Matthew 27

Jesu Aheme Pairati Oni Roajina

(Maka 15:1-5; Ruku 23:1-2; Joni 18:28-32)

Ijihuni sú'uhijino pirisitia mama'ina 'ee 'emapuni mama'ina mapoka'e ahuma Jesu ichá'ina'e venareje 'anaa kwahuniji pira'arame hina 'wavara. 'Enareja pu Hu kamomareja ahema va'e kwaa ara kaji 'ajohi'ina ka'ene Pairati mahara.

Jutasira Kwamajina

(Akisi 1:18-19)

'Ejumakame Jutasi ka'ene nahamahajaho ki'eme pu Jesu sisea namahe 'ee sise'i 'ahaumakime hu niho'o temuma parajume ijí monia siriva (30) ka'ene hu 'ekajaho vukú'o 'uname 'eka roe pirisitia mama'ina 'ee emaapuni ea mama'inijihi vajihana. 'Ene ijá 'iama Na niho'o Ea kajaho 'aa sisea pa'amaa'e na Hu nahamahuta 'iamana. 'Ejume pu hu ijá 'wava Ijaho núni rake? A'asu ijaho kama 'wavara. 'Ejume hu monia kajaho ijí Temiporu vaja kajino ato'aru'i kaivo va 'e'una va'e jasi kwamana. 'Enakaivo pirisitia mama'ina kajipo monia kajaho nianai'i ijá 'wava Varapijara 'waramujaho ike moniakaho nú Temiporu moni iji'i paahuma irechahuna. Ijihuni maijaho monia kakaho emaapuni 'aa 'imejara 'wavara. 'Ejume pu 'wama pirahe monia kajaho 'eke ea ka'ene si'uara veji'ini jihuni mwe'a 'imenareja apiopuni eucha'e vejara. Ijihuni hahi mwe'a sisa kajaho 'Aa Mwe'a 'wama roe iviasi usevu. 'Ejumakame poropetia Jeramaiara 'waramajaho nimaa renana. Hu ika'ina 'waramana 'Ene Isureri opo Huni haha 'imehuni aneja monia siriva 30 ranavara. 10 Pu monia kajaho 'eke ea ka'ene si'uara veji'ini jihuni mwe'a 'imejara. Natohwijara naji'eme na 'waravuta. Godira na 'warimana 'iamana.

Pairatira Jesu Apomajina

(Maka 15:2-5; Ruku 23:3-5; Joni 18:33-38)

11 'E'eme Jesuho ijí kwaa ara 'ajohi'ina kajihuni una'i namijume hura apome ijá 'wama 'Ú A Jua puni kinie? 'wamana. 'Ejume Jesura ijá 'wama A ni'warimu kajina 'wamana. 12 'Enakaivo pirisitia mama'ina 'ee ema puni mama'inijihi pu'úmo Hua'e namahajaho Hu ira pa'waramana. 13 'Ejumakame Pairatira Hu ijá 'wama Uneunecha raka raka pu A namahujaho A nihino? 'wamana. 14 'Enakaivo Hu niho'o ira pina ma'uaku'wi pa'waravumakame ijí kwaa ara 'ajohi'ina natohwa kajaho niho'o puruva rena paranana.

Jesu 'Anaa Kwahuna Nimaa Vejajina

(Maka 15:6-15; Ruku 23:13-25; Joni 18:39-19:16)

