1 Corinthians 13

Wamp Numan Ngui Uⱡ Ei

Na ndi, wamp nga ik nuim kan elpa elpa mbila pilip nimp ku, wote anggelo mbᵾ nga ik nᵾtmin mbᵾ nimp ku. Wote, wamp numan ngui uⱡ ei nga, na nga rukᵾr orunga, ti natᵾm ndam, na nga ik nᵾt mbᵾ pora, nditing na ti, nᵾmᵾ rormin ni mel kapⱡa. Na ndi, rᵾnang ik ei nga puⱡ mbᵾ, pai nomp nimp ku, pilpa kungᵾndi ronduⱡ mbᵾ pilip, Got nga uⱡ mo ropa mbᵾ, pilimp ku. Wote, mondpa pili uⱡ ila ronduⱡ mbo komnga mong mbᵾ, nᵾmp guⱡa nduimp ku. Wote, wamp numan ngui uⱡ ei, na kᵾn rukᵾr orunga, ti natᵾm ndam, na wamp wei mendpᵾⱡ ei. Na ndi, na nga mel tet mbᵾ, wamp kurpa mbᵾ, kᵾmp tᵾp nguimp ku, ei mel etᵾp mbo, na nga kᵾng ei pora, tᵾp ndip ila oⱡa nduimp ku. Wote, wamp numan ngui uⱡ ei, tep muⱡi nᵾmᵾnt ndam, uⱡ nᵾnt mbᵾ ndi, na kapⱡa tᵾpa rᵾpᵾndi napᵾndᵾmba. Wamp numan ngui uⱡ ei, rᵾk rᵾk wamp mat nga nokundᵾk muⱡᵾmᵾn. Uⱡ mbᵾ kandᵾk tᵾk, uⱡ kun kai mbᵾ mint etmin. Wote wamp ti, mel kai tepa morum ei nga kandᵾk, popᵾⱡ mondᵾk, wᵾlᵾk rui narᵾk, wote ambulk puⱡi uⱡ mbᵾ, mon ku. Wamp numan ngui uⱡ ei nga kara pi napᵾk, ik tᵾk roi ndui nandᵾk, el elim nga ou ndupa pili napilpa, elim kᵾn uⱡ ⱡawa etmin mbᵾ nga ou ndupa pili napᵾtᵾm mon! Wamp numan ngui uⱡ ei, uⱡ kit mbᵾ kᵾn pora, el puⱡa wamp mel morum. Wote, ik kupa mint ni, uⱡ ei nga ambulk palk mormin. Wamp numan ngui uⱡ ei, enim kᵾn rᵾk rᵾk pepa mint pangga! Wote, Got kᵾn, wamp mbᵾ kᵾn, mondᵾk pᵾtmᵾn uⱡ ei, pepa mint pangga! Got ndi, etpa tᵾmba ei nga kel rondᵾk molk, mbun koma rui uⱡ ila, ronduⱡ puk molk etmin.

Got nga Rᵾnang Ik pai nok nᵾtmᵾn, wote ik nuim kan elpa mbila ik nimbun, wote pilpa kungᵾndi ronduⱡ pᵾtmᵾn uⱡ mbᵾ, tᵾnggᵾt pora nimba. Wote, wamp numan ngui uⱡ ei, uⱡ nga kᵾnt nga kont tepa mint mba. Akup pilpa kungᵾndi ronduⱡ, onunga kᵾralt gem nguⱡnga pilik mormin. Wote, Got nga ik onunga kᵾralt ku nᵾnmin. 10 Wote tᵾnggᵾt, uⱡ mbᵾ nga uⱡ kupa ei, ekit om ei kᵾn, uⱡ oⱡa wei wei etᵾp enmin uⱡ mbᵾ, pora nimba. 11 Unt na kangambuⱡa kel kᵾn, na nga ik nᵾmp, nombuⱡa andᵾp, numan pilip it uⱡ mbᵾ, kangambuⱡa kel nga uⱡ mbᵾ mel it. Wote, akup wu raⱡᵾp mor ei kᵾn, kangambuⱡa kel nga uⱡ mbᵾ, wak rop pora ndur. 12 Akup tᵾn nga mong ei ndi, mel kanmin mbᵾ piral ni nanᵾnᵾm. Nu moimbuⱡ ila, tᵾn nga kuimp keta kandurmᵾn ni mel kanmᵾn. Wote tᵾnggᵾt, uⱡ kupa ila, Got nga kuimp keta ei kun kᵾnmin. Akup na uⱡ mbᵾ, onunga etᵾp pilip mor, wote uⱡ kupa ila, Got ndi, na pᵾtᵾm ei mel, elim i ku etᵾp pilimp.

13 Wote, akup Got kᵾn mondᵾp pᵾtmᵾn uⱡ ei kᵾn, Got nga kel rondpᵾn nukundmin uⱡ ei kᵾn, wote ti wamp numan ngui uⱡ ei. Uⱡ raldika kᵾⱡ nga, uⱡ kupa ronduⱡ itmin ei, wamp numan ngui uⱡ ei.

Copyright information for `MED