'ura hirame toa amenarena sisima kajaho toa itu'o'iro ve'eme 38 Hu sisima vipuna'ija'i ohaha vene ne'eme tisaiporuhwapo saa ijá 'wava Najuhi'inikera A pavwihanú'eje nú kwamasa'eje? 'wavara. 39 'Ejume Hu 'urine ira ajira'e puura 'ee toa kajaho areha 'iamana. 'Ejume ni'aha kwinu Huni ira 'ahi areme 'ee soha mamaa rena namana. 40 'Ejume Hu pu ijá 'iama Ja rakijihuna'e juvo? 'Ú ja panimaa rojo? 'iamana. 41 'Enakaivo pu niho'o tea junama parajume pu 'wamapenoji'i ijá 'wava Ea irana'omo veju'e puura 'ee soha Huni ira hejare? 'wavara.

Copyright information for `MCQ