Mark 8

Jesura Ea Mapoka (4,000) Túasamahajina

(Matiu 15:32-39)

Kú'o ijipini ea mapoka va'e ahuma hijara kaivo pura 'iruma ka'ene ihunijaho pa'ana. 'Ejume Jesu Huni tisaiporu 'umenaume rouma ijá 'iama Ea ka'ene nú pu'úmo hijukaho hi'eme na'ia no'opisu pa'arejara kaivo 'iruma ka'ene pu ihunijaho pa'ajihuna'e Na punijihuna'e temuka apeju. Ea 'aho'a kwaa jojori rena roajihuni hahi Na irechamie va'avajaho pu va'e vwamu toi matunave kwamasa'eja 'iamana. Tisaiporuepo Jesu eha vena ijá 'wava Kwaakaho 'iruma pa'ane 'imejuri tinia pa'ajihuna'e nú ichihi 'iruma 'eke eakaho areri vajihe i'eja 'wavara. Jesu aporame ijá 'iama Puretia icharo navo? 'iavume pu ijá 'wava Iropu no'o navu 'wavara. Hu ea mapoka kajaho 'waravume mwe'i hijasavara. Hu puretia iropu no'o 'eke siporua 'one teimani 'wa'i kaivo iji'a tuachame Huni tisaiporua vajihume pu 'eke ea mapoka kajaho ijá vajihapenojara. 'Ejume kija kwinu kwino navara'omo Hu 'eke ijí 'u'o siporua 'ona teimani 'wa'i kaivo 'waravume 'eke ea mapoka vajihara. 'Ejume ea mapoka kajaho ina tea hianavumakivi'i puretia paiji'inijaho 'eka katija iropu no'o vejume itu'o'ujume irechavara. 'Enakaivo ea mapoka mapoka (4,000) ijara'omo irechamiume va'ara. 10 'Ejumakavi'i Hu tisaiporuhwa pu'úmo sisima 'ahi ajime Taramanuta opuni kwai va'ara.

Ea Areri Pavejuji Veje Ka'i 'Ahiume Mi'imi'ivajina

(Matiu 16:1-4)

11 Parasiapo roajime Jesui ninakarame vena ka'i 'ahiume ijá 'wava A aacha pina akúpi 'ahi najuha kavava 'wavara. 12 Jesu oja areri pare'eme ijá 'iama Ea iviamaa urijakihija rakijihuna'e aacha pina veje ka'i 'ahiu'e 'warivu? Na nimaa nimaa ja 'waravu Na aacha pina niho'o ea ka'ene iviamaa urijakihija panajahuna 'iamana. 13 Hu pu irechami'ika'i 'urine sisima ajime toa ropuna'i va'ana.

Parasi 'Ee Heroti Oni Isitijina

(Matiu 16:5-12)

14 'Ejume tisaiporu harava runami'eme pa'eki kaivo kwinu'wi apena sisima vaji ranama roara. 15 Jesu pu nahama 'warama ijá 'iama Ja hami hena kaha. Parasi puni isitia 'ee Heroti oni isitia hami ki'avara. 16 Pu 'urine pira'arame apenoji'i ijá 'wava Hu ija'ina 'warumu ijihuni maijaho nú puretia pa'ana rone 'warumu 'wavara. 17 Pura 'wava kaji Jesu henarena aporama ijá 'iama Ja irakijihuna'e nú puretia pa'ana 'wame pira'aravo? Na 'waravujaho 'ú ja pahejo? 'Ú ja hami pavwihajo? 'Ú joni oja majaa kaisina rena navo? 18 Ja nia rukina vo pakivo? Ja ataa rukina vo pahejo? Ja ira ka'ene kivajaho pavwihajo? 19 Vea ka'ene Na puretia iropu tuachavumakame ea mapoka mapoka (5,000) ijajaho ja vi vwihajo? Ea puretia ijuma tua'eme puretia pwinana'a ka'ene navajaho katija icharo vejume itusahare? 'iamana. 'Ejume pu eha vena ijá 'wava Iropu ropu no'ona 'wavara. 20 Vea ka'ene Na puretia iropu no'o tuachame vajihume ea mapoka mapoka (4,000) ijajaho katija icharo pwinana vejume itusahare? 'iamana. 'Ejume pu eha vena ijá 'wava Iropu no'ona 'wavara. 21 'Ejume Hu ijá 'iama Ja majama pavwihaju 'iamana.

