1 Corinthians 15

Jisas Koⱡpa Tikil Rurum

Angmᵾn! Na ndi, Rᵾnang Ik Kai ei, unt enim kᵾn nᵾmp ngur. Ni nga aldpa, enim nga numan orunga rop rut ndup nᵾnt. Enim ndi, Rᵾnang Ik Kai ei, ambulk gi nduk tilingina, akup enim nga mondpa pili orunga ronduⱡ punum. Rᵾnang Ik Kai nᵾmp ngur ei, pilik tᵾk, ambulk gi nduk moⱡung ndam, enim ik ei ndi, etpa tᵾmba. Mon ndam, enim kol rok, nowa mondᵾk pᵾtᵾng uⱡ ei ndi, enim ik ei ndi, etpa tᵾmba mel mon!

Na pilip tit ik kᵾⱡ, enim mbo indᵾt ni kᵾⱡ, ik ronduⱡ kai kᵾⱡ. Kraist tᵾn nga uⱡ kit mbᵾ nga kurum timan ik ei, Buk Wingti ila pᵾtᵾm. Kraist ei, wamp on kona ila anggᵾtᵾng. Wote, rumbᵾⱡ raldika omba puⱡnga, ⱡoporpa tᵾpa oⱡa mundrum. Ei Buk Wingti ila rok pendᵾtᵾng. Wote Pita kᵾn, kuimp tepa purum, wote akil tepa, elim nga kitip kᵾni wu 12 kᵾⱡ kᵾn purum. Wote Jisas ni, akil tepa, elim nga ᵾngᵾnᵾl wu 500 morung kᵾⱡ kᵾn, tᵾngᵾnda purum, ᵾngᵾnᵾl mbᵾ nga mat korung, wote ou ndupa mel, akup kont mormin. Wote, Jeims kᵾn mba, wote elim nga nombuⱡa rung wu mbᵾ kᵾn pora purum. Wote, ama akil tepa, Jisas na kᵾn oⱡnga, na nga mong raⱡ ndi kᵾndᵾr. Kangambuⱡa ti mam ndi, ui kai ila mepa, kit mondrum uⱡ ni mel, na mendpᵾⱡ mur.

Nombuⱡa rung wu mormin mbᵾ nga mana orunga na mor. Na nombuⱡa rung wu kapⱡa muⱡimp, mel mon! Nambuⱡ emel, na ndi, Got nga rapa tenda ila wamp mbᵾ etᵾp, kit mundᵾr. 10 Wote, Got nga wamp poⱡ ti uⱡ ila, na akup mor. Wote, na poⱡ titim uⱡ ei, tᵾp mbuⱡ ngui ngᵾnggᵾr mon! Na ndi, nombuⱡa rung wu mbᵾ, tᵾp mana ndup, na kongun ronduⱡ mundᵾp it. Uⱡ ei, na nga ronduⱡ ti mon. Got na poⱡ ti uⱡ ei nguⱡnga kongun it. 11 Ei nga, nombuⱡa rung wu wei mbᵾ kep, na kep, tᵾn ik tenda ei mint nilmina, enim pilik mondᵾk pᵾtmin.