15 'Ene vea ka'ene ahaja ijuri veijino ara kwaa 'ajohi'ina ni'inijihuni tamana'omo ea ka'ene tipurai hijujaho ea mapoka kajipo ea ira ura renauji ranavu'e samai va'una. 16 'Enakaivo ea pina huni iha Parapasiho niho'o sisemaa ea mapoka nihena kavi'ina hu tipura hinana. 17 'Ena'omo vea kajino ea mapoka mapoka roe ahuvumakivi'i Pairatira pu ijá 'iama Na ea irá ranave va 'e'u'ena? Parapasina ho Jesu ka'ene Kerisone 'wavujine? 'iamana. 18 Pu Jesu 'otua vetihuni jihuni maijaho Pairati nihena kamana. Ea mapoka Jesu ura renajihuna'e pu sena vena avajara. 19 'E'eme Pairatiho ruha ka'ene 'otua venajino asuma hi'eme naparahi ona vene ijá 'wama Ea ka'ene ariramaa kajihuna'i majihi'a unenu'u pina pave'amana. Ijihuni maijaho ivisi na'i kakino na navahi Hua'e kamarejo pivujuta 'wamana. 20 'Enakaivo pirisitia mama'inijija 'ee puni ea mama'ina ijipuhipo eaka mapoka kajijahija 'ejahie 'warave Parapasi rana'ika'i Jesu 'anaa kwa'amarono 'waravara. 21 'Enarena iji'a vukú'o kwaa kajihuni natohwijara eha vene ijá 'iama Ea iraka sa'iniji na ranave va'ena? 'iamana. 'Ejume pu ijá 'wava Parapasina 'wavara. 22 'Ejume Pairatira pu ijá 'iama 'Ena'omo Jesu ka'ene Kerisona 'wavujaho na Hu ichá ve'ejo? 'iamana. 'Ejume pura maho'o hu ijá 'wava Icha 'ahi 'anaa! 'wavara. 23 'Ejume hu ijá 'iama Irakijihuna'e? Hu sisea iraka venane? 'iamana. 'Enakaivo pu niho'o ijí 'umejajaho pasonananamie Icha 'ahi 'anaa 'umejara. 24 'Ejumakame Pairatira kimajaho pu puni vwiha ijaho ani'ina pavwihajara vo nikwinu'wi vwihaji'i 'ara'iro vejuma kimarena hu toi 'ene apene puni una'i ija sovi'i ijá 'iama Ea kakaho niho'o sisea ma'uaku'wi pavenana'omo ja Hu 'ana'avajaho Huni 'aa ijaho nuni ahija panakúne ja ojono kaha 'iamana. 25 'Ejume pu ea maho'o eha vene ijá 'wava Nijinakúne makave Huni 'aa núni haha 'ahi arihe 'ee sesahu núpuni haha 'ahi ariha 'wavara. 26 'E'ejume hu Parapasi ranavume va'eme hura 'waravume Jesu apene hijahe 'ee apene ranavume icha 'ahi 'ana'avarono va'ana.

Sorutiapo Jesu Sipana Asutiajina

(Maka 15:16-20; Joni 19:2-3)

27 'E'ejume ea kwaa ara 'ajohi'ina natohwa kajihuni sorutia kajipo Jesuho ahema kamati puni ni'úhi va'e aru'eme sorutia maho'o Hua'e 'outihara. 28 'Enareja pu Huni ateha kajijahija 'unirama jahe'i kaivo ateha amapu'ura ka'ene kwaa ara 'ajohi'ini jipuhipo savujikano apene apúsamahara. 29 'Ee 'wija ka'ene ehima piranavaji apenapi húmata 'ahi apúsamahe 'ee pijuha ija mana'inija'i mahuma 'unama namijumakavi'i pu nitupari satie nuana veti'i matahe ta'arohe ijá 'wava Ese! Jua Puni Kinie 'wavara. 30 'Ene ijá veji'i pu Hu cheri 'otie 'ee pijuha kajino apene 'uitejara. 31 Pu Hu matahume pa'arejume iji'a ateha ka'ene jopatu'uraka apúsamaha kajaho 'unama apene tasioma'i kaivo ijí Huni ateha ka'ene Hu marako'a samajaho samahe iji'a icha 'ahi 'ana'iro apene va'ara.

