Matthew 10

Apasorua Iropuropu No'u Pijihajina

(Maka 3:13-19; Ruku 6:12-16)

'Ejume Hu Huni tisaiporu iropu ropu no'o 'umenaume Huni roumakivi'i pura 'avena sisea ato'aruma'e 'ee atama veje sonahie ea ka'ene haha siserani'ina amairia Huni harurijaho mihana. Ijí Huni tisaiporu iropu ropu no'ohe'i kajihipuni ihijaho ikihina. Saimani ka'ene Pitana 'wavujine 'ee huni 'u'ua Eniturune 'ee Jemisina 'wavujaho Sepati oni hariha 'ee huni 'u'ua Jonina 'wavujaho 'ee Piripu ho 'ee Pataramiu ho Tomasi ho Matiu ka'ene takisia apeji'inijaho 'ee Jemisi ka'ene Apiasi oni harihijaho 'ee Tariasiho 'ee Saimani Kenani orijaho 'ee Jutasi Isikariatika ka'ene Jesu nahamahajina.

Apasoru Iropuropu No'o Irechamiume Usema Va'ajina

(Maka 6:7-13; Ruku 9:1-6)

Ike iropu ropu no'ohe'i Jesura irechamiana. 'E'ikaivo ijá 'iama Ja Jenitaru puna pava'e 'ee Sameria opuni ara vaja pava'avara. 'Enakaivo arira va'e Isureri opuni sipia ka'ene pivusahu jihipuni va'avara. 'Enareje va'e najahareje ijá 'wara'avara Godoni arijihuni 'unama niturana roana'omo mai'o piunahuna 'iavara. 'Enakaivo ea ka'ene atama 'uniravi'inijija veje sonahie 'ee ea ka'ene kwamasahi'inijija veje 'urine 'ee ea ka'ene reporosia rukinijija vena'e reporosia pa'arena'e 'ee 'avena sisea ea ajima'inijija sioma'avara. Ja maapejarakúne mavaji'avara. 'Enakaivo ja ijí va'i ve'avajaho korutia ho siriva ho kapa monijaho pina joni tuja vaja niho'o pana'avara. 10 'Ene joni tuja pa'eke ateha no'o pa'eke 'ee joni mumora hwana pa'eke 'ee pijuha pa'ekavara. Ijihuni maijaho ea irara ea 'aho'a ni'ajihujaho ijí ea ka'ene pu ni'ajihu kajipo 'iruma pu vajihuna. 11 'Enakúne ja va'e taunuina ho ari use'avajaho hami aporama henu va'o ea mamaijihi pu'úmo hinu va'o va'avara. 12 'Ene ja va'e sei ajivi'i ea ka'ene sea kaji hijujija 'ajora'avara. 13 'Eji'i kive pu ja 'ajorava ki'avajaho pu pu'úmo matau'avara kaivo pu pa'ajorava ki'avajaho pu pu'úmo pamatau'avara. 14 'E'eje ara kaji'u puna ho ei pini joni vu'a pahene pataaroraha ka'avajaho joni mumora hari saina ka'ene namujaho taire'i kaivo va'avara. 15 'Enakaivo Na nimaa nimaa 'waravu vea ka'ene 'otua ve'avari veijaho eakijahija niho'o sisea ani'ina renahuna. Kwaa ka'ene Satami Kamora renajaho asimareje niho'o ani'ina rehuna.

Sise'i 'Ahihuna Ka'ene Roujina

(Maka 13:9-13; Ruku 21:12-17)

16 'Enakúne hami heha. Na ja irechamiujaho areri sipia'e 'ua ne'a puni vaji irechamiu ja'ina'e irechamiu. 'Ene ja raka ve'iro ve'avajaho maraku'a vwihana areri taparapo vejuja'ina'e ve'avara. 'Enakúne ja marahu'orapo ajuarasaha ojuja'ina'e o'avara. 17 'Ene hami ki'avara. Erapo ja 'eke namahareje 'eka va'e kanisoru puni nini va'e 'ee pu ja 'eka'e puni Sinakoku vaji hijihahuna. 18 'Ene Nuni hahijihuna'e pu ja 'eka'e ea mama'ina ka'ene kwaa ara 'ajohi'ini jihipuni una'i va'e 'ee kamatia epuni una 'u'o vahuna. 'Enakúne ja Nuni vu'akaho pu 'warame 'ee Jenitaru 'wara'avara. 19 'E'eje pu ja 'eka'e nama'irono va'a ki'avajaho ja pajumareje ika'ina vwiha'avara. Na vina vu'a ichá'ina'e 'wara'ejo? paro'amana. Ijihuni maijaho vea ka'ene ara 'wara'i ve'amajino raka ka'ene ara 'warahunijaho vajahe 'warahuna. 20 'Enajihuna'e ijí vu'a kajaho a pana kaivo Amo oni 'Avenijara oni vaji 'warahuna. 21 'Enare'e ei pini huni poka 'otu vetiakame erapo apene 'anaa kwahuna. 'Eje omahi huni hariha ija'ina 'ahahuna. 'Ejakame kasihwapo emahwaha namahe 'anie tirahuna. 22 'Enakaivo Nuni hahijihuna'e ea ja senahuna. 'Ene ea irara 'ata kairane hi'eje mwe'akaho pa'are'amajara marana parahuna. 23 'Enakúne ari pini ja ruaraha ki'avajaho marako'a juhaha va'e ari pini va'avara. 'Enakaivo Na nimai ja 'waravu ja joni kaukara ka'ene ike Isureri opuni ara kwaa vajakino vejujaho mai'o pave para'eje Na Ema Puni Harihijaho kú'o 'unama rohuna. 24 'Ene tisaiporu ijaho huni tisa paasimana 'ee pweijaho huni natohwa paasimuna. 25 'Enakaivo tisaiporu ijara huni tisa ijí vare'ina'e re'ipisa areri reje 'ee pweijara huni natohwiji vare'ina'e re'ipisa areri reja'a. 'Enakaivo pu ijí sea anesura kajaho Pierisiparu 'wa'avajaho pu ijí sea kaji hijujija 'u'o ni'aha kwino sisea 'wava'a.

