1 Timothy 6

Kindmant Wamp Mbᵾ Nga Ik

Kindmant wamp mbᵾ ndi pora, en enim nga wu ou mbᵾ, tᵾk ou nduk, wu kai nangina, wote wamp ekit orunga mbᵾ ndi, Got kᵾn kep, wote tᵾn nga ik mbo endᵾtmᵾn ik nimbᵾ, nᵾk kit mundi nᵾmᵾndeing. Mondpa pili wu ou ti nga, kongun kindmant wu mbᵾ, en enim nga wu ou mbᵾ, minal tᵾk ou ndᵾi! Wu ᵾngᵾn ti nᵾk, ik tᵾk roi ndui nᵾndᵾi! Nambuⱡ emel, kongun endᵾtmin mondpa pili wamp kᵾⱡ, en enim ndi, numan nguk kongun ronduⱡ mundᵾk endᵾtmin. Uⱡ etmin ei ndi, mondpa pili wamp ou kᵾⱡ, minal tᵾk rapᵾndᵾrmᵾn. Timoti nim ndi, ik kupa mbᵾ mbo endkᵾn, wamp mbᵾ pep ring nᵾkᵾn, ndoimp rundi!

Kandpa Kum Pindi Uⱡ

Wamp nam ti, Got nga ik puⱡ elpa mat mbo endpa, tᵾn nga Nuim Jisas Kraist nga ik kupa ei kᵾn, tᵾn Got kᵾn mbi paka rormᵾn uⱡ kᵾⱡ wak ropa, ik elpa mat mbo endᵾm ndam, wamp ni nga rukᵾr orunga mondpa pili ila mel ti, ti natᵾtᵾm. Wote ik puⱡ ti kep, pili napᵾtᵾm ku. Wamp ei, numan kit pendpa, ik puⱡ mbᵾ nga ropa akpa nimba etᵾm. I etᵾm uⱡ ei ndi, wᵾlᵾk rui uⱡ, ik kit ni uⱡ, ik mbuldung orunga nindi uⱡ ik ropa mondpa ni uⱡ mbᵾ nga puⱡ pendpa, numan ila pᵾtᵾm. Wote, wu mat numan kit morum mbᵾ ndi, ik kupa ei wak rormᵾn. Wamp i etpa mbᵾ ndi pilik kᵾn, Got kᵾn atinga rui uⱡ ei, kng mel mbᵾ ting, nombuⱡa mam ti nᵾk pᵾtmᵾn. Mondpa pili wamp ti, elim tep mor mel mbᵾ, manda nimba pᵾtᵾm ni, Got nga uⱡ kai mbᵾ, wamp ei kᵾn tepa kapⱡa endᵾtᵾm. Tᵾn ya mᵾi kona ila uimin etpᵾn mel ti, mepᵾn ui nᵾwᵾrmᵾn. Ni mel ku, wote tᵾn ya mᵾi kona wak ropᵾn mbin etpᵾn, mel ti mepᵾn pi nᵾpᵾmᵾn. Wote, nim rᵾng na, wal pᵾki na mat tekᵾn mun ndam, ei nim nga to ila manda. Wamp ti mel ou ndupa, timp nimba pilpa etᵾm wamp ni, Seitan nga oⱡa tᵾpa kᵾni uⱡ mbila, mana mba, kandpa kum pendpa anduⱡnga, elim nga moⱡpa kundi orunga, kit moⱡnga wamp ei, elim kit morum. 10 Ku moni kandpa kum pindi uⱡ ei, uⱡ kit mbᵾ nga puⱡ pilkan ei. Wamp mat, ku moni nga kum pendᵾk, en enim nga mondpa pili uⱡ ei, wak rok, kitim mindil tᵾk, tiki polk andurmin.

