1 Thessalonians 2

Pol, Tesalonaika Kona Ila Kongun Itim Mel

Angmᵾn, en enim pilik mormin ei, tᵾn enim kᵾn tᵾngᵾnda ombun kongun itmᵾn uⱡ ei omba, wei ai iti nᵾtᵾtᵾm. Enim pᵾtᵾng ni, unt Tesalonaika urmᵾn ei kᵾn, met Pilipai kona ila, tᵾn tᵾmbᵾⱡ ndi rok, tᵾn etᵾk pipil kundᵾk etᵾng! Uⱡ mbun mbᵾ tᵾpᵾn, pilip kelpᵾn int ngumbun, Got nga ronduⱡ ila moⱡpᵾn, Got elim nga Rᵾnang Ik Kai ei, enim kᵾn kundᵾp nitmin. Enim ik nimbun ngurmᵾn mbᵾ, tᵾn wᵾlᵾ mbun, ik nimba ⱡawa mundi na, uⱡ ⱡar mul na mbᵾ ndi, wamp ti tᵾpᵾn, kumngi rundmᵾn pilpᵾn iti nᵾtᵾtmᵾn. Mon, tᵾn rᵾk rᵾk Rᵾnang Ik Kai nᵾtmᵾn ei, nambuⱡ emel, Got elim ndi, nᵾi nilinga nᵾtmᵾn. Tᵾn ndi, mura mondpᵾn wamp mbᵾ, kundᵾp nimin ei, pilpa mbi ndupa ngurum. Tᵾn wamp mbᵾ, etᵾp numan kai pindmin pilpᵾn iti nᵾtᵾtmᵾn, Got elim etᵾp, numan kai pindmin nimbun etmᵾn. Got elim ndi, tᵾn nga numan orunga, kandpa mbi nduⱡnga, etmin.

Ei nga, enim pilik mbi nduk mormin ei, tᵾn ik nᵾwᵾ mat ni nᵾndᵾtmᵾn. Wote, enim kunt ropᵾn, enim nga mel mat timin pilpᵾn, ik ᵾk tᵾpᵾn ni nᵾndᵾtmᵾn mon! Ei kᵾn, Got pilpa morum! Uⱡ i itmᵾn mbᵾ, enim ndi kep, wote wamp mat ndi kep, tᵾn kaip nindeing nimbun uⱡ ti iti nᵾtᵾtmᵾn. Tᵾn kupa, Jisas nga nombuⱡa rung wu mendpᵾⱡ kᵾⱡ, enim kᵾn mel mat tᵾn ngeing nilmina ei, wote ni nᵾndᵾtmᵾn. Wote enim kᵾn, ek ndup nimbun murmᵾn ei, amp ti, elim nga kangambuⱡa nana mbᵾ, rᵾp etᵾm ni mel itmin. Wote tᵾn ndi, enim numan minal ngumbun, Got nga Rᵾnang Ik Kai ei, enim kundᵾp nitmin. Wote, ei mint mon, tᵾn kuⱡmᵾn ndam, kapⱡa ku nᵾmp pitmin. Ei nambuⱡ emel, enim numan minal ngurmᵾn ei nga. Angmᵾn, enim pilik mormin ei, tᵾn kongun kindmant rumbuldi rᵾnggilmᵾ raⱡ, muⱡ ti natᵾpᵾn itmin! I itmin uⱡ mbᵾ ndi, enim wamp mbᵾ mel mat, ngeing nimbun, Got nga Rᵾnang Ik Kai ei nimbun, ngui ngᵾnggᵾrmᵾn mon.

