Romans 16

Nara 'Ajoravujina

Na núni ma'ina Pipiho Senikeria sosia vaji kaukara veji'ina iji pijahe ranavukúne ahe'avara. 'Enareje hu raka ka'ene ve'iro ura renujaho ja hu ni'aja'avara. Ijihuni maijaho hu ea mapoka mapoka ni'ajiharena na 'u'o ni'ajihana. 'Enakúne hu ro'amajaho ja hu aheme hami 'ahae ni'ajahe areri Godoni ea 'aho'a'e 'ajoravu ja'ina'e 'ajo'avara. Pisira'o Akwira'o marako'a nú pu'úmo Jesu Keriso oni kaukara vejurakúne 'ajora'avara. Pu unenu'u 'aho'apo renae kwamasahunijaho pavwihajara kaivo nuni hahijihuna'e pu na ni'ajihara. 'Enajihuna'e na pu no'o teamanime 'ee Jenitaru puni sosi maho'o ijihi puna'i na teamanimu. 'Ene sosia ka'ene puni sei ahuvujihija 'ajora'avara. 'Ene Epinetasi ka'ene Esia oraka Keriso urana nimaa ronaji na hu oja maha parajuji ja hu 'u'o 'ajo'avara. 'Ene Meri ka'ene joni kurai ni'ima'ura'e venaji 'u'o 'ajo'avara. 'Ene Enitaronakasi Juniasi'o nuni ehija'omo maraku'ijaho Keriso onijihuna'e nú pu'úmo tipura hijara. Pu apasoru puni vajijaho ea mapoka hena kivura. Na maraku'a Kerisoho panimaa ro'eme pura maraku'a nimaa rojara. 'Ene Emapiriatasi ka'ene Natohwi jihuni vaji na oja mahujaho 'ajo'avara. 'Ene Uripanasi ka'ene nú pu'úmo Keriso oni kaukara veji'inijaho 'ee Sitekisi ka'ene na oja mahi'inijaho 'ajora'avara. 10 'Ene Aperisi nú nimaa veti'eju'e hu Keriso oni 'unama ka'ene arimaijikano 'urahe onukúne 'ajo'avara. 'Ene Arisitopurasi oni kachi'ina 'ajora'avara. 11 'Ene Herotiani ka'ene nuni eiji 'u'o 'ajo'avara. 'Ene Nasisa oni kachi'ina ka'ene Natohwiji nimaa rojujija 'ajora'avara. 12 'Ene Tiraipina'o Tiraiposa'o Natohwi jihuni kaukara veji'inakúne 'ajora'avara. 'Ene Perisisi ka'ene na oja mahuraka hu Natohwi jihuni kaukara harura vene veji'inijaho 'ajo'avara. 13 'Ene Rupasi ka'ene Godoni kaukara ve'amarono Natohwijara iji pijahaji 'u'o 'ajo'avara. 'Ene huni oha ka'ene nuni ohiji 'u'o 'ajo'avara. 14 'Ene Asinikaraitasi ho Pirekani ho Herimisi ho Patiropasi ho Herimasi ho 'ee vwehwaha 'aho'a ka'ene pu pu'úmo hiji'inijihija 'ajora'avara. 15 'Ene Pirarokasi ho Juria ho Nerusi ho huni ma'ina 'ee Orimipasi ho 'ee Godoni ea 'aho'a ka'ene pu pu'úmo hiji'inijihija 'ajora'avara. 16 Ja pu pu'úmo 'ajosarame nirisa'avara. Keriso oni sosiajipo maho'o ja 'ajoravu.

Vwiha Túchamaa Najahajina

17 'Ene vwehu nune ea ka'ene roe vena'e ja 'ahaahunijija nia hami ki'avara 'ee iraka ka'ene nara najahujaho are'ika'i 'unama ani'ina'e najaha ki'avajaho juhame ani va'avara. 18 Ijihuni maijaho ea ija'inijija núni Natohwa Keriso oni kaukara pavejura kaivo pu opuipu teamanahuni ja'ina'e 'wame 'ee puni ira kajikano vu'a 'aho'a kajija 'eke 'warame amairia nirisame mama'ina vena 'eke usee 'ee ea ka'ene hami pavwihaji'inijija pisivisavura. 19 'Ene eaka mapokijipo hena kivujaho ja Godoni ira ija kisi apene joni una'i sanama hina vejujihuna'e na teamanimu. Na ura ja raka ka'ene ariramaijiru ka'avarono ura reniu kaivo uneunecha ka'ene sisei jihunijija juha'avara. 20 Godi ka'ene matauvi'inijara Setaniho mai'o joni mumora hari apene tautahuna. Núni Natohwa Jesu ka'ene Godoni rena roajara ja maiji vwihaniu. 21 Timoti ka'ene Godoni kaukara nú hu'úmo ahuma venajaho Rusiasiho Jesaniho Sosipata ka'ene nuni eijaho ijá ja 'ajoravu. 22 Na Tetiasira asurakaho Natohwi jihuni vaji veji'i ja 'ajoravu. 23 Keasi ka'ene na 'ajohie 'ee sosia 'u'o maho'o 'ajohaujara 'ajoramu. 'Ene Irasitasi ka'ene ara kwaa ikehuni monia 'ajohi'inijaho 'ee ea Kworitasi ka'ene núni vweijara ja 'ajoravu. 24 Núni Natohwa Jesu Kerisora ja ea mapoka maiji vwihaniu. Ameni.

Siporua Vaja Ta'arohe Tanumajina

25 Hu areri vena'e ja kirasahe namihuna 'ee nuni vu'a 'ee Jesu Keriso rone najahujara ni'ajihuna 'ee hema ka'ene mwe'akara aneja venaji rene nesi nama roajaho iviamaa samaahiramu. 26 'Enakaivo Godi ka'ene majama hiji'inijara poropetia 'waravume vejara'omo iviamaa roe samaahiravu'e kwaa ara maho'o nimaa rone veju. 27 Jesu Keriso oni vaji nú majama Godi ka'ene hena kama paraji'inijiru ta'arohi'i hina apena vahuna. Ameni.

Copyright information for `MCQ