1 John 5

Got Kangᵾm Ei, Mᵾn Mundi Uⱡ Ei Nga, Puⱡ Wu Ei

Wamp nam ti ndi, Jisas ei, Got nga ngurum wu ti, Kraist nimba, mondpa pilim ndam, Got nga kangambuⱡa raⱡpa moⱡmba. Wote, wamp nam ti ndi, Tipam numan ngurum ndam, elim nga kangambuⱡa mbᵾ, numan ngorum ei mel ku ngumba. Tᵾn Got numan ngumbun, elim nga mi ik mbᵾ pep rᵾmᵾn ndam, wote elim nga kangambuⱡa mbᵾ, numan ngormᵾn uⱡ ei, pilpᵾn mbi nduimin. Wote tᵾn ndi, Got numan nguimin uⱡ ei ndi, elim nga mi ik ei pep rᵾmᵾn. Ei nga, mbun ti mon. Ei nambuⱡ emel, Got nga kangambuⱡa ralk mormᵾn mbᵾ ndi, mᵾi kona ila uⱡ kit mbᵾ, rok mana nduing. Ei nga, tᵾn nga mondpa pili uⱡ ei ndi, mᵾi kona ila uⱡ kit mbᵾ, rop mana nduimin. Wamp nam ti ndi, mᵾi kona ila uⱡ kit mbᵾ rop mana ndumba. Wote, wamp ti ndi, Jisas ei, Got Kangᵾm nimba, mondpa pilim ei ndi, mᵾi kona uⱡ kit mbᵾ, ropa mana ndumba. Jisas Kraist ei, elim nu titim uⱡ ei kᵾn, mema oi nilinga, kurum uⱡ raⱡ nga pol ila moⱡpa urum. Ei nu ila mendpᵾⱡ mon! Wote nu ei kᵾn, mema ei kᵾn, raⱡ nga rak ndupa ei nga pol ila moⱡpa urum. Uⱡ ei ndi, uⱡ ei kupa ingk nimba kᵾn, para ndupa nᵾndᵾtᵾm. Wote, Muⱡnga Wingti ei, ik kupa ei nga puⱡ wu, ei morum. Ei nga, uⱡ raldika kat ndi etᵾk, mot ndurmᵾn. Ei nga, Muⱡnga ei kᵾn, nu ei kᵾn, mema ei kᵾn, wote raldika kᵾⱡ, ik tenda mint nᵾtmin. Wamp nga ik nᵾtmin mbᵾ, tᵾn pilip tᵾtmᵾn. Wote, Got nga nᵾtᵾm ik ronduⱡ ei ndi, wamp mbᵾ nga ik ei, tᵾpa mana ndurum. Nambuⱡ emel, Got nga nᵾtᵾm ik ei, elim nga Kangᵾm nga ik ei ninditim. 10 Wamp nam ti ndi, Got Kangᵾm mondpa pᵾtᵾm ei ndi, Got nga nitim ik ei, pilpa tᵾtᵾm. Wote, wamp nam ti ndi, Got Kangᵾm mondpa pili napᵾtᵾm ei ndi, Got nga nᵾtᵾm ik ei, ik kol ti nimba pᵾtᵾm. Nambuⱡ emel, Got elim nga Kangᵾm nga para ndupa nᵾtᵾm ik ei, mondpa pili napᵾtᵾm. 11 Uⱡ ei nga, para ndupa nimba mel, uⱡ nga kᵾnt nga kont mul uⱡ ei, Got ndi, tᵾn ngurum. Kont mul uⱡ ei, elim nga Kangᵾm ei kᵾn petᵾm. 12 Wamp nam ti ndi, Got Kangᵾm kᵾn, rᵾmp ndupa moⱡum ndam, wamp ei uⱡ nga kᵾnt nga kont mul uⱡ ei tepa morum. Wote, wamp nam ti, Got Kangᵾm kᵾn, rᵾmp ndupa, muⱡi nambᵾⱡᵾm ndam, uⱡ nga kᵾnt nga kont mul uⱡ ei, tepa muⱡi nambrᵾm.

Uⱡ Nga Kunt Nga Kont Mul Uⱡ Ei

13 Enim Got Kangᵾm nga mbi ila, mondᵾk pᵾtmᵾn uⱡ ei ndi, uⱡ nga kᵾnt nga kont mul uⱡ ei, tᵾk tek mormin. Ei nga, enim pilik muⱡeing nᵾmp mon ei, rop ngunt. 14 Ei nga, tᵾn pilip mbi ndunmᵾn ei, tᵾn Got nga kuimp keta ila ronduⱡ mbun moⱡpᵾn, elim kᵾn mel ti, mawa imᵾn ndam, elim nga numan pᵾtᵾm ei mel pep ropa nimᵾn mel, ei ngumba. 15 Got ndi, tᵾn nga mawa etmin mel ei, pᵾtᵾm nᵾmp pilmin ndam, mel ei, kupa ngumba nᵾmp pilᵾmin. 16 Wamp nam ti ndi, ᵾngᵾn kᵾnangga uⱡ kit mat etpa mba, wamp kul uⱡ ei nga uⱡ kit mat, iti natᵾm ndam, Got kᵾn atinga rundangga, wamp ei, etpa tᵾmba. Wote uⱡ ei, wamp kuⱡi nakᵾrmᵾn ei nga nᵾnt. Uⱡ kit etmin ei ndi, wamp mbᵾ kormun mint. Ei nga, Got kᵾn atinga rundeing nᵾmp ni nanᵾnt, mon! 17 Ⱡawa iti uⱡ mbᵾ pora uⱡ kit mint. Wote uⱡ kit mat nga nit ila wamp kul uⱡ ei, pi napᵾtᵾm mon. 18 Tᵾn pᵾtmᵾn ei, Got nga kangambuⱡa raⱡpa morum wamp ti ndi, uⱡ kit mbᵾ iti natᵾtᵾm. Nambuⱡ emel, Got Kangᵾm ei ndi, wamp ei, rᵾp etpa moⱡnga, Seitan ndi, kapⱡa etpa kit mundi namᵾndrᵾm.

19 Tᵾn pᵾtmᵾn mel, tᵾn Got nga kangambuⱡa raⱡpa mormun. Wote, ya mᵾi kona ila wamp nga uⱡ kit etmin mbᵾ, wu kit ei ndi, rᵾp etᵾm. 20 Tᵾn pᵾtmᵾn ei, Got Kangᵾm ei, ya mᵾi kona ila omba kᵾn, tᵾn nga moⱡpa kundi uⱡ ei, ngurum ei nga, Got kupa ei morum. Tᵾn nga mondpa pili ei kupa, Got kᵾn tepᵾn mormun. Wote elim nga Kangᵾm Jisas Kraist kᵾn raⱡᵾp mormun ku. Tᵾn Got elim kupa morum ei ndi, uⱡ nga kᵾnt nga kont mul uⱡ ei ngumba. 21 Na nga kangambuⱡa mbᵾ ye! Enim got kep nui mbᵾ nga, rᵾp akilma itᵾi!

Copyright information for `MED