10  Enim tᵾn kandrung ni mel pilik mormin, wote Got pilpa ku morum. Enim mondpa pili wamp mbᵾ kᵾn, namba uⱡ mat itmin ei, uⱡ kun kupa mbᵾ itmin, wote uⱡ ⱡawa mat iti nᵾtᵾtmᵾn. 11 Enim pilik mormin ei, wu tipam ti ndi, elim nga kangambuⱡa mbᵾ nokundpa kai etᵾm ni mel, tᵾn ndi, enim wamp mbᵾ, tenda tenda nimbun i ku itmin. 12 Tᵾn ndi, enim etᵾp ronduⱡ mundpᵾn, rᵾp kai etpᵾn, enim kᵾng numan raⱡ ndi, Got nga numan ngumba uⱡ mat etangina, Got enim elim nga tᵾpa mumuk rui uⱡ, wote uⱡ eng nui mbᵾ, oi ropa ngumba pilpa, wi ropa morum ei ngangga, nimbun ronduⱡ mundᵾp nᵾtmin.

13 Wote, tᵾn Got kᵾn angge rᵾk rᵾk nimbun mint mormun. Ei nambuⱡ emel, enim tᵾn ndi, Got nga ik nimbun ngurmᵾn ni, wamp mbᵾ nga ik ti mon nᵾk, pilik mbi nduk, numan kai pendᵾk rukᵾr tᵾtᵾng. Ik ei, enim int mondpa pili wamp kᵾⱡ kᵾn, ruk ila kongun enim. 14 Wote angmᵾn, enim mindil tᵾtᵾng mbᵾ, met Juriya kona ila, Nuim Jisas Kraist mondᵾk pᵾtᵾng rapa tenda ila wamp mbᵾ, mindil tᵾtᵾng ei mel ku, en enim nga kona tenda ila wu kit mat ndi, enim mindil kit mbᵾ ngurung ei mel ku, Juriya wamp mbᵾ i ku etᵾng. 15 Wote, wu kit mbᵾ ndi ku, unt painui wu mbᵾ rok kondrung, wote Jisas Juriya kona ila rorung, wote tᵾn wu kᵾⱡ rok, mindil kit mbᵾ ngok, tᵾn rok makrᵾk etᵾng. Wu kit mbᵾ, Got kᵾn kep, wamp nga kep, ik kum ti natᵾtmin. 16 Wu mbᵾ ndi ku, mbo wamp rᵾⱡaip mbᵾ kᵾn, Got nga wamp etpa ti uⱡ ei, ik mbo indimin nᵾmp itmin nombuⱡa mbᵾ mi rorung. Uⱡ i etᵾng mbᵾ ndi, en enim nga uⱡ kit mbᵾ, omba kakina elinga, Got nga popᵾⱡ ei, wu kit mbᵾ kᵾn omba murum.

Pol Tesalonaika Wamp Kᵾⱡ Aldpa Mbo Kᵾnimp Nimba Pitim.

17 Angmᵾn, tᵾn wamp kit mat ndi, tᵾn tᵾk elpa elpa mundrᵾng ui ni kᵾn, tᵾn kangambuⱡa etpa ni mel murmᵾn. Tᵾn enim nga kuimp keta kᵾni nakᵾnmᵾn. Ei wote, tᵾn nga numan ei, enim kᵾn rᵾk rᵾk pilip mint mormin. Ei kᵾn, enim aldpa kᵾnamin ka nimbun mindil nombun mormᵾn. 18 Tᵾn enim kᵾn, int uimin nimbun pᵾtmᵾn. Ei wote, ui minal ei kᵾn, na Pol enim kᵾn uimp nᵾmp et ei, wote Seitan ei ndi, tᵾn imp morum. 19 Wote, Jisas Kraist yant om ei kᵾn, elim nga kuimp keta ila, tᵾn mundmong kai pendpᵾn, numan kai pendpᵾn, itimin ei, nambuⱡ emel pindmin? Ei kᵾn, enim wamp kᵾⱡ kᵾn, numan mam ti etmba. Ei nga, nokundpᵾn pilip mormin. 20 Tᵾn mbi kai tᵾpᵾn, numan kai pilpᵾn itmin ei nga muⱡ ei, enim Tesalonaika wamp kᵾⱡ mendpᵾⱡ.

Copyright information for `MED