Revelation of John 11

Ea No'o Nii Kivajina

'Ene hu na mina vejuri pijuha mihe ijá 'wima Va'e Godoni Temiporua 'ee swasa vejuri 'aijua mina vene 'ee ea ka'ene ijino vaji Godi oja mahujaho ta'amana. Temiporu huni ma'ahijaho pamina vehuna. Ijihuni maijaho ijí ma'aha kajaho Jenitaru mihana. 'Ejume pu ara natohwa akuavi'ina 'aha kajino masapa mapoka mapoka (42) namina ohuna. 'Ejakame Nara Nuni vu'a 'waravi'ina no'ohe'i ateha tatari savi'ina irechamiakame pura Nuni vu'a na'ia mapoka mapoka (1,260) 'warahuna 'wimana. 'Eji'i ea kajija icha no'ohe'i ka'ene Arivi 'wavujine 'ee naheha no'ohe'i ka'ene mwe'a kehuni Natohwi jihuni una'i namijujina. 'Ene ea 'ahopo pu sise'i 'ahi'i ve'avajaho puni ira vaji veni useme puni naka kajijahija swirasaha parahuna. Ei pini 'unama nikwisu'ina kajino sise'i 'ahi'i ve'amajaho hu 'anaa kwahuna. Vea ka'ene pu Godoni vu'a 'waravuri veijaho harura ka'ene akúpa kuve neha papihunijaho pu nuna'i navu. 'Ene puni harura kajaho areri toa veje 'aa rehuna. 'Ee mwe'akaho atama sisesa ani ani'ina areri veje rehuna. Vea ka'ene pu puni vu'a 'warava pa'are'avajaho hanuhijara ma'oa ka'ene tiha pa'anijino ro'e'une pu pu'úmo 'arahe hura pu 'anie kwamasahuna. 'Ene puni hahijaho ijí ara ni'ima'ura kajihuni ma'aha riri nahuna. Ara natohwa kaji hemahare'e 'wavujaho Satami 'ee Ijipiti 'wavujino puni Natohwa 'u'o 'anaume kwamana. Ea ka'ene ea ani'ina kachi'ina ira ani'ina 'ee kwaa kwaa puni haha ka'ene kwamasahi'inijija ki'eje na'ia no'opisu pa'areje 'ee puni hahijaho tanuvara'omo pakwa'ananamihuna. 10 Vea ka'ene poropeti no'ohe'i kwamasa'avajaho ea ka'ene iki mwe'i hiju jihipuni hia ruarahia jihuna'e pu temarasahe mari'ume 'ee swara vajúsarahuna. 11 'Ejume vea no'opisu pa'are'eme ura ohoa Godina'i rene puni vaji roume pu 'urine namijara. 'E'eme ea ka'ene pu kivajija niho'o tea junamana. 12 'Ejume pu he'eme kahi akúpa 'ahi ira natohwijara ijá 'iama Iki ajima roaha! 'iamana. 'Ejume pu kahi akúpa 'ahi 'imiti vaji va'ume puni naka pu kivara. 13 'Ejume ijí vea nikwisu'ina vaja kajino mwevarivura ni'ima'ura roana. Ara natohwa pwinana'a tirausahume 'ee ea mapoka mapoka (7,000) mwevarivura kajara 'aniume kwamasahara. 'E'eme ea ka'ene mai'o hijajija tea junavume akúpi jihuni Godiji ta'arohara. 14 Eha sisea no'ohe'i paraju kaivo heha! Eha sisea no'opisu ijaho mai'o marako rohuna.

Aja Iropu No'oji Rasa'eme Kerisora Ea 'Ajoahuniji Kavuta

15 'E'eme Godoni 'ona oji'ina ka'ene iropu no'o ijara tauja hwasi'eme ira mapoka kahi akúpa 'ahi ijá 'wava Mwe'a kehuni 'ajohi'ini jihuni tinijaho núni Natohwa 'ee Huni Keriso'o rene mwe'akaho majama 'ajohuna 'wavara. 16 'Ejume eruta mapoka (24) ka'ene puni toronu 'ahi Godoni una'i hijajihija mwe'i arihi Godi oja mahi'i ijá 'wava 17 Oo Godi niho'o harusima'ure A nitama hine 'ee iviamaa hinuna'omo nú A teimani 'wavu. Ijihuni maijaho A Oni harura natohwijara reju'e A mwe'akaho aneja vene 'ajoahu. 18 Ea ka'ene ikino mwe'i hijujija Onuna'i senavara kaivo iviamaa vu Oni senijara roana. Vea ka'ene kwamasahi'iniji 'otua vetihuna roume 'ee vea ka'ene Oni kaukara veji'ina poropetia Oni ehija 'ee ea ma'u'umaa 'ee ea mama'ina ka'ene Oni hura veji'ini jihipuni eha mamaa vajihuna 'u'o roana. 'Ene ea ka'ene mwe'ake veju'e siserana jihuna'e pura tirahuni vei roana 'wavara.

19 'E'eme Godoni Temiporu ka'ene akúpi 'ahi namujaho jara'eme Huni nimaa veti'aravuri pukisijaho samaahiravume kahuna renana. 'Ene vea pi'ivume akúpa natohwa 'umene mwevarivura roe 'ee puura ni'ina hiramana.

Copyright information for `MCQ