Korung Wamp Mbᵾ Wote Tikil Ruing

12 Tᵾn ik nimbun kᵾn, Kraist ei koⱡpa, wote ⱡoporpa oⱡa murum nᵾtmᵾn. Wote, enim wamp mat ndi, korung wamp mbᵾ, wote ui tila ⱡoprᵾk, oⱡa muⱡi nᵾmbᵾⱡing nᵾtmin ei, etᵾk pilik nᵾtmin mel nant? 13 Ik enim ninmin ei, kupa ndam, Kraist ei koⱡpa, wote tikil rui nᵾrᵾrᵾm nᵾnmin. 14 Wote Kraist ei, koⱡpa tikil rui nᵾrᵾrᵾm nᵾng ndam, tᵾn ik wei nᵾmᵾ nᵾtmᵾn nᵾk piling. Wote, enim kai kandᵾk, nᵾwa mondᵾk pᵾtmin. 15 Ei mel ndam, tᵾn Got nga ik ei kep, nombun nᵾtmᵾn. Nambuⱡ emel, unt tᵾn ndi, ik nimbun kᵾn, Got ndi, Kraist ei ⱡoporpa tᵾpa, oⱡa mundrum nᵾtmᵾn. Wote, unt korung wamp mbᵾ, ui tila ⱡoporpa tᵾpa, oⱡa mundi namᵾndᵾm ndam, wote kupa Got ndi, Kraist ⱡoporpa oⱡa tᵾpa, kont mundi nᵾmᵾndᵾmba ku. 16 Wote, wamp korung mbᵾ, ⱡoporpa ti natᵾmba ndam, Kraist ei ⱡoporpa tᵾpa oⱡa kont mundi namᵾndᵾⱡnga ku. 17 Wote Kraist ei, ⱡoporpa tᵾpa, oⱡa mundi nam nduⱡnga ndam, enim nga mondpa pili, kai ti mon! Enim nga uⱡ kit etᵾng mbila, ropa wᵾlᵾ munduⱡnga, tiki polk mormin mint. 18 Ei kᵾn wote, Kraist kᵾn mondᵾk pilik korung wamp mbᵾ, tiki polk mormin ku. 19 Tᵾn Kraist mondᵾp pilpᵾn, elim nokundpᵾn moⱡᵾp, kai mondpᵾn, wote ya mᵾi kona ila mel tetᵾm mbᵾ nga, pilpᵾn muⱡmin ndam, wote wamp mbᵾ ndi, pilik kont kulk, tᵾn kont kuⱡing.

20 Wote, Kraist kurum ei nga, Got ndi, ⱡoporpa tᵾpa, oⱡa mundrum nᵾnmin ik ei, ama kupa mint. Wamp unt korung mbᵾ, ⱡoprᵾk oⱡa muⱡing ei nga, Jisas ndi, unt nombuⱡa ora ndurum. 21 Wamp kuⱡi uⱡ ei, wu tenda ti ndi, etpa oⱡa titim ndam, wamp kolk kont muⱡing uⱡ ei, wu tenda ti ndi, ku itim. 22 Uⱡ ei nga, Andam nga rᵾⱡaip ila wamp mbᵾ, kuⱡing mint. Wote, ei mel ku, Jisas nga rᵾⱡaip ila mormin wamp mbᵾ, wote rᵾt nᵾk kont muⱡing. 23 Wote elim ndi, to ropa pinditim ui ila, tᵾn wamp tenda tenda nimbun rut nimbun muⱡmin. Kuimp tepa ei Kraist, wote elim yant omba ui ila, elim nga wamp rᵾⱡaip mbᵾ, rᵾt nᵾk oⱡa muⱡing. 24 Ui ei kᵾn, mel mbᵾ pora, nimba kelmba. Kraist ndi, ya mᵾi kona nga gapman kona mbila, wu nuim elpa elpa monmin. Wote, kur kit mbᵾ nga ronduⱡ tetmin uⱡ mbᵾ pora, etpa pora ndumba. Wote, ui ei kᵾn ku, Jisas elim wu Nuim Mumuk moⱡpa, Tipam nga wamp tᵾpa mumuk rui kongun ronduⱡ mbᵾ pora, elim nga Tipam Got kᵾn ngumba, rukᵾr ndumba. 25 Kraist ei, Nuim moⱡpa mint pangga, wakᵾt Got ndi, elim nga el rui wamp mbᵾ tᵾpa, Jisas nga kᵾmp puⱡ mana orunga mundangga mint, kapⱡa etmba. 26 Tᵾn nga el rui wu ti, Got ndi, akil tepa etpa pora ndumba, wamp kᵾⱡi peng ei. 27 Buk Wingti ila mon petᵾm ei ndi, nimba mel,

