1 Corinthians 4

Kraist Nga Nombuⱡa Rung Wu

Enim ndi, tᵾl wu raⱡ Kraist nga kongun kindmant wu, Got nga ik kupa mo ropa tetᵾm kᵾⱡ, rᵾp itimbil nimba, tᵾpa mundrum nᵾk pilᵾi! Uⱡ ronduⱡ ti, wu Nuim ei ndi, elim nga kongun kindmant wu ei ndi, indangga nimba pitim ei, elim nga ik kum tepa, kongun pip ropa itangga, nimba pᵾtᵾm. Ei kᵾn, akup wamp mbᵾ ndi kep, enim ndi kep, na Pol nga uⱡ et mbᵾ kᵾmp tᵾk, piling ei nga, tᵾp ou ndui nandᵾnt. Na ndi kep, na nanim nga uⱡ et mbᵾ, kᵾmp tᵾp pili nᵾpilimp ku. Na nga numan mbo ronduⱡ ei, piral nimba tetᵾm. Ei wote, na nanim ndi, na kai mor ni nanᵾnt. Oⱡa Wu Nuim ei ndi, na kᵾmp tᵾpa kanᵾmba! Ei nga, enim ndi, ui kupa ei, ui nᵾwi kᵾn, wamp ti nga uⱡ em mbᵾ, unt kᵾmp ti nᵾtᵾi! Oⱡa Nuim ei ndi omba, wamp kᵾmp ti uⱡ ei omba etmba, ei nga nokundᵾk muⱡᵾi! Elim ndi, uⱡ mo ropa tetᵾm mbᵾ, tᵾpa pena rᵾⱡang ila pendᵾmba. Wote, wamp nga numan rukᵾr orunga uⱡ mo ropa petᵾm mbᵾ, rᵾⱡang ila tᵾpa mot ndumba. Wote, ui ei kᵾn, Got ndi, tᵾn wamp mbᵾ kongun itmᵾn ei, mbi ou ti uⱡ ei, wamp elpa elpa mbᵾ ngumba.

Angmᵾn, enim nga nindᵾp nanim kᵾn, Apolus kᵾn, to tᵾp ik nᵾnt mbᵾ, enim pilik teing. Wote, tᵾl nga tou tᵾp nᵾnt ik mbᵾ ndi, mon ei mel, rok pendᵾtᵾng ik ei, pilik poⱡ ndeing. Na kᵾn rᵾⱡaip rok pendᵾtᵾng uⱡ mbᵾ, kandᵾk poⱡ nduk pep rᵾi! Ei kᵾn, wamp ti numan ngᵾk ti, tᵾk pei mundᵾk iti nᵾtᵾi! Ei nga, enim nam ndi, wamp elpa mat nga oⱡa orunga muⱡᵾi nitim? Enim tek mormin mel mbᵾ, Got ndi, ngui ngᵾnggᵾrᵾm ei? Wote, enim tek mormin mel mbᵾ, Got ndi, ngurum ndam, nambuⱡ emel, enim nga kᵾng orunga, mek oⱡa puk mel mbᵾ, en enim nga ronduⱡ ila, kandᵾp titmᵾn nᵾk enmin?

