1 Corinthians 9

Nombuⱡa Rung Wu Mbᵾ Nga Namba Uⱡ Iting Mbᵾ Mel

Na wei mor muna? Na nombuⱡa rung wu mor muna? Wote tᵾn nga Nuim Jisas ei, na kᵾni nakᵾndᵾr muna? Wote na nga Nuim ei nga nᵾmp kongun endᵾt ei nga, rᵾng mong rorum kᵾⱡ enim nᵾmp pᵾnt ei? Wote wamp mat ndi, na nombuⱡa rung wu ti nᵾk pili napᵾtmᵾn ndam, enim ndi, na kapⱡa nombuⱡa rung wu ei ning mint. Nambuⱡ emel, enim Nuim ei kᵾn, kunda mormin uⱡ ei ndi, ora ndupa, na nombuⱡa rung wu kupa ei mor ning.

Ei kᵾn, wamp mat ndi, na nga ik mbuldung orunga nᵾndᵾtmᵾn ei kᵾn, na ndi, na nga puⱡ orunga tᵾp ora ndup, ik ei mel nᵾt. Ei nga, kongun et nit ila, nu na, rᵾng na mat ngangina, timp uⱡ ei, kapⱡa mon ei? Wote, nombuⱡa rung wu mat kᵾn, Nuim ei nga ᵾngᵾnᵾl na, Pita na kᵾⱡ etmin ei mel, na mondpa pili amp ti, tᵾp kona nant mbila, mep mint mbi uⱡ ei, kapⱡa ei? Muna Barnapas kᵾn, na kᵾn, tᵾl mendpᵾⱡ kongun etpᵾⱡ kᵾn, rᵾng nomp kont muⱡᵾmbil ei?

Wote, el nde wu ti ndi, ku moni elim nga wak ropa, rᵾng na, nu na, ur mel mbᵾ tᵾpa norum ei? Wote, wu ti ndi, wain pana elim nga ila wain mong mbᵾ tᵾpa, nui nandrᵾm ei? Wu ti ndi, i ku etpa, kng kau elim nga ᵾt rorum kᵾⱡ nga aim kuⱡpa, nui nandrᵾm ei? Na ik nᵾnt ei, wamp nga numan ila, ni nanᵾnt mon? Nambuⱡ emel, mi ik ila, ik tenda kᵾⱡ nᵾtᵾm ei mel ku nᵾnt. Tᵾn Moses nga mi ik kᵾⱡ, kᵾmp rop kandurmᵾn ni mel,

“Kng kau ei, wit mong kambᵾtᵾm ei kᵾn, keta ila kum nga rui narᵾrᵾmᵾn! mon!” nᵾtᵾm.
Akup ik ei, Got ndi, kng kau ei nga ik ti ninim, nᵾk pinmin ei?
10 Wote, ik ei nga puⱡ ei, tᵾn wu kᵾⱡ kᵾn kundpa ninim ei? Mon kᵾⱡ ndi, tᵾn nombuⱡa rung wu kᵾⱡ nga orunga, nimba mot ndunᵾm. Nambuⱡ emel, mᵾi apᵾp rorum wu ei kᵾn, rᵾng rupa roⱡnga tᵾtᵾm wu ei kᵾn, wu raⱡ nga kongun etkᵾⱡ, rᵾng mat kᵾmp tᵾpᵾⱡ elpa elpa timbil nᵾkᵾⱡ, pilkᵾⱡ etmbil. 11 Enim nga min orunga rᵾng mbo mat, tᵾn ndi, mong mundurmᵾn. Ei nga, tᵾn nga kᵾng orunga, rᵾng na mel mat tᵾk rapᵾndᵾk nguing uⱡ ei, mbun enim ei? 12 Wote, nombuⱡa rung wu mat ndi, tᵾk rapᵾndᵾk uⱡ mbᵾ mel eng ndam, wote tᵾn kuimp tepᵾn, enim kᵾn kongun etmin ei nga, minal tᵾk rapᵾndᵾⱡngina. Wote, tᵾn uⱡ nᵾnt mbᵾ nga tilimina. Ei wote, ti natᵾnmᵾn. Wote tᵾn ndi, Kraist nga Rᵾnang Ik Kai ei, mel ti ndi, kumba pindi nᵾpᵾndangga nimbun, mbun elpa elpa mbᵾ nga koma rormin. 13 Kupa, enim pᵾtmin ni, manga wingti ou ila kongun etmin wu mbᵾ, manga ila ku rᵾng tᵾk normin. Wote, nde pol wingti ila kongun etmin wamp ei, kalk tindiⱡim mundurmᵾn, rᵾng mbᵾ tᵾk normᵾn. 14 Ei mel ku, Nuim ei nga mi ik ila nimba kᵾn, Rᵾnang Ik Kai ei, nimba ngum wamp ei nga wamp mbᵾ ndi, kᵾng orunga tᵾk rᵾpᵾnding.

