1 Corinthians 16

Got Nga Wamp Tᵾpa Rᵾpᵾndi Ku Moni

Akup ik nimp ent ei, Juriya kona ila nga Got nga wamp mormin mbᵾ nga ku moni nguimin nᵾtᵾng ik ni nga, enim Korin wamp mbᵾ, kundᵾp nimp ent. Na ndi, Galesiya kona ila nga manga wingti kona kel elpa elpa mbila, anggᵾtᵾm mbᵾ kᵾn, ik nit ei mel ku itᵾi! Enim kongun etᵾk, ku moni tᵾtmin mbᵾ nga mat, rᵾk rᵾk kor ou kᵾn, tᵾk mou rok muⱡᵾi! Wote, na enim kᵾn unt ei kᵾn, ku moni mat wang ndup, enim kᵾn andᵾp ti nᵾteimp. Enim kᵾn omp ruk unt ei kᵾn, na ndi, mon ti rop, enim nga ku moni nguing kᵾⱡ kᵾn pendᵾp, enim nga wu kandᵾk tᵾng kᵾⱡ kᵾn, ngump mundamba mek, Jerusalem kona ila ping. Wote, na kunda mbin mel pem ndam, wote wu kᵾⱡ na kᵾn, rup rop mbin.

Pol Ndi, Korin Wamp Kᵾⱡ Kᵾnimp Nimba Pitim

Na Masaroniya kona ila mbo kᵾn, wote int enim kᵾn uimp. Ei nambuⱡ emel, na Masaroniya kona ila rukᵾr mbo kᵾn, wote enim kᵾn akil tep uimp. Kona ᵾt etᵾm ui ei kᵾn, na enim kᵾn moⱡᵾp ui mat, tᵾp mundimp nᵾmp pᵾnt. Wote, kona ila nga moⱡᵾp kᵾn, kona nant tila mbi ei kᵾn, na tᵾk rᵾpᵾndeing. Enim pilik mormin ei, na ndi, enim kᵾn omp moⱡᵾp, roⱡ pi nᵾpimp ei, numan iti natᵾnᵾm. Nuim ei ndi, na kapⱡa nilinga ndam, enim kᵾn omp moⱡᵾp, ui ruⱡ etᵾp tᵾp munduⱡmba. Wote, na Episis kona ila mbᵾ moⱡᵾp, (wit ropa rorum ui ei kandᵾp timp) Pendikos. Kona ila na nga el rui wamp mat mormin kep, kongun ronduⱡ kai itimp mbᵾ tetᵾm kant.

10 Wote, Timoti enim kᵾn om ndam, nokundᵾk kai etᵾk, uⱡ kai mbᵾ ndᵾi! Wu ei, na Nuim ei nga kongun endᵾt ei mel ku etᵾm. 11 Enim wamp nam ti ndi, kang wu ei, tᵾk mbuⱡ ngᵾk uⱡ ti, iti nᵾtᵾi, mon! Timoti tᵾk rapᵾndᵾk etangina, nombuⱡa mba ila, numan kai pilpa mba, wote na kᵾn yant wangga! Na ndi, nokundᵾp mor ei, angmᵾn mat kᵾn, kunda rup rok uing nᵾmp kandᵾp mor.

12 Wote, tᵾn nga ana Apolus ni, angmᵾn kat kᵾn, int weing nᵾmp, ronduⱡ mundᵾp nᵾt. Ei wote, akup omba mel, kapⱡa iti natilinga morum. Omba mel pem ui tila omba mint.

Memp Ik Kᵾⱡ

13 Enim tᵾk mendᵾk, mondpa pili ora ronduⱡ mundᵾk muⱡᵾi! 14 Enim wamp numan nguk kongun etᵾk muⱡᵾi!

15 Stepanas kᵾn, elim nga wamp mbo kᵾⱡ kᵾn, morung uⱡ ei, enim pilik mormin. Grik kona ila wamp mbo kᵾⱡ, kuimp tek numan ropᵾl rok, wote en enim nga numan orunga mana nduk, Got nga wamp mbᵾ nga nᵾndᵾk, kongun enditing. Angmᵾn, enim mana tep waldᵾnt ei, rᵾp wamp i etpa mbᵾ kᵾn, wote wamp mbᵾ nga mana orunga molk, kongun endᵾtmᵾn mbᵾ nga uⱡ etmin mbᵾ, kitip kandᵾk pep rok itᵾi! 17 Wu Stepanas, Potunatus, Akaikus na kᵾn orung kᵾⱡ nga numan enim. Enim na kᵾn oⱡina, koⱡ ila wote wu kᵾⱡ orung. Wu kᵾⱡ enim etᵾk, numan kai pendᵾtᵾng ni mel, na kᵾn i ku etᵾk, numan kai pendᵾtᵾng. Wu i etpa mbᵾ nga kaip nᵾndᵾmin.

19 Eisiya mᵾi kᵾmp ila nga atinga manga anggᵾtᵾm mbᵾ ndi pᵾkᵾ, enim kᵾn, rawe ik kai mbᵾ nᵾk mundᵾnmin. Akuila kᵾn Prisila raⱡ kᵾn, wote wamp raⱡ nga manga ila tᵾk mou rormin wamp kᵾⱡ ndi pᵾkᵾ, Kraist nga mbi ila, enim kᵾn, rawe ik kai mbᵾ nᵾk mundᵾnmᵾn. 20 Ya ila nga angmᵾn mormᵾn kᵾⱡ ndi, enim kᵾn, rawe ik kai mbᵾ nᵾk mundᵾnmᵾn ku. Wote, tᵾn Got nga wamp moⱡpᵾn kᵾn, int enim nga wᵾng orunga wamp angmᵾn mbᵾ kᵾn, ki tᵾk, keta nu rok nok itᵾi!

21 Na nga ki ila mendpᵾⱡ, ya mon kᵾⱡ ront. Na Pol ndi, enim kᵾn, rawe etᵾp mundunt. 22 Wamp nam ti, Nuim ei numan ngui ngangᵾm ndam, wamp ei kit muⱡangga! Tᵾn nga Nuim ei wangga! 23 Nuim Jisas nga wamp kont kaimp kul uⱡ mbᵾ, enim kᵾn kan piyangga!

24 Kraist Jisas nga mbi ila, na nga numan ei, enim kᵾn tep pora ndunt.

Copyright information for `MED