Irá Juhahunijina?

(Ruku 12:2-7)

26 'Enajihuna'e ja ea 'aho'a pajuha'avara. Ijihuni maijaho uneunecha mapoka ka'ene vaji navu'e ea mapoka pakivura'omo túna'i sama hirahuna. 'Ene ea mapoka ni'i ni'i hemi navujaho hena kihuna. 27 Vu'a ka'ene sei vaji Nara ja masuani 'waravukaho ja samaumai 'wara'avara. 'Ene vu'a ka'ene Na atai koravu'e ja hejukaho ja ma'aha riri namine 'wara'avara. 28 'Enakaivo ike haha huriji erapo 'anaa kwahuniji ja paju'avara. Pu joni 'avenijaho pa'anaa kwahuna. 'Enakaivo Godira haha 'ee 'avena iji'i 'aniareje ato'aruma'e vena vaji va'ajime rehunakúne ijí ju'avara. 29 'Ene ea uka 'u'umai no'o 'wani toia 'imejura. 'Ena'avo joni Omijara ijí uka 'u'ua kajara mwe'i 'onujaho Hu kama henuna. 30 'Ene ijí joni húmata 'ahi sapasa icharo namujaho Hu nihena kimuna. 31 'Enakúne ja paju'avara. Ijihuni maijaho jara uka 'u'ua mapoka kajaho asitahara.

Keriso Rone 'Warahuna ho Pataarohuna

(Ruku 12:8-9)

32 'Ena'omo ea irara Na ronareje ea mapoka puni una'i 'wara'amajaho Na 'u'o ea kaji rone kahino akúpa 'ahi Nuni Omijihuni una'i nahama 'warahuna. 33 'Enakaivo ea irara Na hemihareje ea 'aho'a panaja'amajaho Na 'u'o ea kajaho kahi akúpi 'ahi Nuni Omijihuni una'ijaho hemahuna.

Matauhuna Pana Kaivo Ahaahunijina

(Ruku 12:51-53; 14:26-27)

34 'Enakúne ja ika'ina pavwiha'avara. Na iki mwe'i matauvi'ina paapena routa kaivo Na ea so'wi ahaa'i routa. 35 Nara roujihuni maijaho Na veje harihwapo omahwaha chichahie 'ee 'apajahi oaha chichahae 'ee hariahoni naparijara sasaha chichaha'amarono routa. 36 'Enakaivo emahuni nakijaho huni kachi'ipo rehuna. 37 'Eje ea irara omaha oaha ijihi oja miha para'i kaivo Na oja pamihujaho Nuni tisaiporua areri parehuna. 'Ene ea irara hu huni hariha 'apahija ijihi oja mi'i kaivo Na oja hami pamihujaho Nuni ea areri parehuna. 38 'Ene ea irara huni korosia paapene Na 'ararihi'amajaho hu Nuni ea areri parehuna. 39 'Ea irara huni hiiji ori ni'ajara'amajaho huni hiijaho ranahuna. 'Ene ea irara huni hiiji Nunijihuna'e Godoni vu'a maa maiu'ini jihuna'e ranamajaho hu huni hia 'onanahuna.

Eha Huni vu'a

(Maka 9:41)

40 Ea irara ja hami 'ahiujaho pu Na 'u'o hami 'ahiu. 'Ene ea ka'ene Na hami 'ahiujaho pu Godi ka'ene Na ranamiume rouji 'u'o hami 'ahau. 41 Ei pini ka'eje poropeti pini roa kamareje hu 'ajoha'amajaho Godira eha Huni poropeti mi'amaja'ina'e ea kajaho eha areri mahuna. 'Ena'omo ei pini ka'eje ea ariramaa roa kamareje hu 'ajoha'amajaho Godira eha ea ariramaa mi'ama ja'ina'e ea kajaho eha areri mahuna. 42 Na niho'o nimaa nimaa 'waravu. Nuni tisaiporu ijihuna'e ea ma'u'umaakihi toa huanava kimareje toa 'e mi'avajaho ea kajaho eha maa paasihuna 'iamana.

Copyright information for `MCQ