15 Wote na ndi, uⱡ mbᵾ kapⱡa elimba mint. Ei wote, na iti nᵾtᵾt. Wote, akup ya mon ront ila, rᵾng na mat ngeing nᵾmp ni nanᵾnt mon! Na nanim nga orunga kaip nᵾnt uⱡ ei, wamp ti ndi ruk omba, tᵾpa pei mundi namᵾndᵾmba. Wote, wamp ti ndi, na kongun ent ei nga, kᵾng orunga tᵾpa imp muⱡangga, kuimp tep kunt ndam, kapⱡa. 16 Na Rᵾnang Ik Kai ei nga kongun et ei, na nga uⱡ mendpᵾⱡ ti et ei ndi, na nga orunga kaip nimp mel, kapⱡa mon. Na ik ni nilinga nᵾt. Na Rᵾnang Ik puⱡ mbᵾ, nᵾmp ngui ngᵾngᵾnt ndam, na nga puⱡ orunga etᵾp kit mundimp. 17 Na nga numan ila kongun elimba ndam, na mel ti, wote moⱡᵾp timp nᵾmp pilip elimba. Wote ei mon! Nambuⱡ emel, na kongun et ei, Got ndi, iti nilinga et. 18 Ei nga, na mel kai nant ei timp? Na nga timp mel kai ei, Rᵾnang Ik Kai ei, kongun endᵾp mel kai mbᵾ, yant tᵾtmᵾn uⱡ ei, pendᵾp kelip, Rᵾnang Ik Kai ei, wei nᵾmᵾ wamp mbᵾ, nᵾmp ngur. Uⱡ ei ndi, na mel mbᵾ kapⱡa ngurum.

19 Na wei mor. Wamp ti nga kongun kindmant wamp mel, muⱡi nambᵾr mon! Wote na ndi, nanim nga numan ila wamp minal etᵾp rukᵾr timp nimp pilip, wamp mbᵾ nga kongun kindmant endᵾt. 20 Wote, Jura wamp etᵾp rukᵾr timp pilip kᵾn, Jura wamp mbᵾ, pek mormin ei mel pep mor. Wote, Moses nga mi ik pep rormin wamp mbᵾ kᵾn, ei mel ku it. Na nanim, Moses nga mi ik ila muⱡi nambᵾr ndam, wote wamp mbo kᵾⱡ, Kraist mondᵾk pileing nᵾmp et. 21 Uⱡ ei mel ku, wamp rᵾⱡaip elpa kᵾⱡ, etᵾp rukᵾr timp pilip kᵾn, uⱡ etmin mbᵾ mel etᵾp, Jura wamp mbᵾ nga mi ik kᵾⱡ, wak rop ekit orunga pep mor. I nᵾmp kᵾn, Got nga mi ik kᵾⱡ, pep rui narᵾr ni nanᵾnt mon! Wote, na Kraist nga mi ik ila mana orunga mor mint. 22 Wote, wamp mat mondpa pili ronduⱡ pi napᵾrᵾm mbᵾ, etᵾp rukᵾr timp pilip, wamp mbᵾ mel ku raⱡᵾp uⱡ mbᵾ et. Wamp elpa elpa mbᵾ nga etmin uⱡ mbᵾ nga, ruk ting ila moⱡᵾp kandᵾp et. Ei, na wamp mat etᵾp, Kraist kᵾn rukᵾr tilmba, nᵾmp pilip mint et. 23 Wote na ndi, uⱡ mbᵾ pora, Rᵾnang Ik Kai ei, etᵾp ronduⱡ mundimp pilip et. Wote, wamp mbᵾ ndi, ik ei pilik, Kraist kᵾn rukᵾr wangina, Got nga memp ei, wamp mbᵾ kᵾn, na kᵾn pora ngangga, nᵾmp pilip et.

24 Enim kupa pᵾtmin ni, nombuⱡa pᵾn nᵾtmᵾn uⱡ ila, wamp ou ndupa pᵾn nᵾtmᵾn. Wote, wamp tenda ti mint, tᵾkrᵾpa kuimp tepa mba, mel kai tᵾndᵾtmin ei tᵾtᵾm. Ei mel ku, nim mel ti timp nᵾkᵾn, pilkᵾn ronduⱡ mondkᵾn, nombuⱡa pᵾn ni. 25 Nombuⱡa pun nᵾtmᵾn wamp mbᵾ, kuimp tek ping ei nga, ambulk pilik mbo endᵾtmᵾn. Uⱡ etmin mbᵾ pora nimba, mel mbᵾ nga ting pilik etmin. Wote, tᵾn etmᵾn ei pora, ni nanᵾmba mel ti, timin ei nga nombuⱡa pᵾn nᵾtmᵾn. 26 Ei nga pilip kᵾn, na nombuⱡa pᵾn nᵾmp mbo pora nimba, kona ila ekit, mbi nᵾmp pilip mint pᵾn nᵾt. Na el etᵾp kᵾn, ki kum roldᵾnga, rui narᵾr mon! 27 Na nga kᵾng ei, etᵾp mindil nguimp ei, nanim nga numan ei ndi, mint pilip et. Wote, na wamp mat, Got nga ik ei, kᵾndᵾp nimp nᵾmp etᵾp, wote na nanim mel muⱡ ei, ti nᵾtᵾm

Copyright information for `MED