“Got ndi, mel mbᵾ pora tᵾpa, elim nga kangᵾm nga kᵾmp puⱡ ila tinditim,” nᵾtᵾm.
“Mel mbᵾ pora,” nimba ik ei ndi, Got elim mana orunga muⱡi nambᵾrᵾm. Nambuⱡ emel, Got elim ndi, namba mel mbᵾ, ruk tᵾpa, Kraist nga kᵾmp mana orunga tendᵾmba?
28 Wote, mel mbᵾ pora, Kraist nga mana orunga tᵾpa tendpa pora ndangga. Wote, Got elim nga kangᵾm, Got Tipam kᵾn rukᵾr mba, mana orunga muⱡᵾmba. Wote ila nga, Got elim puⱡ wu ei ndi, mel mbᵾ nga pora, tᵾpa rak ndupa, Nuim Mumuk moⱡmba.

29 Aldpa, ik nᵾmp ngunt mbᵾ, ik kol rop nint ndam, enim wamp mat ndi, unt korung wamp mbᵾ tᵾp rᵾpᵾndmin nᵾk, nu tᵾtmin uⱡ ei, etᵾk iting mel nant? Wamp korung mbᵾ, tᵾnggᵾt ⱡoprᵾk, oⱡa muⱡi nᵾmbᵾⱡing nᵾng ndam, nambuⱡ emel, wamp korung mbᵾ nga nᵾndᵾk, nu tᵾtmin? 30 Wote, tᵾn nombuⱡa rung wu kᵾⱡ, nambuⱡ emel, ui mbila rᵾk rᵾk wamp kui peng ila ruk mbun, wote ekit ombun itmin? 31 Angmᵾn, ui mbila rᵾk rᵾk, wamp kui nga uⱡ ila, na ruk mbo mint mor ndi ka! Na enim kᵾn kont mul uⱡ ei nga, Kraist Jisas kᵾn kandᵾp tᵾp, numan kai pelinga, ik ei nᵾmp ekit ndunt. 32 Met Episis kona ila, na ndi, mᵾi kona ila wamp mbᵾ nga numan mbᵾ, kandᵾp tᵾp kᵾn, mel rakra kᵾⱡ kᵾn, el roⱡᵾmba ndam, namba mel ti ekit tilimba? Wote, wamp korung mbᵾ, wakᵾt tikil nᵾring ndam, wote ik ti nᵾk kᵾn, “Utᵾma kuⱡmin ei ka, nu rᵾng mel mbᵾ akup namin!” nᵾtmin ik ni, wak ramin. 33 Ni kᵾn, wote wamp mat ndi, enim tᵾk tiki punding. Uⱡ ⱡawa etmin wamp mbᵾ kᵾn, rup rumᵾn ndam, tᵾn nga uⱡ kai etmin mbᵾ, etᵾk kit munding. 34 Enim nga numan mbo ingk ei, kandᵾk tᵾk, uⱡ kit etmin mbᵾ wak rᵾi! Int enim nga ruk ting ila wamp mat, Got pilik mbi ndui nandᵾrmin. Ei nga, uⱡ kit etmin kᵾⱡ nga pilik mbi nduk, pipil kuⱡing nᵾmp kᵾn ik ei nᵾnt.

