2 Corinthians 1

Pol Ndi, Mon Ti Akil Tepa Ropa, Korin Wamp Kᵾⱡ Ngurum

Na Pol, Got ndi, to ropa mondpa kᵾn, Kraist Jisas nga nombuⱡa rung wu ei, muⱡeimp nimba tᵾpa mundrum. Na kᵾn, tᵾn nga ᵾngᵾn Timoti kᵾn, mon kᵾⱡ ropᵾⱡ, Korin wamp, Got nga rapa tenda ila mormin mbᵾ kᵾn, Grik kona ila Got nga rapa tenda ila mormin mbᵾ pora, mon ei ropᵾⱡ ngunmbᵾⱡ. Tᵾn nga Wuta Got kᵾn, Nuim Jisas Kraist raⱡ nga wamp pol ti uⱡ ei kᵾn, numan wang ndui uⱡ mbᵾ, enim kᵾn piyangga!

Got Ndi, Pol Tᵾpa Rᵾpᵾndrᵾm Ei Nga Angge Nitim

Tᵾn ndi, Got nga mbi ei paka rundamᵾn. Elim ni, tᵾn nga Nuim Jisas Kraist nga Got moⱡpa, wote Tipam morum ku. Got tᵾn nga Tipam ei, wamp kont kurmin uⱡ ei nga puⱡ ei. Wamp mbun tᵾk mormin mbᵾ etpa, numan wang ndupa etᵾm. Uⱡ mbun mat, tᵾn kᵾn orum ndam, Got ndi tᵾn etpa numan wang ndurum. Uⱡ ei mel ku, wamp mat mbun, tᵾk moⱡung ndam, Got ndi, tᵾn kᵾn uⱡ etᵾm ei mel, pep ropᵾn kᵾn, wamp mbᵾ etpᵾn numan wang ndᵾndᵾmᵾn. Ei kᵾn, Kraist ndi, mindil mam mat nomba mbun koma rurum. Uⱡ ei mel ku, tᵾn Kraist kᵾn kunda ndi, mbun koma rumᵾn ndam, Kraist nga numan wang ndui uⱡ mam mbᵾ, tᵾn ngangga kapⱡa etmba! Wote, tᵾn mbun koma rumᵾn ndam, uⱡ ei ndi, enim etpa numan wang ndangga kᵾn, Got ndi, enim rukᵾr tᵾmba. Wote Got ndi, tᵾn etpa numan wang ndum ndam, enim etpa numan wang ndumba ku. Tᵾn ronduⱡ mundpᵾn anggilpᵾn, mbun koma ronmᵾn ei mel, enim ndi, i ku eng ndam, Got ndi, enim etpa numan wang ndundᵾmba ku. Wote tᵾn ndi, ronduⱡ mundpᵾn pᵾnmᵾn ei, enim nga mondpa pili uⱡ ila, ronduⱡ mundᵾk muⱡing. Tᵾn pᵾtmᵾn ei, enim tᵾn kᵾn kunda mbun koma rormin. Uⱡ ei ndi, enim tᵾn kᵾn kunda, numan wang ndui uⱡ ei kandᵾk ting. Angmᵾn, enim pilᵾi! Eisiya kona ila mbun mam mat, tᵾn kᵾn urum ila, tᵾn kuⱡmin nᵾmp pitmin. Uⱡ mbun kᵾⱡ, wamp rok kunding etmin ni mel kapⱡa, tᵾn kᵾn urum ila, ronduⱡ mbun mormin ei, tᵾn nga ronduⱡ ti mon. Got ndi, wamp kormin mbᵾ, etpa kont mundrum ronduⱡ ila, muⱡᵾmin nimba itim. 10 Uⱡ kit mbᵾ ndi, tᵾn ropa kondᵾmba itim. Ei wote, Got ndi, tᵾn etpa titim ei nga kai murmᵾn. Got ndi, tᵾn etpa titim uⱡ ei ndi, wote tᵾn kai moⱡpᵾn mint mbin, nᵾmp pᵾnmᵾn. 11 Enim wamp mbᵾ ndi, tᵾn nga tᵾk rapᵾndᵾk, atinga rong ndam, Got ndi, enim nga atinga rong ei ndi, kum tepa, tᵾn tᵾpa rapᵾndᵾmba. Wamp puⱡi ndi, kandᵾk kᵾn, Got ndi, em uⱡ kᵾⱡ angge ning.

