1 Thessalonians 4

Got Numan Ngurum Uⱡ Mbᵾ Mel Itᵾi!

Akup angmᵾn, Got nga numan ila, tᵾn wamp moⱡᵾp kai mundmᵾn nimba pᵾtᵾm uⱡ mbᵾ, elim kandᵾk tᵾk pora ndurᵾng. Ei ama kupa, enim nga ik nᵾk, nombuⱡa andᵾk, kongun etᵾk etmin uⱡ mbila kandᵾp nᵾnmᵾn. Ei nga, enim kᵾn ronduⱡ mundpᵾn, waldᵾp nᵾnmᵾn ei, Nuim Jisas nga mbi ila, uⱡ kai etmin mbᵾ, ronduⱡ mondᵾk itᵾi! Tᵾn Nuim Jisas nga ronduⱡ ila moⱡpᵾn, enim man ngurmᵾn ik nimbᵾ, pilik mbi nduk mormin. Enim Got ndi, iteing nimba pᵾtᵾm uⱡ mbᵾ. Enim wamp mbᵾ mop map etᵾk, wapra rᵾi uⱡ mbᵾ ok tᵾk, wamp wingti ralk muⱡᵾi! Enim wu mbᵾ pora, amp tᵾk, ambᵾnᵾmᵾl kᵾn rᵾp rok iting uⱡ ei, uⱡ wingti kun mbila mint itᵾi! Wote, mbo wamp mel ralk, Got mondᵾk pili napilik, wu amp kandpa kum pindi uⱡ ei nga, puⱡ pendᵾk etmin ei mel, enim iti nᵾtᵾi! Ya ik nᵾnmᵾn mbᵾ, wu ᵾngᵾn ti ndi, ti tᵾpa roi ndupa, wu ᵾngᵾn ti nga amp ei kᵾn, ⱡawa iti nᵾtangga mon! Tᵾn ndi, enim ik mbᵾ nga unt ronduⱡ mundpᵾn, man ngurmᵾn ei, uⱡ mbᵾ nga eng ndam, Nuim ei ndi, enim mbun ngumba. Got ndi, tᵾn wamp mbᵾ pora, tᵾp wingti rundimp nimba, wi ropa titim. Tᵾn uⱡ kit mbᵾ nga, itᵾmin nimba, wi ropa ti nᵾtᵾtᵾm. Ei kᵾn, wamp ti ndi, ya ik mbo rondunmᵾn kᵾⱡ, tᵾpa mbuⱡ ngum ndam, ei wamp ti tᵾpa, mbuⱡ ngui nganggᵾrᵾm mon! Got Muⱡnga Wingti ngurum wu ei, tᵾpa mbuⱡ ngorum. Akup wamp ᵾngᵾnᵾl numan nguing uⱡ ei nga, mon ropᵾn ik ti, nimbun ngui nangᵾnmᵾn. Ei, nambuⱡ emel, uⱡ ei nga Got ndi, enim nga numan ila kor mbo endpa pora ndurum. 10 Ei kᵾn, pilik mbi nduk, met Masaroniya kona ila wamp mormin mbᵾ pᵾi numan ngurmᵾn. I etᵾk etmin uⱡ ei nga, tᵾn ndi, enim paka rondpᵾn, pilik kelik itᵾi nᵾnmᵾn. 11 Tᵾn ndi, enim unt kundᵾp nitmin ni mel, enim nga numan orunga, ronduⱡ pangga, raka nᵾk molk, wamp mat nga eng uⱡ mbila, paka rundi nandkᵾn, enim nga ki raⱡ ndi, kongun etᵾk rᵾng nᵾi! 12 I etᵾk eng uⱡ ei ndi, wamp mat etᵾk ora ndung mbᵾ ndi, enim tᵾk ou nduk itangina, wote enim mel ti, kurpa nui nanᵾmba.

Nuim Ei Yant Omba

13 Angmᵾn, enim mbo wamp ralk. Wamp unt korung nimbᵾ, ⱡoprᵾk oⱡa muⱡi nᵾmbᵾⱡeing nᵾk, kit pili nᵾpᵾlᵾi! Ik kupa ei, pilik teing nimbun, enim kundᵾp nᵾnmᵾn. 14 Tᵾn wamp mbᵾ pora, mondᵾp pᵾtmᵾn ei, Jisas koⱡpa, wote ⱡoporpa omba purum. Ei mel ku, tᵾn akup mondᵾp pᵾtmᵾn ei, Got kᵾn mondᵾk pilik korung wamp mbᵾ, Jisas yant om ei kᵾn, Got ndi, wamp mbᵾ pᵾi tᵾpa mundangga, mepa omba.

15 Tᵾn ndi, ya Nuim ei nga ik mbo rondmᵾn kᵾⱡ, Nuim elim ndi, mbo inditim ei mel, Nuim ei yant om i ei kᵾn, tᵾn kont muⱡmin wamp mbᵾ, ombun akil tiyamina, unt korung wamp mbᵾ, ok kuimp ting. 16 Ei kᵾn, Got nga wi ronduⱡ ti, ekit wangga, anggelo kuimbal morum ei ndi, wi rangga, wote Got nga pikul ik ei, ekit wangga, nuim ei, muⱡ kona wak ropa mana omba. Ui ei kᵾn, Kraist mondᵾk pilik korung wamp mbᵾ, kuimp tepa ⱡoporpa oⱡa mondᵾmba. Wote, tᵾn kont muⱡmᵾn wamp mbᵾ, akil tepa, Nuim ei ndi, kopa pol ila oⱡa tangga, Nuim ei, oⱡa waka ila kandᵾp tᵾpᵾn, wote ila nga Nuim ei kᵾn, uⱡ nga kᵾnt nga muⱡmin. 18 Ei nga, ik kᵾⱡ, pilik tin wamp ei ndi, wamp ti nᵾkᵾn, kai etkᵾn ngui!

Copyright information for `MED