1 Timothy 4

Ik Kol Nga Ik Mbo Wu

Muⱡnga Wingti ei ndi, nᵾtᵾm pᵾtmᵾn ni, wote ui mbila, wu mat en enim nga mondpa pili uⱡ ei, wak rok kᵾn, ik kol muⱡnga mbᵾ nga, man ik kep, nui mbᵾ pep ru-ing. Man ik mbᵾ, ik kol rormin wu mbᵾ kᵾn, tepa orum, omba, wu mbᵾ nga numan ila uⱡ kit mbᵾ mint petᵾm. Ei nga, uⱡ etmin mbᵾ nga pipil kuⱡi nakᵾrmin. Wu mbᵾ ndi, nᵾk mel, amp tᵾk, wote amp wu puk etmin uⱡ ei, ⱡawa etmin ning. Wote rᵾng mat, mi rok nui nᵾni ning. Ei wote, Got nga, elim nga ik kupa mondᵾk pᵾtmin wamp mbᵾ, elim kᵾn angge nᵾk, rᵾng mbᵾ tᵾk, neing nimba itim. Got ndi, itim mel mbᵾ pora, kai mint mel tenda na ti, kit ni nᵾnmin. Mel mbᵾ tin etkᵾn, Got kᵾn angge ni! Ei nambuⱡ emel, atinga ei kᵾn, Got nga ik ei kᵾn, Got nga kuimp keta ila etpa eng nondrᵾm.

Jisas Nga Kongun Wu Kai

Nim ya ik mbo indᵾt nᵾkᵾⱡ mek pukᵾn, nim nga wamp kᵾⱡ nᵾkᵾn ngun ndam, nim Kraist Jisas nga kongun wu kai. Nim Got mondᵾk pilkᵾn, wote uⱡ kupa etᵾn ni ndi, nim ronduⱡ ngurum. Wamp nga kang timan nᵾwᵾ mat rormin uⱡ mbᵾ, nim ndi, tᵾkᵾn mbuⱡ ngokᵾn, Got nga uⱡ kun kai mbᵾ iti! Nim pᵾtᵾn ni, nim nga kᵾng orunga uⱡ mat etᵾn ni ndi, nim orunga kot tᵾpa rapᵾndᵾmba. Wote nim ndi, Got nga uⱡ mbᵾ nga mat ou ndukᵾn in ndam, akup nga ui ila kep, wote ui ila kep, nim minal tᵾpa rapᵾndᵾmba. Ya ik kupa kᵾⱡ, wamp pora pilik tᵾk, wote mondᵾk pileing. Got wamp Rukᵾr Tᵾtᵾm Nuim ei, tᵾn kupa mondpᵾn pitmin wamp mbᵾ, rukᵾr titim. Tᵾn ya mondpᵾn pᵾnmᵾn ei, Got kont morum, wote tᵾn etpa tᵾmba. Ei nga, tᵾn ya kongun ronduⱡ mundpᵾn enmin. 11 Ik mbᵾ, wamp mbᵾ nᵾkᵾn ngukᵾn, wote pep reing nᵾkᵾn mbo indi! 12 Wote, wamp mbᵾ ndi, nim kandᵾk kᵾn, kang wu kokila ti, nᵾk pilik pei mundi nᵾmᵾndeing. Ei mon! Nim ndi, wamp mbᵾ, nombuⱡa kun ᵾndi uⱡ, omba ik kun ni uⱡ, wamp numan ngui uⱡ, mondpa pili uⱡ na, uⱡ eng nui na mbᵾ nga, nim ndi, etkᵾn ora ndupᵾn, mbo rundi. 13 Akup ui ila, na nokundkᵾn molkᵾn mel, wamp mbᵾ, Got nga Rᵾnang Ik Kai mbᵾ nᵾkᵾn ngukᵾn, mbo endkᵾn mint muⱡi! 14 Nim unt ik pai nok nᵾk etᵾng, wote atinga manga kongun wu mbᵾ ndi, nim ambulk memp pendᵾk, atinga rondᵾk etᵾng ronduⱡ ni, wak rui nᵾri! 15 Wote nim ndi, uⱡ mbᵾ pilkᵾn molkᵾn rᵾk rᵾk rᵾⱡaip rokᵾn, kongun itana, oⱡ omba kai itangga, wamp mbᵾ ndi, kandᵾk kai piling. 16 Nim nga nombuⱡa mam andkᵾn, wote ik nᵾkᵾn in ei, tᵾk mendkᵾn ᵾndᵾn ndam, nim nga kongun in ei ndi, nim etpa tᵾmba. Wote, nim nga ik nᵾtᵾn ei, pᵾtᵾng wamp mbᵾ, etpa tᵾmba ku.

Copyright information for `MED