Wamp Kolk Tikil Rong Kᵾn Namba Kᵾng Ting

35 Wote, wamp nam ti ndi waldpa, nimba mel, “Wamp korung mbᵾ, ⱡoprᵾk kont muⱡing mel nant? Wote kᵾng namba kᵾng tᵾk ⱡoprᵾk kont muⱡing?” nitim. 36 Nim numan mbo petᵾm muna mon? Nim kᵾnapa mong, muna rᵾng mong mbo nant ti, rarᵾn ei koⱡpa, kai em ndam ku, rᵾng mbo nant ti, rᵾn ei nga, kont ti ku, mᵾlᵾ romba. 37 Wote kᵾnapa, muna rᵾng mbo, nant ti rarᵾn ei, mong ei mendpᵾⱡ, mᵾi ila rarᵾn. Wote, mᵾlᵾ ropa oⱡa omba ongum etpa, kuk rorum ei, rᵾⱡi nakᵾrᵾn mon. 38 Rᵾng mong nant ti rarᵾn. Ei wote, mᵾlᵾ ropa oⱡa omba, namba ongum ropa, kuk pepa etmba ei, Got elim ndi, etpa pendᵾtᵾm. Wote, rᵾng mong mbo elpa elpa mbᵾ, Got elim ndi, ku etpa, ongum rondpa kuk rondpa etᵾm. 39 Wote, mel mem pi mbᵾ pora, kᵾng tenda ei nga kuⱡi nakᵾrmin mon! Wamp ei, kᵾng ti kurmin, kng owa mbᵾ kᵾng ti ku, kᵾi ei kᵾng ti ku, oma ei kᵾng ti ku kurmin petᵾm. 40 Wote, oⱡa muⱡ ila mel tetᵾm mbᵾ, mon elpa ti ku purum. Wote, mana mᵾi ila mel elpa elpa mbᵾ nga tetᵾm ku. Oⱡa kona muⱡ ila mel tetᵾm mbᵾ, mon ei elpa ti ku. Wote, mana mᵾi ila namba mel tetᵾm kanmᵾn mel mbᵾ, mon elpa ti ku purum. 41 Kona ant ei, elim mon purum uⱡ ei ti ku, wote kona kalimp ei, mon ti nga ku purum. Wote, mipil rangᵾnt mbᵾ, mon ti ku purum. Wote mipil rangᵾnt mbᵾ petmin ei nga ruk ila, en enim elpa elpa mon ti ku purum.

42 Wamp korung mbᵾ, ⱡoprᵾk kont moⱡung kᵾn, uⱡ ei mel ku pemba. Koramin kᵾng kᵾⱡ mᵾi ila angᵾndᵾtmᵾn. Wote, rut nimba moⱡmba kᵾng kᵾⱡ, wote kᵾⱡi naⱡᵾmba, kont mba uⱡ nga kᵾnt nga kont moⱡpa, mint mba. 43 Wamp kᵾng kᵾⱡ, ronduⱡ ti mon, korum ei kᵾn kit moⱡnga, mᵾi ila on etmin. Wote, wakᵾt tikil rom ei kᵾn, kᵾng mon pi ronduⱡ kai wei ti ku tᵾmba. 44 On etmin kᵾng kᵾⱡ, mᵾi kona ila mendpᵾⱡ, kᵾng mendpᵾⱡ kᵾⱡ, wote rᵾt nimba moⱡum ei kᵾn, kᵾng kᵾⱡ muⱡnga nga kona kᵾng waⱡᵾm kᵾⱡ. Ya mᵾi kona nga namba kᵾng kuⱡᵾp mormin ei nga, muⱡnga nga kona kᵾng ei nga ku tetᵾm. 45 Buk Wingti ila nimba mel,

“Got ndi, wu puⱡ mondpa itim ei, Andam ei mel min pi ei, mim itim,” nᵾtᵾm.
Wote, wu Andam akil tepa ei, wamp pora kont mul uⱡ ngorum ei nga Muⱡnga ei.
46 Muⱡnga ei kuimp tepa mon, min pi mel ei kuimp tepa oⱡnga, wote muⱡnga ei akil tepa orum. 47 Andam kuimp tepa ei, mᵾi kᵾnggᵾpᵾn ila oⱡa tᵾpa itim. Andam akil tepa ei, muⱡ kona moⱡpa mana urum. 48 Tᵾn mᵾi kona ila wamp mormᵾn mbᵾ pora, mᵾi ei ndi, mim itim ei mel kapⱡa mormᵾn. Wote, tᵾn muⱡ kona timin wamp ei, muⱡ kona wu ei mel, kapⱡa kᵾng timin. 49 Mᵾi ila mim itim wu ei nga kᵾng tᵾtmᵾn, ei mel ku, wote tᵾn muⱡ kona wu kᵾng tᵾtᵾm ei nga ku, kᵾng timin.

