Romans 8

Godoni 'Aveni Jihuni Vaji Hihuni Vu'a

'Enajihuna'e ea ka'ene Jesu Keriso oni vaji hijujija niho'o panama'ena. Ijihuna'e 'Avena ka'ene majama hiji'ini jihuni harurijara Jesu Keriso oni vaji ja venaume sisei jihuni harura 'ee kwamasahuni harurijija ijá irechamiara. Tamani jihuni harura ajuarana jihuna'e varapijara ni'ajúhuna areria parenana. 'Enajihuna'e Godiho Huni Hariha nikwinu ijaho ranavume roe ema puni haha siseiji apenana 'ee areri sisea huni swasa renana 'ee haha vaji sisea ka'ene namujaho 'otua vetiana. 'Enajihuna'e varapi jihuni ura ijara núni vaji roe nimaa'e re'amarono nú haha huni ura ijaho pa'urahe oju kaivo nú 'Aveni jihuni ura ijiru veju. 'Enajihuna'e ea ka'ene hahijihuni ura ijí 'ararihaujija hahijihuni ura ijiru vwihane vejura. 'Enakaivo ea ka'ene 'Aveni jihuni ura ijí 'ararihaujija pu 'Aveni jihuni ura ijiru vwihane vejura. 'Enajihuna'e ea ka'ene hahijihunijiru vwihaji'inijija pu kwamasahuna kaivo ea ka'ene Godoni 'Aveni jihunijino vwihaji'inijija mataume majama hihuna. 'Enajihuna'e ea ka'ene hahijihunijiru vwihaji'inijija pu Godi senavura 'ee Godoni varapa hara pahijura'omo niho'o nija'ina'e areria pavehuna. Ea ka'ene sisei jihuni iraru hena vejujipo veje Godi niho'o teamahuna pana. 'Enakaivo ja sisei jihuni hara pahiju. 'Enavo ja Godoni 'Aveni jihuni hari hiju. Ijihuni maijaho Godoni 'Avenijaho joni vaji hinu kaivo ea irara Keriso oni 'Avena paape'amajaho hu Huni ea pana. 10 'Ene Kerisoho joni oja vaji hinu vo sisei jihuna'e joni hahijaho kwamasahuna. 'Enakaivo joni 'avenijaho majama hihuna. Ijihuni maijaho ja ni ariramaa rejara. 11 'Ene Godoni 'Avena ka'ene Jesu vejume kwama 'urinajara joni oja vaji hi'amajaho ja kwamasahuna vo Hura vejume Jesu Keriso 'urina ja'ina'e Huni 'Avena ka'ene joni vaji hinujara venae ja 'u'o 'urihuna. 12 'Enajihuna'e vwehu nune núni chimua namujihuna'e hahijara ura renuni 'unamijaho nú pahihuna. 13 'Enajihuna'e ja hahijihuni ura ijí veji'i hi'avajaho ja kwamasahuna kaivo ja 'Avenijara ura renuja'ina'e hijujaho ja hahijara raka ka'ene venujaho 'aniu'e pa'arenujihuna'e ja majama hihuna. 14 Ea iraharaha Godoni 'Avenijara urani'eju'e ojujija Godoni harihija. 15 'Enajihuna'e ja 'avena ka'ene apejajaho kú'o 'uname va'e juvujihuni pwea re'irono apehuna pana. 'Enakaivo ja 'Avena ka'ene vena'e Godoni hariha rehuniji apejara'omo nú ivi'a Amo Amo 'wavu. 16 Godoni 'Avenijara núni oja vamaa kamino Huhusu ija'ina 'warumu. Nú nimaa nimaa'e Godoni harihija 'úmu. 17 Nú Godoni harihi jihuna'e Huni aachia 'ekahuna. 'Ene Jesunijaho nú pu pu'úmo ahuma 'ekahuna. Hu sisei hinaja'ina'e nú Hunijihuna'e sisei hi'ava jihuna'e nú pu pu'úmo túna'a núni pinana 'urihuna.

