1 John 4

Muⱡnga Kupa Ei Kᵾn, Muⱡnga Kol Ei Kᵾn

Na nga wamp mᵾn kᵾⱡ! Wamp mat ndi, en enim muⱡnga pora tep mormun nᵾng ndam, mondᵾk pili nᵾpilᵾi! Wote muⱡnga ei, Got kᵾn moⱡpa orum, muna mon nda? Pilik kai itᵾi! Nambuⱡ emel, painui wu kol mbᵾ nga ou ndupa, ya mᵾi kona ila andᵾk mormin. Ei nga, Got nga Muⱡnga kupa nᵾk kᵾning ei mel, wamp nam ti ndi, Jisas Kraist ei, wamp mbᵾ nga kᵾng tᵾpa, mᵾi kona ila mana urum nim ndam, ei Got nga Muⱡnga kupa ei, nᵾk kᵾning. Wote, wamp ti ndi, Jisas nga mᵾi kona ila mana ui nᵾwᵾrᵾm nim ndam, muⱡnga ei Got nga mon! Kraist nga el rui muⱡnga ti, omba nᵾk nᵾtᵾng ei mel, akup kupa enim, ya mᵾi kona mbila andpa morum. Na nga kangambuⱡa mbᵾ ye! Enim Got nga mitim wamp kᵾⱡ mormᵾn. Ei nga, ik kep nga painui wu mbᵾ, rok mana ndurᵾng. Ei nambuⱡ emel, enim nga Muⱡnga Wingti mondᵾk mormin ronduⱡ ei ndi, mᵾi kona ila nga muⱡnga ei nga ronduⱡ ei, tᵾpa mana mundrum. Muⱡnga kol ropa morum mondᵾk mormin wamp mbᵾ ndi, mᵾi kona ila uⱡ mbᵾ nga ik nilingina, muⱡnga kol ropa morum mondᵾk mormin wamp mbᵾ ndi, kum tek pᵾtmᵾn. Ei nambuⱡ emel, mᵾi kona wamp mbᵾ mormin. Wote tᵾn, Got nga wamp kᵾⱡ mormin. Wamp nam ti, Got pᵾtᵾm ei ndi, tᵾn nga ik ei, kum tepa pᵾtᵾm. Wote, wamp nam ti, Got pili napᵾtᵾm ei ndi, tᵾn nga ik ei, kum tepa pili napᵾtᵾm. Ei mel etᵾk kᵾn, Got nga Muⱡnga kupa ei kᵾn, muⱡnga kol ei kᵾn, kandᵾp mbi nduimin.

