1 Peter 2

Nuim Ei Kont Mul Ku Kai Ei

Ei nga, enim uⱡ ⱡawa kit iti uⱡ mbᵾ, wak rᵾi, ik kol rui nᵾrᵾi! Uⱡ kol mbᵾ iti natᵾk, wᵾlᵾk rui narᵾk, wote ik kit ni uⱡ mbᵾ iti natᵾk, wak rᵾi! Enim kangambuⱡa nana mel molk, rᵾk rᵾk Got nga ik ei, enim nga min orunga, aim nuing ei nga, waka kulk muⱡᵾi! Ei nok kᵾn, ou etᵾk moⱡangina kᵾn, enim etpa tᵾmba. Buk Wingti ila, nimba mel,

“Enim Nuim ei nga uⱡ kai etᵾm mbᵾ nga tᵾngᵾn ei, nok kai pᵾtmun,” nᵾtᵾm.
Enim Nuim ei kᵾn wᵾi! Kont mul ku muⱡ waⱡ ei, wamp mbᵾ ndi, mel wei ti nᵾk pilik, tᵾk mbuⱡ nguk, wak rorung. Ni wote, Got ndi, ku ingk ronduⱡ ei, nimba mbi ropa oⱡa titim. Enim kunda ku, kont mul ku muⱡ waⱡ kᵾⱡ, Got nga numan ila enim etpa, Muⱡnga Wingti nga manga rundimp nimba pᵾtᵾm. I etᵾk, enim ok, wu pris rᵾⱡaip wingti mbᵾ molk, wote Jisas Kraist nga mbi ila, enim nga muⱡnga ei nga, Got kᵾn angge nᵾk, rukᵾr ndangina, tindiⱡim ei, Got kᵾn oⱡa pangga, elim kai pilpa, angge nᵾk nguing mel mbᵾ, kapⱡa nimba tᵾmba. Buk Wingti ei ndi, nimba mel,

“Na ndi, ku muⱡ waⱡ ronduⱡ kai ti kandᵾp, mbi ndup aprᵾp tᵾnt, Ei akup tᵾp, Saiyon kona ila manga paka rumᵾnt mel tᵾp angᵾndᵾnt. Wote, wamp nam ti ndi, elim kᵾn mondpa pilim ndam, pipil kuⱡi naⱡᵾmba,” nᵾtᵾm.
Ku muⱡ waⱡ ei, nim mondᵾk pili wamp ei nga ku ronduⱡ kai. Ei wote, mondᵾk pili napᵾlᵾng wamp mbᵾ nga ik ei, mel petᵾm,

“Ku muⱡ waⱡ ti manga rᵾki wu mbᵾ ndi, kit nᵾk pilik tᵾk mundrᵾng ei, tᵾpa ropᵾl ropa aldpa omba ku kai ronduⱡ ti rᵾrᵾm,” nᵾtᵾm.
Wote, Buk Wingti ila, ik kat nimba mel,

“Ku muⱡ waⱡ kel ei ndi, wamp mbᵾ etpa tᵾn nga rondᵾmba. Wote ku ou ei ndi wamp mbᵾ, ropa tᵾpa mana pendᵾmba,” nᵾtᵾm.
Wamp mbᵾ ropa tᵾpa mana pendᵾtᵾm ei, nambuⱡ emel, Got nga ik ei, mondᵾk pili napᵾtmin. Ei kᵾn, Got nga numan ila iteing nimba pᵾtᵾm mel.

Elim Got Nga Wamp Rᵾⱡaip Mormin

Wote, enim, Got ndi, wi ropa titim wamp kᵾⱡ. Ei nga, enim elim nga wamp rᵾⱡaip mendpᵾⱡ kᵾⱡ mormin. Enim Wu Nuim Mumuk ei nga pris rᵾⱡaip kᵾⱡ mormin. Wamp wingti kᵾⱡ mormin. Got elim nga wamp mendpᵾⱡ kᵾⱡ, enim unt rumbᵾⱡ ila moⱡnga, wote elim ndi, enim etpa tᵾpa rᵾngaⱡ kai ila mundrum. Uⱡ mbᵾ nga, elim nga mbi paka rundeing nimba, enim wi ropa rukᵾr titim. 10 Enim unt Got nga wamp rᵾⱡaip kat muⱡi nambᵾrᵾng. Wote, akup enim Got nga wamp rᵾⱡaip mendpᵾⱡ kᵾⱡ mormin. Enim unt Got nga wamp kont kul uⱡ ei, pilik mbi ndui nandᵾrᵾng. Wote, akup enim ndi, elim nga wamp kont kul uⱡ ei, rukᵾr tᵾtᵾng.