Pol Ndi, Timoti Man Ngurum

11 Nim Got nga kindmant wu ei kandkᵾn, uⱡ mbᵾ kildi kulkᵾn. Wote, uⱡ kun kai, uⱡ eng nui na, mondpa pili na, wamp numan ngui uⱡ na, numan ronduⱡ pili uⱡ na omba, wote numan wang ndui uⱡ kᵾⱡ, ronduⱡ mundkᵾn iti! 12 Nim nga mondpa pili el ruin ei, ronduⱡ mondkᵾn el rui, wote uⱡ nga kᵾnt nga kont mul uⱡ ei, timp nᵾkᵾn pilkᵾn el rui! Got ndi, nim kont mul uⱡ ei, ngumba pilpa kᵾn, nim wi ropa tilinga, wamp nga mou ila, nim nga uⱡ kit mbᵾ nᵾkᵾn ekit ndurun. 13 Got mel mbᵾ pora, etpa peng kont tᵾtᵾm Puⱡ Wu ei kᵾn, wote Kraist Jisas elim nga mondpa pili ei, wu Pontas Pailot ei nimba ngurum. Ei mel, wu raⱡ nga kuimp keta ila, na nim kᵾn man ngump nᵾnt ei, ‘Nim ndi, Got nga mi ik kᵾⱡ wamp mbᵾ ndi, nᵾk kit munding ei nga, tᵾk mendkᵾn pep rokᵾn moⱡana, Nuim Jisas Kraist yant omba ui ei, kandkᵾn tᵾn.’ 15 Jisas omba ui ei, Got elim to ropa pendpa morum. Wu Got ei, wamp ambᵾⱡpa puⱡ uⱡ mbᵾ nga Puⱡ Wu. Nuim mumuk mormun mbᵾ nga Nuim Mumuk Oⱡa orunga ei, omba wu nuim mbᵾ nga Nuim ei. Mel mbᵾ nga pora Rᵾp Wu ei, ronduⱡ elim kont moⱡpa mint purum. Ei nga, tᵾn akup kont mormun ui ila wamp ti, rᵾⱡang ila morum kona ila, kapⱡa rukᵾr pi napᵾmba. Wamp ti ndi, elim kᵾni nᵾkᵾndrᵾm. Wote, akil tep, kᵾni nᵾkᵾning ku. Nuim Got ei mint, mbi ou tangga, uⱡ nga kᵾnt nga ronduⱡ tepa mint pangga! Ei kupa! 17 Mel ou nduk tek mormin wamp mbᵾ kundkᵾn, enim nga kᵾng orunga, mek oⱡa pi napᵾk, en enim nga mondpa pili uⱡ ei, mel pora nimba mbᵾ kᵾn ti natᵾk, Got kᵾn mendpᵾⱡ pilik nokundᵾk muⱡeing ni! Got wu mel pi ei ndi, numan kai pendpa, tᵾn mel minal nguⱡnga, tepᵾn moⱡpᵾn, ambuⱡpᵾn paⱡpᵾn muⱡeimin nimba etᵾm. 18 Wamp mbᵾ kundkᵾn, uⱡ kai mbᵾ iteing ni! Uⱡ kai mbᵾ nga mel piyangga nᵾkᵾn, molk kai mondᵾk, en enim nga mel tetmin mbᵾ, numan kai pendᵾk, mok rok iteing ni! 19 Uⱡ ei mel eng ndam, mel kai mat, wote ui tila tᵾpa rapᵾndᵾmba ei nga, tᵾk mou rok muⱡing. Ei, uⱡ nga kᵾnt nga rᵾk rᵾk kont mul uⱡ kupa ei ting. 20 Timoti, Got ndi, nim kongun ngurum ei, ronduⱡ mundkᵾn rᵾp iti! Ik kit na, wote ik mat, ik kol rok, “ik pilpa kungᵾndi kai” nᵾk enmin mbᵾ, tᵾkᵾn mbuⱡ ngukᵾn iti! Ik mbᵾ, Got nga el rui ik mbᵾ.

21 Wamp mat, ya ik pilpa kungᵾndi kai ei, tep mor nᵾk pilik, en enim nga mondpa pili ei, wak rormin. Got nga wamp poⱡ ti uⱡ ei, nim kᵾn kan piyangga!

Copyright information for `MED