1 Corinthians 8

Kur Atinga Rok Rᵾng Normin Ei Nga Ik Mat

Akup ik kol got, mbi paka rok rᵾng normin ei nga ik mat, punt rop nimp ent. Tᵾn wamp nga numan ila, numan ronduⱡ kai ei nga tep mormin. Ik ei, kupa ei nga, wote numan ronduⱡ kai pili uⱡ ei ndi, tᵾn wamp mbᵾ, etpa numan meka rui mbᵾ ngorum. Wote, wamp numan ngui uⱡ ei ndi, wamp nga mondpa pili orunga, etpa ronduⱡ mundrum. Wamp ti ndi, elim numan ronduⱡ kai kat tep mor nimba pᵾtᵾm. Ni wote, elim pilpa kungᵾndi kai ti, tepa muⱡi nambᵾrᵾm. Wote, wamp nam ti, Got numan ngorum ei, Got elim ndi pᵾtᵾm.

Uⱡ ei nga, akup got kol kᵾⱡ kᵾn, rᵾng atinga rok ngok nok enmin. Uⱡ ei nga, tᵾn wamp pora pᵾtmᵾn ni, got kol ei mel kupa nga ti, ama muⱡi nambrᵾm. Tᵾn pᵾtmᵾn ei, Got tenda mint morum. Ei kᵾn, mel puⱡi mim etᵾk mondᵾk, ‘got’ nᵾk, wote wamp mat ndi, ‘nuim ou’ nᵾk etmin. Enim nga got nᵾk enmin kᵾⱡ, muⱡ kona ila kep, mᵾi kona ila kep, got namba iti mondurmᵾn mbᵾ muⱡeing. Wote, tᵾn nga Got tenda mint morum ei, mel kanmin mbᵾ pora, mim itim Tipam mendpᵾⱡ ei nga, tᵾn mondᵾp pilip mormᵾn. Wote, wu Nuim tenda ei, Jisas Kraist ei moⱡnga, mel mbᵾ pora wengᵾndpa mim itim. Wote, tᵾn wamp mbᵾ, akup Nuim ei kᵾn, rᵾmp ndupᵾn kont mbun mormun.

Wote, ik kupa ei, wamp pᵾkᵾ pili napᵾtmᵾn. Wamp mat, got kol mbi paka rui uⱡ ila nga minal etᵾng. Ei nga, akup ui mbila, rᵾng ruk mat nok kᵾn, rᵾng ei got kol ti nga, rᵾng atinga rok, ngung ti nont nᵾk, numan ila pᵾtmin. Wamp mbᵾ, en enim nga numan tᵾpa mindi ila kot ndoimp rui narᵾrᵾm. Ei ndi pilik kᵾn, rᵾng i etpa ei ndi, en enim etpa ⱡar mondnᵾm nᵾk pᵾtmin. Rᵾng ti ndi, tᵾn Got kᵾn nondpa mormᵾn puⱡ orunga etpa kai mundi namᵾndᵾmba. Nᵾnmin ndam kep, numan ndam kep, tᵾn Got kᵾn mormun puⱡ orunga uⱡ ti pi napᵾmba.

Wote enim ndi, uⱡ kun nᵾk pilik etmin ei ndi etangga, wamp mondpa pili ronduⱡ pi nᵾpi ti etᵾk, uⱡ kit mbila mana nduing ei, tᵾk mundᵾi! 10 Wote, wamp numan rukᵾr orunga ronduⱡ pi nᵾpi ti ndi, nim numan kai ronduⱡ pili wamp ei kᵾnangga, got kol manga wingti ila rᵾng tem mbᵾ, nun ndam, numan ronduⱡ pi nᵾpi wamp ei, uⱡ ila kandpa mong to tᵾpa iti natᵾmba ei? 11 Ei nga, nim nga angina mondpa pili ronduⱡ pi nᵾpi ei, Kraist ndi, nᵾndpa kurum ei, nim nga numan ronduⱡ kai pᵾt nᵾtᵾn uⱡ ei ndi, wamp ei etkᵾn, nombuⱡa kit ila mundᵾn. 12 Wote nombuⱡa ila, nim nga ᵾngᵾnᵾl kᵾⱡ kᵾn, uⱡ kit in ei ndi, numan orunga etᵾk kit mundᵾn ndam, nim Kraist kᵾn uⱡ kit wei mbᵾ etᵾn. 13 Ei nga, rᵾng nga mbi ti ndi, na nga ᵾngᵾn ti etᵾp, uⱡ kit mbila ropa mana tint ndam, kng mint mbᵾ nga aldpa nui nᵾnimp. Uⱡ ei tamba kᵾn, na nga ᵾngᵾn ei uⱡ kit ila mana pi nᵾpangga!

Copyright information for `MED