Enim kurᵾrᵾng mel mbᵾ kurᵾk kandᵾk tᵾk tek mormin. Enim kng mel mbᵾ nga kapⱡa elinga mormin. Tᵾn wu Nuim mumuk muⱡi nambᵾrmᵾn. Ei wote, enim wu nuim mumuk mormin. Na nga numan ei ndi, enim wu nuim mumuk muⱡangina, wote tun pora, wu nuim mumuk moⱡmina, ndam pᵾp. Na pᵾnt ei, Got ndi, tᵾn nombuⱡa rung wu kᵾⱡ wamp molk pᵾnmᵾn ei nga tᵾn wu mbi mul nᵾmbil kᵾⱡ tᵾpa mundrum. Punt mong wamp na ti tᵾk, wamp mormin pena ila mondᵾk rok kondurmin ni mel, tᵾn kapⱡa mormᵾn. Wote uⱡ ti, tᵾn nombuⱡa rung wu kᵾⱡ, muⱡ kᵾmp mbᵾ nga wamp mormin mbᵾ nga kep, wote anggelo mormin mbᵾ nga kep, kuimp keta ila tᵾn tᵾk pei mundᵾk etmin mbᵾ kandurmin. 10 Tᵾn Kraist nga nᵾndpᵾn etmᵾn uⱡ mbila, tᵾn pilpa kun iti nᵾti wamp ranmᵾn. Wote, enim Kraist kᵾn kup etᵾk mormin ei, pilpa kungᵾndi wamp kᵾⱡ mormin. Tᵾn ronduⱡ ti mon, wote enim ronduⱡ tek mormin. Enim nga mbi oⱡa punum, wote tᵾn nga mbi mana punum. 11 Unt moⱡᵾp urmᵾn ui mba, akup ant ila tᵾn kump kun pepᵾn, nu waka kuⱡpᵾn, mel ping mbᵾ raⱡpᵾn, tᵾmbᵾⱡ mondpᵾn, wote kona tila koⱡ etpᵾn muⱡi nambᵾrmᵾn. 12 Tᵾn tᵾn kongun ronduⱡ mundpᵾn etpᵾn, kᵾng orunga mel mbᵾ kandᵾp tᵾtmᵾn. Tᵾn kᵾn, ik mbuldung orunga ni nandᵾtmᵾn ila, tᵾn ndi, memp ik kai mbᵾ nᵾmp ngurmin. Tᵾn mindil ngurmin ei kᵾn, mindil ei ronduⱡ mundpᵾn wak rondurmᵾn. 13 Tᵾn ik mura ngurmin ei kᵾn, raka nimbun punt ropᵾn ik kai mbila nᵾtmᵾn. Unt omba, wote akup ui ila kep, ya mᵾi kona ila nga rᵾng punt kona ni mel, tᵾn nombuⱡa rung wu kᵾⱡ mormun.

14 Na mon rop ngunt ik kᵾⱡ, enim etᵾp pipil kundimp nᵾmp, ni nanᵾnt mon. Enim na nga kangambuⱡa waⱡᵾm kᵾⱡ nga man ngump nᵾnt. 15 Wote, enim Kraist nga uⱡ mbila, ik mbo wamp 10,000 mel mondurmin ndam, wu tipam tenda mint morum. Enim Kraist Jisas kᵾn mormin puⱡ ila, na enim nga tipam mel moⱡᵾp kᵾn, enim Rᵾnang Ik Kai ei mep omp ngur. 16 Ei mel ku, enim na ent uⱡ mbᵾ mel kandᵾk, pep rok itᵾi nᵾnt. 17 Uⱡ ei nga nᵾmp, Kraist nga kongun uⱡ mbila, na nga numan ngont kangᵾm waⱡᵾm ei, kang wu Timoti ei, enim kᵾn tᵾp mundunt. Kang wu ei ndi, na Kraist Jisas nga kitip kandᵾp, nombuⱡa andᵾp wamp ik mbo endᵾp et uⱡ mbᵾ, enim kᵾn omba, numan orunga nimba piral ndumba.

18 Enim wamp mat ndi, na enim omp, kᵾni nᵾkᵾnimp nᵾk pilik, enim nga ruk ting ila wamp mat ik tᵾk roi ndunmin. 19 Wote, Nuim ei ndi, na enim kᵾn uimp nim ndam, int nondpa uimp. Omp kᵾn, ik tᵾpa roi ndui wamp kᵾⱡ nga ik ei mint, pili nᵾpilimp, mon. Kongun etᵾk uⱡ etmin mbᵾ nga ronduⱡ ei kᵾnimp ei nga uimp. 20 Uⱡ ei itimp ei, nambuⱡ emel, Got nga wamp tᵾpa mumuk rui uⱡ ei nga ik ei, mendpᵾⱡ mon. Wote ronduⱡ ei, pendpa mint orum. 21 Na ndi, namba uⱡ ti, enim kᵾn iteimp nᵾk pᵾnmᵾn? Kan pilda ronduⱡ mep omp, enim kan pilda rop tᵾp kun mundeimp nᵾk pᵾnmᵾn, muna koma pou raⱡ tep, numan wang ndup, enim kᵾn uimp nᵾk pᵾnmᵾn?

Copyright information for `MED