Jesura Petasaita Ora Nia Pa'aji Vejume Maranajina

22 Pu Petasaitai ro'eme ea 'ahopo ea pina nia supavi'inijaho apena roe 'ejahae Huni iji 'una'amarono 'waravara. 23 'Ejume Jesu huni ija 'unavume apene ari uri va'ana. Hu cheri nia 'ahi pisoti'i kaivo ija nia 'ahi ranama ijá 'wama A uneunecha vikimo 'wamana. 24 Hu nia ahasirime nirie ijá 'wama Na ea kivujaho icha puna'i 'urahoju 'wamana. 25 Jesu kú'o Huni ija ea kajihuni nia 'ahi irechavume hu nia niriajaho marane ea nia hami kimana. 26 'Ejume Hu huni sei va'umakavi'i ijá 'wama A ara vaja pavahuna 'wamana.

Pitara Jesu Rona 'Waramajina

(Matiu 16:13-20; Ruku 9:18-21)

27 Jesu Huni tisaiporu pu'úmo va'e ara iha Sesaria Piripai va'iro vai'i Jesu Huni tisaiporu aporama ijá 'iama Ea pu vwihajujaho Na rarane 'wavure? 'iamana. 28 Pu eha vena ijá 'wava Ea 'ahopo vwihajujaho A Joni Papitisita 'wavu'e 'ahopo vwihajujaho A Iraija 'wavu'e 'ahopo vwihajujaho A poropeti pina rojura 'wavara. 29 'Ejume Jesu ijá 'iama 'Enakaivo ja vwihajujaho Na rarane? 'iamana. 'Ejume Pita ijá 'wama A Kerisona 'wamana. 30 'Ejume Jesu ijá 'iama Ja ijaho ea pa'wa'avara 'iamana.

Jesura Ahia Apene 'Ee Kwahuniji Rona 'Waramajina

(Matiu 16:21-28; Ruku 9:22-27)

31 Jesu Huni tisaiporu najaha ijá 'iama Ea mai'o Emaa Puni Harihijaho 'unama sisesa ani ani'ina 'ahahuna. 'Ene emakina 'ee pirisiti 'ee Sikuraipijipo pataarohuna. 'Ene pu Hu 'anae kwahuna kaivo na'ia no'opisu pa'are'eje kú'o 'urihuna 'iamana. 32 Hu samaumai najahumakame Pita Jesu ahema ro va'e 'urarahana. 33 Hu ta'arohe Pita túchaha'ika'i Huni tisaiporu kivi'i Pita 'uraraha ijá 'wama Setani, Nuni túna'i ruva'a! Oni vwihijaho Godoni vwiha pana kaivo ema puni vwiha 'wamana. 34 Jesu ea mapoka 'umenaume roe Huni tisaiporu pu'úmo Huni nini ahuma hijumakivi'i Jesu ijá 'iama Ja ea pini Nuni túna'i ro'i ve'amajaho huni ojijihuni urijaho maka'ika'i huni korosi tapane Nuni túna'i 'ararihie ro'ama. 35 Ea irara huni hiiji ori ni'ajara'amajaho huni hiijaho ranahuna. 'Ene ea irara huni hiiji Nunijihuna'e Godoni vu'a maa maiu'ini jihuna'e ranamajaho hu huni hia 'unanahuna. 36 Ei pini uneunecha ka'ene mwe'a kakehunijaho huna rerana'eje hia nimaa nimaiji asina'ipisa hu mamaa iraka apeja'e? 37 'Ene ea iraka vejujihuna'e majama hihuna asinahune? 38 Ea mapoka ka'ene iviamaa iki hijukija Godi pataarohe 'ee sisea 'unama ani ani veji'i hiju. Ea irara Nunijihuna'e Na pataarorihe 'ee Nuni ira pataaro'amajaho vea ka'ene Ema Puni Harihijara 'ona oji'ina arimaa 'ee Amoni hanaji'iniji'i ro'amajaho hu 'u'o pataarohuna.

Copyright information for `MCQ