Got Nga Kongun Kindmant Wamp

11 Na nga wamp puⱡ mendpᵾⱡ kᵾⱡ, enim ya mᵾi kona ila wamp tᵾma mel, ralk ok mormin. Ei nga, enim man ngump nᵾnt ei, enim unt etᵾng uⱡ kit mbᵾ, tᵾk mbuⱡ ngᵾi. Uⱡ kit unt nga etᵾng mbᵾ, enim nga numan ila pepa oⱡa omba, min ei kᵾn el rorum. 12 Enim wamp rᵾⱡaip ekit orunga mbᵾ kᵾn, moⱡpa kundi orunga, uⱡ kun kai mbᵾ itᵾi! Wote enim kᵾn, ik nᵾk kit mondᵾk, eng ei kᵾn, tᵾnggᵾt Got om Ui Ou ei kᵾn, enim nga uⱡ kai etᵾng mbᵾ, kandᵾk mbi nduk, wote Got nga mbi paka runding.

13 Enim Nuim ei nga nᵾndᵾk, wamp nga ik nᵾng mbᵾ pilik, pep rok itᵾi! Wamp nga peng ila wu nuim mumuk morum ei kᵾn, wote wu nuim mumuk ei nga keta tᵾk gapman mormin wu mbᵾ kunda, wu nuim mumuk ei ndi, tᵾpa mondpa, wamp uⱡ ⱡawa eng mbᵾ, tᵾk kan nguk, wote uⱡ kai etmin wamp mbᵾ, mbi paka rundeing nimba, tᵾpa mondrum. 15 Ei nga, Got ndi, elim nga numan ila enim uⱡ ei mel iteing nimba pᵾtᵾm. Enim uⱡ kai mbᵾ tangina, enim kᵾn nᵾk, kit mondᵾk, ik roldᵾnga nᵾk eng wamp mbᵾ, keta mum kᵾn muⱡeing. 16 Ei kᵾn, enim wamp mat, numan kun kai pendᵾk, wei mormun ei mel muⱡᵾi! Wote, en enim nga wei mul uⱡ ei, tᵾk wal pᵾki mel pakᵾk, uⱡ kit mbᵾ, etᵾk mo rui nᵾrᵾi! Got nga kongun kindmant wamp kupa kᵾⱡ muⱡᵾi! 17 Enim ndi, wamp mbᵾ pora, tᵾk ou ndᵾi! Enim nga wung ila mondpa pili angmᵾn mbᵾ, numan nguk, Got tᵾk ou nduk mbi paka rondᵾk itᵾi! Wote, wamp nga wu peng mumuk morum ei, tᵾk ou nduk itᵾi!

Tᵾn Mbun Koma Ropᵾn Kraist Pep Ramin

18 Enim kongun kindmant wamp mbᵾ pilik, enim nga wu ou mbᵾ nga mana orunga molk, tᵾk ou minal ndᵾi. Uⱡ kai etᵾm ti kep, kit etᵾm ti kep, tᵾk ou mint ndᵾi.

19  Ei nambuⱡ emel, enim Got nga numan pᵾtᵾm uⱡ ei pep rok molk, mbun mindil ti natᵾlmina mbᵾ, tᵾng ndam, Got ndi, enim memp pendᵾmba. 20 Enim uⱡ ⱡawa ti, elingina rormin ei kᵾn, mindil ting mel tᵾtmin. Ei kᵾn, mbi kai ti natᵾtmin. Wote, enim uⱡ kun kai ti itangina, mbun mindil nguk eng ndam, Got ndi, enim memp pendᵾmba. 21 Uⱡ ei nga, Got ndi, enim wi ropa titim. Nambuⱡ emel, Kraist ei, enim nga nimba mindil nurum ei mel, akup enim ndi tᵾk ou nduk molk, elim nga kᵾmp ei pep rᵾi!

22 “Kraist ndi, uⱡ kit ti iti nᵾtᵾtᵾm! Wamp ndi, elim nga keta ila ik kol ti pili napᵾtᵾng,” nᵾtᵾm.

23 Elim ik mura ngurung ndam, ik ti punt ropa, ni nᵾndᵾtᵾm. Elim mindil ngurum ei kᵾn, punt rop timp nimba uⱡ ti iti nᵾtᵾtᵾm. Ei kelpa, elim nga numan ei mepa mba, elim nga Got wu kupa ei kᵾn titim. 24 Kraist ndi, tᵾn nga uⱡ kit mbᵾ tᵾpa, elim nga kᵾng ila koma ropa mba, nde peta ila pitim. Uⱡ ei ndi, ora ndupa, tᵾn nga uⱡ kit etmin mbᵾ pora, wak ropᵾn koⱡpᵾn kᵾn, kont mul peng ei kandᵾp tᵾpᵾn, uⱡ kun kai mbᵾ pep rᵾmin. Elim nga kᵾng ila, kip mundrum mbᵾ ndi, enim aldpa etpa kai mundrum. 25 Unt enim kng sipsip mel, nombuⱡa mam tiki purung. Wote akup, enim numan ropᵾl rok, wamp min nga Rᵾp Etᵾm Wu ei, pep reing nimba, mepa yant urum.

Copyright information for `MED