1 Peter 4

Kraist Pep Ruimin Uⱡ Ei Mindil Petᵾm

Kraist pᵾtmin ni, elim nga kᵾng ila mindil titim. Ei mel, enim numan tenda ei ku pilᵾi! Nambuⱡ emel, wamp ti kᵾng orunga mbun mindil tᵾtᵾm ni, uⱡ kit mbila ruk muⱡi nambᵾrᵾm. Ei nga, akup ui ei kᵾn, wote kᵾmp kᵾm kont monmᵾn ui ila, kᵾng orunga mbi paka rui uⱡ mbᵾ wak rok, Got nga numan ei kandᵾk tᵾk pep rᵾi! Enim unt, wamp rᵾⱡaip elpa ekit orunga mbᵾ nga numan pendᵾk etmin, uⱡ kit mbᵾ nga etᵾng ni, etᵾk pora ndurᵾng. Uⱡ mbᵾ mel etᵾng, wapra rui uⱡ, wamp kandpa kum pindi uⱡ, nu ronduⱡ nok, kupᵾr rok, rᵾng ou ndupa nok, got kol mbᵾ nga atinga rondᵾk etmin. Akup wamp rᵾⱡaip elpa ekit orunga mbᵾ, enim kandᵾk rut ninmin ei, en enim nga nombuⱡa mam andurmin ila ruk ui nawᵾnmᵾn nᵾk, aldpa enim ik mura ngurmin. Wote uⱡ mbᵾ kapⱡa iteing, tᵾnggᵾt ui tila, Got nga kuimp keta ila, uⱡ enmin mbᵾ mel kᵾmp tᵾk nguing. Got ndi, wamp kui kont mbᵾ, kᵾmp tᵾmba ei nga, tᵾpa kun etpa morum. Uⱡ puⱡ ila nga Rᵾnang Ik Kai ei, unt wamp korung mbᵾ kᵾn purum ku. Got ndi, tᵾn kont mormun wamp kᵾmp tᵾtᵾm ei mel, wamp kᵾⱡ morung puⱡ orunga unt kᵾmp titim. Rᵾnang Ik Kai ei, wamp kui kᵾⱡ kᵾn purum ei, pilik tilingina ndam, en enim nga muⱡnga orunga, kont mul uⱡ ei, Got kont morum ei mel, kont puk moⱡᵾngina.

Kongun Wu Kai Ei Ndi Got Nga Kongun Mbᵾ Pᵾp Etᵾm

Mel mbᵾ pora nimba, ui ei nondpa enim. Ei kᵾn, enim nga numan orunga kun pangga, ronduⱡ mundᵾk, tᵾk mendᵾk molk, atinga rᵾk rᵾk rᵾi! Uⱡ nant mbᵾ nga pora, wamp numan ngui uⱡ ei, etᵾk mint muⱡᵾi! Nambuⱡ emel, wamp numan ngui uⱡ ei ndi, uⱡ wei etmᵾn mbᵾ, tᵾpa mana ndupa, wote uⱡ nit ou ndupa pendpa kitim. Enim numan kit pili napilik, numan kai pendᵾk, enim nga manga tᵾma ong wamp mbᵾ, rawe etᵾk tᵾi. 10 Enim wamp tenda tenda nimba ei, Got nga kongun ronduⱡ kai mat, iteing nimba kᵾmp tᵾpa ngurum. Kongun mbᵾ tᵾk, wamp kᵾn kongun tangina, wote enim Got nga kongun wu kai ei neing. 11 Wamp nam ti ndi, Got nga ik nindᵾm wamp ei, elim kongun ei ronduⱡ mba tangga! Wote, wamp nam ti ndi, elim wamp tᵾpa rᵾpᵾndi uⱡ em wamp ei pilin, elim nga ronduⱡ Got ndi ngurum ei paka rondukᵾn iti! Wote uⱡ mbila pora, Jisas Kraist nga mbi ila, Got nga mbi paka reing. Got elim kᵾn uⱡ ronduⱡ eng nui wang ndupa etᵾm uⱡ mbᵾ kᵾn, mbi oⱡa orunga ti uⱡ mbᵾ, uⱡ nga kᵾnt nga tetᵾm. Ei kupa.

Kraist Kᵾn Mbun Koma Ruimin Uⱡ Ei

12 Na nga wamp puⱡ mendpᵾⱡ kᵾⱡ, enim oⱡa tᵾpa kᵾni uⱡ kit wei mbᵾ, kandᵾk tᵾk mindil nonmᵾn. Ei pili napᵾtmin uⱡ ti, enim nᵾk pilik, min ngᵾn mundi nᵾmᵾndᵾi! 13 Wote, i iti natᵾk, numan ngᵾk, Kraist nga mindil titim mel tᵾnmᵾn nᵾk tᵾi! Wote, elim nga mbi ou ti uⱡ ei omba, pena ila tem kᵾn, enim ambulk palk muⱡing. 14 Enim Kraist nga mbi ei, ambulk muⱡangina, ik mura ngᵾk eng ndam, numan ngᵾk muⱡᵾi! Nambuⱡ emel, Got nga Muⱡnga ronduⱡ ei, enim kᵾn omba morum. 15 Enim mormin ruk ting ila, wamp ti kindᵾp norum, muna wamp ropa kondrum, muna uⱡ kit nant mbᵾ nga etᵾm, muna wamp mat nga etmin uⱡ mbila omba, kuimbal mba. Uⱡ mbᵾ nga wamp ti mindil nui nᵾnangga! 16 Wote, enim Kraist nga mbi ambulk molk, mindil tᵾng ndam, uⱡ ei nga pipil kuⱡi mon! Kraist nga mbi tep mor nᵾk, Got kᵾn angk nᵾi! 17 Got elim nga wamp mbᵾ, kuimp tepa kᵾmp tᵾmba ui ei, akup puⱡ mondpa enim. Ei nga, tᵾn kᵾn puⱡ mondpa em ndam, wote Got nga Rᵾnang Ik Kai mondᵾk pili napᵾtmᵾn wamp mbᵾ kᵾn, kᵾmp tᵾpa mba, pora ndumba mel nant? 18 Buk Wingti ila ik kat ndi, ei nimba mel,

“Wamp kai mbᵾ etpa tᵾmba, ei nga mindil petᵾm ndam, wote Got nga ik tᵾk roi nduk, uⱡ kit minal etmin wamp mbᵾ kᵾn, namba uⱡ ti pemba, nda?” nᵾtᵾm.
19 Ei nga, wamp namin mat Got ndi, mindil teing nimba pᵾtᵾm wamp kᵾⱡ, en enim pora, Puⱡ Wu ei kᵾn, rᵾmp nduk mᵾlangina, enim rᵾp itangga, uⱡ kai mbᵾ etᵾk mint muⱡeing.

Copyright information for `MED