Revelation of John 13

Hanuha Soha Vaji Rena Roe Ajimana

Na soha rori ajara 'ahi namiji'i kavume hanuha soha vaji rene ajima ro 'e'unana. Huni húmata iropu no'one atana iropu ropune 'ee huni atana 'aha koraunu iropu ropu navume 'ee huni húmata 'ahijaho iha siseapo navara. 'Enakaivo hanuha ka'ene nara kavujaho pusia ni'ima'ura sa'ine huni mumorijaho pea sa'ine huni irijaho raioni jihuni irija'ina. 'Ejume anakijara huni harura 'ee huni toronua 'ee hura 'ajohujaho maho'o mahana. 'E'ejume na kavume huni húmata pina kwamajaranana. 'E'eme huni matana ka'ene rejume hu kwamajaranajaho vejume maranana. Ea mapoka ka'ene iki mwe'i hijujija ijí kame oja hwa'usa'ahume hanuha kaji 'ararihaara. 'Ene pu anakiji oja mahara. Ijihuni maijaho hu huni harurijaho hanuha mahana. 'Ee pu hu oja mahe ijá 'wava Ea irara hanuha ike vare'ine 'ee ea irara hu hu'úmo ajira ve'ena? 'wavara. 'Ene hu masapa mapoka mapoka (42) vajijino hine ira sisea 'warame 'ee Godi matahana. 'Eji'i hu areri ani ani vehuni harura mahana. 'Ejumakame hu ira avwame Godi 'ee Huni iha matahe 'ee Huni hari ara matahana. Ijaho ea ka'ene akúpi 'ahi hijujija matiha avanana. 'Ene Godoni eijihi pu'úmo 'arahe asitahuni harura mahana. 'Ee harura ka'ene kachi'ina ea ira ani ani'ina 'ee kwaa ara 'ajoahunijaho mahana. 'Ejakame ea mapoka ka'ene mwe'a kaki hijujija 'ee mwe'akaho mai'o pareji'inijino ea irahuni iha majama hihuni puka vaji panavajipo hanuhiji oja mahuna. Ijí majama hihuni puka ijaho Remu ka'ene kwamaji Huna. 'Enakúne ea irara ataa rukina re'amajaho ataa apúsama hena. 10 Ea irara tipurai vahuna re'amajaho hu tipurai vahuna. Ea irá so'wi ea 'anaa kwa'amajaho hu 'u'o so'wi 'anaa kwahuna. Ijihuni hahi Godoni ehija masuani hine puni nimaaroa ija kisi 'unanahuna.

Hanuha Mwe'a Vaji Rena Roe Ajimana

11 'Enarena na ka'eme hanuha pina mwe'a vaji rena ro ajimana. Huni atana no'ohe'ijija sipi 'u'ua sa'ina. 'Ene hu anaka huni iri 'waramana. 12 Hu hanuha amuri jihuni haruriji apene huni una'i mina piramana. Hura venaume mwe'a 'ee ea ka'ene ijí hijujija hanuha amuriji oja mahara. Ijihuni maijaho huni matana ka'ene rejume hu kwamajaranajaho vejume marana jihuna'e pu oja mahara. 13 Hanuha ka'ene túna'i roajarahara uneunecha ea areri pavehunijija venana. 'Ene hu vejume vena akúpi 'ahi rena ariha emaapuni una'i roana. 14 Uneunecha ani ani'ina ka'ene hu venajaho hanuha amuri jihuni una'i huna venahana. 'Ene hu mwe'a ikehuni ehijijija maho'o pisimisamana. Hu mwe'a ke'ura 'waravume hanuha amura ka'ene so'wi pijahara'omo 'urinajihu vare'ina veha 'iamana. 15 Hanuha ka'ene hanuhijihu vare'ina oja rukina rene ira 'wara'amarono harura mahana. 'Ejakame ijí hanuha kajara ira 'warave ea hu oja pama'avajaho 'anie kwamasahuna. 16 Hu venaume ea maho'o ea ma'u'ua ea mama'ina kukua rukina pivusahi'ina matauma oji'ina 'ee pwea ijijahija ijá puni ija mana'ina 'ee puni varipata 'ahi huni aacha irechahuna 'waramana. 17 Ea irara aacha ka'ene hanuhi jihuni iha ho iha kajihuni asura paape'amajaho hu areri pa'imene 'ee kukua pa'eka va'e 'imehuna. 18 Henaka nimaijaho ikena. Ea irara kama heji'ina re'amajaho hanuha kehuni asura kehuni maijaho sama piuna'amana. Emai huni asura ka'ene tahunijaho 666.

Copyright information for `MCQ