Got Ei, Wamp Numan Ngui Uⱡ Ei Nga Puⱡ Wu Ei

Na nga wamp mᵾn kᵾⱡ! Wamp numan ngui uⱡ ei etamin! Nambuⱡ emel, wamp numan ngui uⱡ ei, Got kᵾn tepa orum. Wamp nam ti ndi, numan ngui uⱡ etᵾm wamp ei, Got nga kangambuⱡa raⱡpa moⱡmba. Wote, Got pilpa mbi ndurum. Wamp nam ti ndi, wamp numan ngui uⱡ ei, iti natᵾm ndam, Got pili napᵾtᵾm. Nambuⱡ emel, Got ei, wamp numan ngui uⱡ ei nga Puⱡ Wu ei morum. Ei nga, Got ndi, tᵾn numan minal ngumba uⱡ ti, etpa mot ndurum. Uⱡ ei, elim nga Kangᵾm tenda waⱡᵾm ei, ya mᵾi kona ila tᵾpa munduⱡnga, tᵾn etpa peng kont titim. 10 Wamp numan ngui uⱡ ei, ei mel etᵾm. Got ndi, tᵾn numan ngumba elim nga Kangᵾm ei, tᵾpa mundrum uⱡ ei ndi, tᵾn nga uⱡ kit mbᵾ, wak rundrum. Tᵾn ndi, Got numan ngurmᵾn ni nanᵾnt mon! 11 Wamp mᵾn kᵾⱡ! Got ndi, tᵾn numan ngurum ndam, tᵾn ndi, i ku etpᵾn, wamp mbᵾ kᵾn, numan ngumbun muⱡᵾmin. 12 Ei kᵾn, wamp ti ndi, Got ama kᵾni nakᵾndrᵾm. Tᵾn ndi, wamp mat numan ngumᵾn ndam, Got tᵾn kᵾn omba moⱡangga kᵾn, elim nga wamp numan ngui uⱡ ei, tᵾn kᵾn kᵾndᵾk etpa pemba. 13 Ei nambuⱡ emel, elim nga Muⱡnga Wingti ei tᵾn ngurum. Ei nga, tᵾn pᵾtmᵾn ei kᵾn, Got tᵾn kᵾn morum. Wote tᵾn elim kᵾn mormun. 14 Wote Tipam ndi, Kangᵾm mᵾi kona wamp mbᵾ, Etpa Ti Wu tangga nimba tᵾpa mundrum. Uⱡ ei, tᵾn kandpᵾn kᵾn, wamp pora pileing nimbun kundᵾp nᵾtmᵾn. 15 Ni kᵾn, wamp ti ndi, Jisas ei, Got Kangᵾm nᵾtᵾm ndam, Got wamp ei kᵾn morum, wote wamp ei, Got kᵾn morum ku. 16 Got ndi, tᵾn numan ngurum uⱡ ei, kandpᵾn mondpᵾn, pilpᵾn mbi ndupᵾn mormun. Ei kᵾn, wamp numan ngui uⱡ ei Got kᵾn tetᵾm. Wamp nam ti ndi, wamp numan ngui uⱡ ei tepa moⱡum ndam, wamp ei Got kᵾn morum. Wote Got wamp ei kᵾn morum. 17 Wamp numan ngui uⱡ ei, tᵾn kᵾn kᵾndᵾk etpa, piyangga muⱡᵾmin. Kraist ndi, wamp mbᵾ kᵾmp tᵾmba. Wote, Ui Ou ei, ekit om kᵾn, mundmong iti natᵾpᵾn, wote ronduⱡ mbun muⱡᵾmin. Ei nambuⱡ emel, Kraist ya mᵾi kona ila pepa murum ei mel ku, tᵾn i ku etpᵾn pepᵾn mormun. 18 Wamp numan ngui uⱡ ila, mundmong iti uⱡ ti, pi napᵾtᵾm. Wote, mundmong iti uⱡ ei, wamp numan ngui uⱡ ei ndi, ropa ekit ndurum. Ei nga, wamp ti, mundmong etᵾm ndam, wamp numan ngui uⱡ ei, wamp ei kᵾn, pi napᵾtᵾm. Ei nambuⱡ emel, mundmong iti uⱡ ila, mbun mindil kit mbᵾ tᵾtmᵾn. 19 Got ndi, wamp numan ngui uⱡ ei, kuimp tepa tᵾn ngurum. Ei nga, tᵾn ndi wamp numan ngui uⱡ ei etmᵾn. 20 Wamp ti ndi, Got numan ngur ku nimba, wote elim nga ᵾngᵾn ei, numan ngui ngangᵾm ndam, wamp ei, ik kol romba. Ei nambuⱡ emel, elim nga ᵾngᵾn kandpa kᵾn, wamp numan ngui uⱡ ei, iti natᵾtᵾm ndam, wote Got kᵾni nakᵾndpa kᵾn, Got numan ngumba mel nant? Ei kapⱡa mon! 21 Got ndi, tᵾn man ngumba nimba mel, wamp nam ti ndi, Got numan ngorum ndam, elim nga ᵾngᵾn ei, numan ngangga ku nitim.

Copyright information for `MED