Jesu Korosi 'Ahi 'Anaajina

(Maka 15:21-32; Ruku 23:26-43; Joni 19:17-27)

32 'Ejumakame pu vai'i 'unamutoi ea pina Saimani Sairini orijaho piunamareja 'ejahaume hura korosia ka'ene Jesu 'anahuna kajaho tapana va'ana. 33 'Ejumakame pu Hu apena va'e kwaa iha Korukata 'wavujino va'ara. Ijí Korukata 'wavujihuni maijaho Húmata 'Ata 'wavura. 34 'Ejumakame pu ijino ajina riha kisina'e icha maritaji'i ahume amairiu va'ume Jesu mahume Hu ma'uako ina henarena pataarorahana. 35 'Ejumakame pu iji'a ichi 'ahi 'anaara.

'Ene Huni ateha pipi vene 'ekara 'úmana.
36 Ijá vejuma parajumakavi'i pu asuma hine 'aiha veji'i hijara. 37 Pu Hu namaha jihuni maijaho Huni húmata huri icha 'aha kajino asura venareja ika'ina 'waravara. Ikaho Jesu ka'ene Jua puni Kinijina 'wavara. 38 'Enareja vea nikwinu'ina kajino ea no'ohe'i nesa apeji'ina Jesuni mana'inaja'i 'anae 'ee pina ana'inija'iji 'anaara. 39 'Ejumakame ea ka'ene ijí rora kaji ro va'ajijahija Hu kame nuana achiachihi'i ira sisea kajino Hu 'waravara. 40 'Eji'i ijá 'wava 'Ú A ike Jua puni vu'a 'wavuri sea kakaho veje tira'usahakavi'i na'ia no'opisu vajijikano veje kú'o 'urine nami'ena 'iame ijá 'warumana. 'Enakúne A Godoni Hariha re'amajaho ivi'a orono ni'ajarame korosia 'aha kajino rene ariha roa kava 'wavara. 41 'Ejumakame 'unama nikwisu'ina kajino pirisitia mama'ina 'ee Sikuraipia 'ee emaapuni ea mama'ina 'u'o matahi'i ijá 'wava 42 Hu areri ea 'aho'a ni'aji'ena vo Hu ori'ini ni'ajarahuna niho'o areria pa'amaa. Hu nimai Isureri Puni Kini ijí re'amajaho maka'eje ijí korosi 'aha kaji ariha roakame nú iji'a kamareja Hu nimaa roja. 43 Hu Godi nimaa ronunakúne are'eje Hu ura re'amajaho Hura ni'ajahe ijí rena ariha roa kava. Ijihuni maijaho Hu ijá 'úmune Na Godoni Hariha 'úmuna 'wavara. 44 'Ejume ea nesa rukina ka'ene Hu hu'úmo 'ania kajipo pu 'u'o ira sisea ani ani Hu 'waravara.

Jesura Kwamajina

(Maka 15:33-41; Ruku 23:44-49; Joni 19:28-30)

