1 Corinthians 10

Ei nga, angmᵾn! Enim ndi, unt tᵾn nga anda kouwᵾmᵾn wamp mbᵾ, Moses moⱡnga kᵾn, etᵾng uⱡ mbᵾ pilik mek int puk pilᵾi! Wamp pᵾnmᵾn mbᵾ, kona kupa kat ndi, rᵾp elinga, num kuta kunt ni, ruk ila oi ndupa telinga, wamp nimbᵾ pᵾk ekit purung. Kona kopa kᵾn, num kuta kᵾn mel raⱡ ila, morung wamp mbᵾ, nu tᵾk, Moses tᵾk, en enim nga wu nuim mondrung. Wamp mbᵾ pora, Got nga Muⱡnga ei ndi, rᵾng ngurum. Wote wamp pora, Muⱡnga nga na, nu ei norum. Wote ei kᵾn, wamp mbᵾ pora, Got nga Muⱡnga ku ila, nu omba, purum ei norung. Ku ila nga nu pukpa oⱡnga kulk norung ku ei, Kraist elim mendpᵾⱡ. Ni kᵾn, uⱡ kai mbᵾ, Got ndi, ora ndurum kep, wamp minal ndi, Got nga ik tᵾk roi nduⱡina, elim ndi, kona kui waka purung mbila, ropa kundpa telinga, kolk warkele etᵾng.

Uⱡ itim mbᵾ ndi, tᵾn akup ora ndupa, wamp mat unt uⱡ kit mbᵾ etᵾk, numan pendᵾtᵾng ei mel, tᵾn akup iti nᵾtmin. Wote, Isrel wamp mat ndi, nde mel mat mim etᵾk mondᵾk, mbi paka rorung ei mel, tᵾn iti nᵾtmin. Buk Wingti ila nimba mel,

“Wamp mat mana molk, nu rᵾng mbᵾ nok, ui kai ti, ekit onum nᵾk, ambulk palk, wapra rok etᵾk morung,” nᵾtᵾm.
Tᵾn wapra rui uⱡ kit mbᵾ nga unt etᵾng ei mel, iti nᵾtmin. Unt wamp 23,000 uⱡ ei elingina, rumbᵾⱡ tenda ila, kolk pora ndurᵾng. Wote tᵾn ndi, Nuim ei, oⱡa tᵾpᵾn kᵾni nᵾkᵾnmin, unt etᵾng wamp mat mbᵾ, wimbᵾ ndi, ropa kundrum. 10 Wamp mat unt, Got kᵾn ik kungᵾndi wungᵾndi nilingina, wamp ropa kundi Anggelo ei ndi, wamp mbᵾ ropa kundrum. Uⱡ ei mel, tᵾn iti nᵾtmᵾn.

11 Uⱡ itim mbᵾ, wamp mat kandᵾk, pileing nimba, ora ndupa itim. Wote, tᵾn akup mᵾi kona ila mormᵾn wamp mbᵾ, ik mbᵾ pilip tᵾmin nᵾk, mbi rok mana ndurᵾng. 12 Ei kᵾn, wamp nam ti ndi, ronduⱡ mundᵾp, angᵾnt nᵾkᵾn pin ndam, mana pin ei nga, tᵾkᵾn mendkᵾn muⱡi! 13 Oⱡa tᵾpa kᵾni numan mat orum nimbᵾ, nim kᵾn mendpᵾⱡ mon, wamp kᵾn pora omba, mel nim kᵾn orum. Wote Got ndi, nimba mᵾi ropa ik nitim mbᵾ petᵾm. Ei nga, nim wak rui narᵾmba. Wote, oⱡa tᵾpa kᵾni uⱡ mat, ekit om ndam, elim ndi, nombuⱡa mam mat, ropa tᵾndangga, nim ronduⱡ mundkᵾn muⱡin.

14 Ei nga, na nga angmᵾn! Got kol ropa mbᵾ nga mbi paka rui uⱡ mbᵾ, wak rui!

15 Na enim kundᵾp nᵾnt ik ei, enim numan kun pᵾtmᵾn wamp kᵾⱡ ndi, kᵾmp tᵾk pilik kai itᵾi! 16 Wain nu ming ei, memp petᵾm ila tᵾn ndi, angge nimbun Kraist nga mema ila, tᵾn tᵾpa tenda etᵾm. Bret ei, tᵾn ndi, pok rormᵾn ei ndi, tᵾn tᵾpa tenda etᵾm. Memp petᵾm nu ming ei, Got kᵾn atinga roⱡmina, memp pendᵾtᵾm. Ei kᵾn, Kraist nga mema ei ndi, wamp pora tᵾpa tenda etᵾm. Wote, bret tenda puk rormin ni ndi, wamp pora etpa, Kraist kᵾn, kᵾng tᵾpa tenda etᵾm.

