1 Timothy 1

Pol Ndi, Timoti Mon Kuimp Tepa Ropa Ngurum Ei

Na Pol, Kraist Jisas nga nombuⱡa rung wu ei, Got tᵾn nga Etpa Ti Wu ei kᵾn, wote Kraist Jisas tᵾn ndi, nokundpᵾn pilpᵾn mormun ei kᵾn, kunda nilinggila, mon ei ront.

Kang wu Timoti, na nga mondᵾp pili uⱡ ila, koip purum ei kᵾn, mon rop mundᵾp nᵾmp mel, Got Tipam ei kᵾn, wote tᵾn nga Wu Nuim Kraist Jisas nga wamp poⱡ ti uⱡ ei kᵾn, wamp kaimp kul uⱡ ei kᵾn, wote numan wang ni uⱡ mbᵾ pora, nim kᵾn kan piyangga!

Ik Mbo Wu Kol Mbᵾ Nga Tᵾk Mendᵾk Muⱡi

Na wᵾl Masaroniya kona ou ila, mbi omp, nim kᵾn ronduⱡ mundᵾp, ya Episis kona peng ou ila, mul nit ni mel ku, akup nim kona ila ku mul nᵾnt. Ik mbo wu mat, ik kol rormin mbᵾ, man ngukᵾn muⱡi! Wamp mbᵾ, kang timan ronmin mbᵾ kᵾn omba, en enim nga anda kouwᵾmᵾn mbᵾ nga mbi ruⱡ mat, mon rok tek mormin mbᵾ, wak reing ni! Ik mbᵾ ndi, wamp mbᵾ nga numan ila roⱡnga, ik palk etmin. Got nga numan pᵾtᵾm uⱡ ei, mondpa pili uⱡ ila mint pᵾtmin.

Ik ti ya ronduⱡ mundᵾp nᵾnt ei, wamp numan ngui uⱡ ei. Uⱡ ei, wamp nga mundmong ila eng nomba, numan ei piral nimba, mondpa pili ronduⱡ purum. Ei kᵾn, wamp numan ngui uⱡ ei, kupa etᵾm. Wamp mat ndi, uⱡ kai mbᵾ wak rok, en enim nga ik roldᵾnga mbᵾ, nᵾk andurmin. Wamp kᵾⱡ, en enim Got nga mi ik mbo wu muⱡmin nᵾk pilik, ik ronduⱡ mundᵾk nᵾtmin. Ei wote, en enim nga ik na, uⱡ na mat ou nduk etmin mbᵾ, tᵾk mindi namᵾndᵾtmᵾn.

Tᵾn pᵾtmᵾn, mi ik kᵾⱡ, elim petᵾm ei mel pep rumᵾn ndam, kai etmba. Ik ei, kupa mint tᵾk mundᵾiya! Got nga mi ik petᵾm ei, ya wamp kai mbᵾ nga mon. Mi ik ei ya, ik tᵾpa roi ndui wamp, kᵾndᵾp nui wamp omba, Got mondpa pili nᵾpili wamp, uⱡ kit etmin wamp mbᵾ kᵾn, wamp mbi paka rui narᵾk, Got nga uⱡ kai mbᵾ, tᵾk mindi namᵾndᵾk etmin mbᵾ kᵾn, wamp nam ti, elim nga mam tipam raⱡ kep, wote wamp elpa mat rok kondᵾk etmin mbᵾ kᵾn, wote wu ndi, wu kᵾn wapra rui uⱡ, amp ndi, amp kᵾn wapra rui uⱡ, wamp kindᵾp nui uⱡ, ik kupa ei, wak rok, ik kol rok etmin wamp mbᵾ nga petᵾm. Wote, mi ik kupa ei, Got wu eng nui ei nga Rᵾnang Ik Kai ei, na neimp nilinga mbem ik ei, nᵾmp mor.

Got Ndi, Pol Kaimp Kurum

12 Na ndi, tᵾn nga Nuim Kraist Jisas kᵾn angge nᵾnt. Ei nambuⱡ emel, na wu kai ti nimba pilpa, na ronduⱡ ngumba, na elim nga rᵾnang ik kai ei, neimp nimba kandpa titim. 13 Unt na ndi, elim ik kit nᵾmp ngump, elim nga wamp mbᵾ rop kondᵾp, wote ik mura ngump it mbᵾ, Got ndi, na kaimp kurum. Ei nambuⱡ emel, na Got mondᵾp pili napilip, wote uⱡ mbᵾ tᵾp mindi namᵾndᵾp it. 14 Nuim Got ndi, elim nga wamp pol ti uⱡ ei na minal ngumba, wote mondpa pili uⱡ ei kᵾn, wamp numan ngui uⱡ raⱡ pendpa ngurum. Ei mel elinga, tᵾl akup Kraist Jisas kᵾn rᵾp rop morumbᵾⱡ. 15 Ya ik kᵾⱡ, ama kupa mint, pilik kai itᵾi! Kraist Jisas ya mᵾi kona urum ei, wamp kit mbᵾ, etpa tᵾmba pilpa urum. Wamp kit mbᵾ nga, na ama uⱡ kit minal it wu ei. 16 Wote, uⱡ puⱡ ya ila mint, Got ndi, na kont kurum. Uⱡ ei, Nuim Jisas ndi, na etᵾp timp nimba nokundrum uⱡ ei, na kᵾn etpa mot ndurum. Uⱡ ei, wamp akil teng mbᵾ ndi kandᵾk, Got mondᵾk pilik, wote uⱡ nga kᵾnt nga kont mul uⱡ ei ting. 17 Wu Nuim Mumuk ei, uⱡ nga kᵾnt nga Nuim ei morum. Got ei, rak rᵾk kont morum, elim kᵾni nakᵾndᵾrmᵾn, wote elim nga mbi ou ei kᵾn, uⱡ mon pi mbᵾ elim kᵾn, uⱡ nga kunt nga pemba ei nga piyangga! Ei kupa.

18 Kang wu Timoti nim kopᵾt man ngump namp, pai nok nᵾtᵾng ik ni kᵾⱡ, nim nᵾmp ngur ik ni kᵾⱡ, pilkᵾn tᵾkᵾn, el ronduⱡ mundkᵾn iti! 19 El ila mondpa pili uⱡ ei kᵾn, numan kun pindi uⱡ raⱡ, akilma iti! Wamp mat ndi, numan kun pindi uⱡ ei, tᵾk pei mundᵾk elingina, en enim nga mondpa pili orunga, etpa kit morum. 20 Wamp kᵾⱡ kᵾn, ya wu Imeneyas kᵾn, Aleksanda raⱡ, Got kᵾn ik kit nᵾtᵾnggil ni, Seitan kᵾn ngump rukᵾr ndur ei, wu raⱡ ropa elik rundangga nᵾmp it.

Copyright information for `MED