45 'E'eme ve'iri'a kajino mwe'a kakaho ni'aha kwino nutuma na'ima namana. 'E'eme na'ima nama apena va'u va'ume va'e vea tahunaname hareha 'aha karakaro naminuji 'e'unana. 46 Vea hareha 'aha karakaro ariha va'e nami'eme Jesura ira ajira ijá 'umena Irai Irai rama sapakatani 'umenana. Ijaho Nuni Godi Nuni Godi A Rakijihuna'e Na Pataaroriho? 'wama avanana. 47 'Ejumakame ea ka'ene Huni rori namija kajipo ijí hinareja ijá 'wava Ooo ea kajaho Iraija 'umenu 'wavara. 48 'Ejumakame ea kwinu'wi ninuma va'arena icha ka'ene 'oasuna ijihuni toi amairi'inijaho apena roe ajina riha kisina vaji apúsame 'enapene Hura i'amarono apena mahana. 49 'Enakaivo ea 'ahopo ijá 'wava Are'eje Iraijara roareje Hu ni'ajahe kava 'wavara. 50 'Ejumakame Jesuho ira ajira 'ume'i kaivo iji'a kwamana. 51 Ijá ve'eme ni'aha kwinu Temiporu vaji ateha ka'ene rira mu'oijano pu uranavujaho ni'aha kwinu kahe huriji rene ro va'e kame hariji 'onarene rira kaja pucha'usaharena ronu ronu ro va'ara. 'E'eme mwevarivuri roarena muna kakija ni'aha kwinu mutuusahe ronu ronu va'ara. 52 'E'eme euchi jara'eme Godoni ea nimaa nimaa ka'ene kwamasahajija 'urijara. 53 Vea ka'ene Hura kwama 'urinani veiji ea ka'ene nitama kwamasahajija ijí pu pu'úmo 'urinareja akuavuri ari ea mapoka puni una'i va'ume kivara. 54 'Ejumakame amia natohwa 'ee ea 'aho'a ka'ene pu pu'úmo Jesu 'ajoha namijajipo mwevarivura 'ee uneunecha 'aho'a ka'ene rejajija kimareja tea junavume ijá 'wava Nimaa! Ikaho Godoni Hariha 'wavara. 55 'E'eme napara mapoka ka'ene Karari Jesu ni'ajahura ka'ene Hu 'ararihaa roajija kamakaru hinareja kavi'i hijara. 56 'Ene napara 'aho'a ka'ene ijihipuni vaji hijajijahija Meri Matarini 'ee Meri ka'ene Jemisiho 'ee Josapiho puni ohijaho 'ee Sepati oni harihiji jihipuni ohijaho ijá hijara.

Jesu Kwananavajina

(Maka 15:42-47; Ruku 23:50-56; Joni 19:38-42)

57 'Ea pina kukua rukima'ura Josapina hu 'u'o Jesuni tisaiporua'omo Arimatia rene nusire'eme roana. 58 Ea ikara hu Pairati oni va'e Jesuni haha ape'iro jarimana. 'Ejume Pairatira hu mahuna 'wamana. 59 'Ejumakame Josapira va'e ateha ka'ene maiu'imaijino apene Jesuni haha kajaho mwamana. 60 'Enarena Hu apena va'e Huni muna ara maiu'ina ka'ene amairiajikano haha kajaho rana'ika'i hu muna ni'ima'ura tahuma apena va'e ira kajikahi kuna'ika'i hu iji'a va'ana. 61 'E'eme napara ka'ene Meri Matarini 'ee vu Meri pinijaho ijano eucha ropuna'ija'i hijara.

Sorutiapo Mutita 'Ajohajina

62 Pura Pasova amairiaravari sú'uhwijino pirisitia mama'ina 'ee Parasia Pairati pu'úmo va'e rira kwinu ahuvara. 63 'Enareja pu Pairati ijá 'wava Natohwe nú ivi'a vwihaju. Hu pakwa'ika'i mai'o hinani veijino pisivisavi'inakara ijá 'úmane Na'ia no'opisu pa'are'eje Na kú'o 'uri'eju 'úmana 'wavara. 64 'Enajihuna'e 'warave ea 'aho'a irechamiakame va'ajimareje ijí eucha kajaho hami 'ajohe tanuma paraha. 'E'eje va'e na'ia no'opisu paramama. Vejuro'i Huni tisaiporuepo roe Hu nesi apena va'i kaivo pu ea ijá 'warahuna Hu kwamajaho ni'urinana 'iavakame Hura iviamaa pisimisamakara marako'a pisimúsumajaho asisama para'ena 'wavara. 65 'Ejumakame Pairatira pu ijá 'iama Joni ea 'ajoha'ina ijí hiju. Ja ichá'ina vehunijaho nivwihaju. Va'e tanume kuma pijuha para'avara. 66 'Ejumakame pu va'e eucha kajaho niho'o tanume kuma kisima'ura vene 'ee ea ijí 'ajoha namihuna irechamie muna tanuvume paranana.

Copyright information for `MCQ