17 Nambuⱡ emel, bret tenda ei, tᵾn wamp ou ndupa nᵾmp pᵾnmᵾn, ei mon! Aldpa ombun, kᵾng tenda kᵾⱡ. Nambuⱡ emel, tᵾn bret tenda ila rᵾng mong normᵾn. 18 Isrel wamp mbᵾ, etmin mel pilᵾi! Nde pol wingti ila, Got kᵾn angge nᵾk ngormin rᵾng mbᵾ tᵾk normin. Uⱡ ila, Got kᵾn ok tenda etmin ku. 19 Na namba nᵾnt nᵾk pᵾnmᵾn? Rᵾng mbᵾ got kol rui kᵾⱡ kᵾn, mbi paka rok ngormin uⱡ, ei ronduⱡ? Muna, got kol rok mim etmin mel, ei ronduⱡ? 20 Ei mon! Na nᵾnt ik puⱡ ei. Wamp mat ndi, got kol mat kᵾn, rᵾng angge nᵾk ngormin uⱡ ni, kur kit mbᵾ nga etmin. Wote, Got kᵾn ngui nganggᵾrmin. Ei nga, enim kur kit mbᵾ kᵾn, puk kup iti nᵾteing nᵾmp nᵾnt. 21 Enim Oⱡa Nuim ei nga nu ming ila nu nok, wote kur kit mbᵾ nga nu ming ila nu nok iting uⱡ ei, kapⱡa mon! Wote, Nuim ei nga nde pol ila molk, rᵾng mong tᵾk nok, wote kur kit mbᵾ nga nde pol ila rᵾng tᵾk, nok iting uⱡ ei, kapⱡa mon ku. 22 Muna, Nuim ei ndi, tᵾn kᵾn wᵾlᵾk rangga, nᵾmp enmin ei? Tᵾn ndi kapⱡa, Nuim ei nga ronduⱡ ei, kapⱡa tᵾp mana nduimin ei?

Got Nga Mbi Paka Rundamin

23 Ik ei kupa, “Uⱡ mbᵾ pora, kapⱡa itimin mint,” nᵾtmin. Wote uⱡ mbᵾ pora kai mon! “Uⱡ mbᵾ pora kapⱡa itmin mint!” nᵾtmin. Wote, uⱡ mbᵾ ndi pora, tᵾn nga orunga tᵾpa rᵾpᵾndi napᵾndᵾmba. 24 Wamp ti ndi, el elim nga orunga kai moⱡmba ei nga mendpᵾⱡ, pili nᵾpᵾlangga, mon! Wamp ti ndi, ti rᵾp itangga pora molk, kai mundeing. 25 Kng rok tetmin manga mbila kng mbᵾ, kapⱡa rop rok, tᵾk nuing mint. Uⱡ ei nga, wᵾldi ik ti, pi napᵾtᵾm. Ei nga, numan ou ndupa, pili nᵾpᵾlᵾi! 26 Ei kᵾn, unt Buk Wingti ila ik kat ndi, nimba mel,

“Mᵾi ei kᵾn, wote ila nga rukᵾr tetᵾm mel mbᵾ pora, Nuim ei nga mint tetᵾm,” nᵾtᵾm.
27 Mondpa pili nᵾpili wamp ti ndi, rᵾng mat tepa, nim nᵾn ui nim ndam, rᵾng ei, nui mint. Rᵾng ei nga nuimp, muna mon nda, nᵾkᵾn, numan ou ndukᵾn pili nᵾpᵾli! Wote, ik mat waldᵾkᵾn, iti nᵾti! 28 Wote, wamp ti ndi, nim kundpa, nimba mel, Rᵾng ei, kur atinga rok, koik ngung nim ndam, wote wamp ei nga mondpa pili ei nga nᵾndkᵾn kᵾn, nim ik ei teng ndukᵾn, rᵾng mon nim, ei nui nᵾni! 29 Uⱡ ei, nim nga orunga ni nanᵾnt mon. Ik ei, nim wamp ei nga numan orunga etᵾk wang ndeing nᵾmp nᵾnt. Wote, enim wamp ti ndi, ruk ting ila molk, numan orunga waldᵾk pilik mel, na nga numan ila itimp uⱡ kᵾⱡ. Nambuⱡ emel, wamp ti nga numan pᵾtᵾm uⱡ ei ndi, na imp moⱡmba? 30 Na nga rᵾng nuimp ei, Got kᵾn angge nᵾmp tᵾp nᵾnt ndam, nambuⱡ emel, wamp ti ndi, na rᵾng angge nint kᵾⱡ nga, na kᵾn ik mura etmba?

31 Ei kᵾn, rᵾng nok, nu nok, nambuⱡ eng mbᵾ pora, Got mbi ou tangga nᵾk, pilik itᵾi! 32 Ei Jura wamp muna, mbo wamp muna, wote Got nga rapa tenda ila wamp mormin mbᵾ pora, uⱡ ti itangina wamp mbᵾ, ropa mana ndumba ei nga, tᵾk mendᵾk itᵾi! 33 Ei na ndi, wamp mbᵾ etᵾp, numan kai pindim nimp et, uⱡ mbᵾ mel itᵾi! Ei na nanim nga orunga, kai muⱡimp ei nga pili napilip, wamp mbᵾ pora, etᵾp numan kai pindimp nᵾmp pilip kongun et. Uⱡ mbᵾ, i tamba kᵾn, Got ndi, wamp mbᵾ, tᵾpa rapundpa etpa, peng kont tangga nᵾmp pilip et.

Copyright information for `MED