Túna'i Jesuni Vaji Núra Mamaa Asima Apehunijina

18 Ijihuni maijaho nara iviamaa sisei hijukaho iraka mamaa ka'ene túna'i rehuni jihuni manura vehuna areri pana. 19 Uneunecha ka'ene Godira venajija vea ka'ene Godoni harihipo roe samaahirave kihunijara ura renae oja hiana'eju'e 'ajaha hiju. 20 'Enajihuna'e uneunecha mapoka ka'ene iki mwe'i navujija sakarasahuni harura hari navu. 'Ene puni ura ijino sakarasahuna pana kaivo Hura siripama jihuna'e sakarasahu kaivo túna'i marasahuniji kavu. 21 'Enajihuna'e uneunecha mapoka ka'ene iki mwe'i navujija sakarahuni harura hari navura'omo sakarahuni harurijaho pa'are'eje Godoni harihija pu'úmo mari'uvi'i hihuna. 22 'Enajihuna'e uneunecha ka'ene iki mwe'i navujija areri napari hariha'e nahe'irono hahuna'e venuja'ina'e vena apene rouva'o iviamai ro 'e'unu. 23 Mwe'a kakara huhusu 'ajaha nahuna pana 'avo nú 'u'o vea kaji 'ajaha hiji'i núni tatua amurijaho Godoni 'Avena ka'ene nú apejajina kaivo nú 'u'o hahuna veji'i Hura aheruve harihwaha'e rene 'ee núni haha hianiji 'eka ruva'amarono 'ajaha hiju. 24 'Enajihuna'e nú raka ka'ene mai'o rehuniji nimaa rojajihuna'e nú maranúana. 'Enakaivo iraka ka'ene nú 'ajiha hijuji ni'ekujaho nú kú'o pa'ajiha hijura. 'Enakaivo ea irara raka ka'ene hu 'ajahaji kama apenajaho hu rakiji kú'o 'ajaha'e? 25 'Enakaivo unenu'u pina ka'ene nú pakavi'inijihi 'ajaha hijujaho nú matauma 'ajaha hiju. 26 'Enajihuna'e 'unama nikwinu'ina kajino Godoni 'Avenijara núra pivusahujaho ni'ajúhuna. Ijihuni maijaho nú siporua ichá'ina'e areri 'ohunijaho puruva retúuna. 'Eju'e Godoni 'Avenijara Huhusu núni siporua ira ka'ene emaa areri pa'wahunijino 'ohuna. 27 Hu emaapuni ojijija tina ki parane 'ee Huni 'Aveni jihuni vwiha ijaho ka paranana. 'Enajihuna'e Hu Godoni ehijijihi puni siporua Godira ura renuja'ina'e 'onuna. 28 Nú nihena kavu. Ea ka'ene Godi oja mahe 'ee Huni ura ijí ve'avarono iji pijihajija uneunecha maho'o ahuma rejujija Godira 'eke veju'e pua maranihuna'e venuna. 29 Nitama mwe'a kakaho pavenani veijikano ea ka'ene Huni Harihiji vare'ina rehunijija Hu iji pijihana. 'Enajihuna'e Godoni Harihijaho vwehwaha kajihipuni Poka rehuna. 30 Ea ka'ene Godira mwe'akaho mai'o pavenani veijino iji pijihajija Hu vejume pu ariramaa rejara 'ee 'u'o Hu venaume ea ka'ene arimaa'e rejajija vejume puni pinana 'urijara.

Godira Jesu Keriso Oni Vaji Oja Múhajina

31 Uneunecha mavarasa'ina ka'ene ike 'waramakaho nú ichá'ina'e ijihuni maa ka'ene aririjaho 'wa'eja? Godi núnuna'i re'amajaho ea irarahara nú tanu'urú'ena? 32 Godi ka'ene núnijihuna'e Huni Hariha pa'unasu'i kaivo ranavuma nú ea maho'o punijihuna'e roana. 'Enajihuna'e 'ú Hu uneunecha mapokakija pamavajú'ena? 33 Irara ea ka'ene Godira iji pijúhajija nama'ena? Godira pu ariramaa 'iamu. 34 'Ena'omo ea irara nú namu'ena? Jesu Kerisorane? Hu núnijihuna'e kwamane 'ee 'urinane 'ee Hu Godoni ija mana'inija'i asuma hine núni siporua 'onuna. 35 Ea irara Kerisora oja ka'ene múhajaho ahau'ena? Nú sisea piunime sisei hine ea 'ahopo sise'i 'ahie ora vea rene maisu hine hami pahine erapo so'wi pijú'ava jarane? 36 'Enajihuna'e Godoni ira vajaki vejajaho

Onijihuna'e nú veku veku 'anúue kwamasahu. Nú areri sipia 'ani'irono vejuja'ina'e 'ahúu 'úmana.
37 'Enakaivo Hura nú oja múhani vajijino nú uneunecha ikija maho'o asitaha parajara. 38 'Enajihuna'e na niho'o nimaa rona parajujaho kwamasahuni jarana ho mai'o hijujarana ho 'ona oji'ina puna ho 'avena sisea puni harura puna ho unenu'u pina iviamaa navuji puna ho unenu'u pina túna'i mai'o rehuniji puna ho harura 'aho'a puna ho 39 iki kahi ichutoi va'eja ho iki kami mwe'a vaji va'eja ho unenu'u pina ka'ene vejajara areri veje Godira oja ka'ene Jesu Keriso núni Natohwi jihuni vaji múhaji ahaahuna areri pana.

Copyright information for `MCQ