50 Angmᵾn! Na nᵾnt ik ei nga puⱡ ei, ei mel, kᵾng mem petᵾm mim itim mel ei, Got nga wamp tᵾpa mumuk rui kona ila kapⱡa rukᵾr pi napᵾmba. Wote, kit moⱡpa korum mel ei ndi, kont rᵾk rᵾk temba mel ei, kapⱡa ti natᵾmba. 51 Ik mo ropa petᵾm ti, nimp ent ik ei pilᵾi! Tᵾn wamp pora kuⱡi nᵾⱡmin! Tᵾnggᵾt muⱡ mᵾi raⱡ pora nim ui ila, Got nga pikul ik ei pilamina, tᵾngᵾnda mint, tᵾn wamp mbᵾ, tᵾp ropᵾl ropᵾn, kont moⱡpa mint pi, kᵾng kont kᵾⱡ timin. Pikul ik ei nim kᵾn, wamp korung mbᵾ, tikil rok kont muⱡing, wote tᵾnggᵾt kuⱡi nᵾⱡing mon! Wote, tᵾn kont mormin wamp ei, kit kᵾng kᵾⱡ wak ropᵾn, kᵾng kont tenda ei nga timin. 53 Ei kᵾn, kit moⱡmba kᵾng kᵾⱡ ndi, kit muⱡi nambuⱡmba, kᵾng kont kᵾⱡ tᵾpa, pakᵾmba mint. Wote, wamp kormin kᵾng kᵾⱡ, aldpa tᵾpa ropᵾl ropa, wamp kuⱡi nakᵾrmin kᵾng kont kᵾⱡ, tᵾpa pakᵾmba mint. 54 Ei nga, kit morum kᵾng ei ndi, kit muⱡi nambrᵾm kᵾng kᵾⱡ nga tangga! Wote, korum kᵾng kᵾⱡ ndi, uⱡ nga kᵾnt nga kont temba kᵾng ei tᵾmba. Ei kᵾn, Buk Wingti ila, Got nga ik unt rorung ei omba, pena ila pemba,

“Got ndi wamp kuⱡi peng ei, el etpa tᵾpa, ropa wei etmba!” nitim.
55 “Wamp kuⱡi peng ye! Nim el etkᵾn int pindin ei nga ronduⱡ ei nant? Wamp kuⱡi peng ye! Nim wamp etᵾk kondrᵾn ei nga ronduⱡ ei nant?” nᵾtᵾm.
56 Uⱡ kit mbᵾ ndi, wamp kuⱡi peng ei, ronduⱡ nguⱡnga, wamp etpa kondrum. Wote, uⱡ kit mbᵾ pora, mi ik ila ronduⱡ tᵾtᵾm. 57 Wote, Got kᵾn angge namin! Tᵾn nga Nuim Jisas Kraist nga ronduⱡ ila, Got ndi, tᵾn ronduⱡ nguⱡnga, tᵾn el etᵾp int pendᵾtmᵾn.

58 Ei nga, na nga angmᵾn kupa kᵾⱡ! Enim ronduⱡ puk muⱡᵾi! Nuim ei nga kongun enim ngurum mbila, muⱡ ti natᵾk, rᵾk rᵾk etᵾk mint muⱡᵾi! Ei nambuⱡ emel, enim pᵾtmin ni, Nuim ei nga kongun endᵾng ila, etᵾk wei pi nᵾping mon!

Copyright information for `MED