Pol Ndi, Korin Wamp Kᵾⱡ Kᵾn Ik Kupa Nitim

12 Tᵾn ambᵾⱡᵾp paⱡpᵾn mormᵾn, ei nambuⱡ emel, tᵾn nga numan orunga Got ndi, uⱡ kai mat ngurum mbᵾ mel, wamp mbᵾ kᵾn, uⱡ kun na, uⱡ kupa mbᵾ mint etmᵾn. Mana mᵾi kona ila wamp nga pilpa kungᵾndi ei ndi, tᵾn nga pilpa kungᵾndi ei kᵾn kapⱡa mon! Got nga wamp pol ti uⱡ ila, tᵾn pilpa kungᵾndi ei nguⱡnga kᵾn, tᵾn wamp mbᵾ kᵾn, uⱡ kun kai mbᵾ nga minal etmin. 13 Tᵾn ndi, enim kᵾn mon ropᵾn ngunmᵾn ei, enim ndi, ik kᵾⱡ kᵾmp rok kandᵾk puⱡ mbᵾ, piling nimbun pilpᵾn, mon ropᵾn ngunmᵾn. Na ndi, kupa pᵾnt ei, enim rᵾk rᵾk ik puⱡ kᵾⱡ pilik mint muⱡing. 14 Enim unt onunga etᵾk pilik morung ei ndi, nimba mel, tᵾn nga Nuim Jisas nga ui mam ei, ekit om ei kᵾn, enim tᵾn kᵾn ambulk puⱡangina, wote tᵾn enim kᵾn, i ku itmin. Wote, tᵾn rup ropᵾn muⱡmin. 15 Enim numan kai piling ei ndi, na nga mondpa pili ei, ronduⱡ punum. Uⱡ ei nga, na ndi pilip kᵾn, enim kuimp tep omp, enim kandᵾp punt uⱡ ei ndi, enim numan kai pilik raⱡ inding. 16 Na Masaroniya kona ila mbi nᵾmp pilip kᵾn, enim omp kandᵾp mbi nᵾmp pᵾnt. Wote, andᵾp yant omp kᵾn, enim omp kandᵾp mbi. Ei kᵾn, enim ndi, na tᵾk mundangina kᵾn, Juriya kona peng ou ila mbi. 17 Ya na ik nᵾnt ei ndi, enim ik kol rop nᵾmp ngunt ye! Na ik kol rop mi tep, ik roldᵾnga mat nᵾnt nᵾk, enim pinmin. Ya mᵾi kona ila wamp mbᵾ ndi, ik nᵾk kᵾn, “Kapⱡa” ning, muna “Mon,” ning, uⱡ ei, tᵾk rak nduk nᵾtmᵾn ni mel, ni nanᵾnt mon!

18 Wote, enim wamp mbᵾ, Got ik kupa mint nᵾtᵾm ei kᵾn, minal mondᵾk pilᵾi! Ik mat tᵾn ndi, nᵾmp enim ngunmᵾn mbᵾ, ik kupa mint, “Kapⱡa” uⱡ ei, muna “Mon” ni, uⱡ ei nga, tᵾp rakᵾndᵾp ni nanᵾnt mon! 19 Ei nga, na kᵾn, Sailas na, Timoti na, ik nimbun enim wamp ngurmᵾn kᵾⱡ, Got kangᵾm Kraist Jisas nga ik kᵾⱡ, ei nga, “Kapⱡa” ni uⱡ, “Mon” ni, uⱡ ei nga, tᵾpa rakᵾndpa ni nandᵾtᵾm mon! “Kapⱡa” ni uⱡ ei, Jisas kᵾn puⱡi petᵾm. 20 Got nga nimba mᵾi rurum uⱡ mbᵾ, ou ndupa petᵾm. Uⱡ mbila, Jisas ndi, “Kapⱡa,” mint nimba itim. Uⱡ ila nga, tᵾn ndi, Jisas Kraist nga mbi ila, “Ei kupa,” nᵾtmᵾn ila, Got nga mbi paka rondurmᵾn! 21 Got elim ndi, tᵾn kᵾn, enim kᵾn, etpa ronduⱡ munduⱡnga, Jisas kᵾn nondpa, kont mbun mormᵾn. Got ndi, tᵾn tᵾpa, elim nga kongun mbila monduⱡnga mormᵾn. 22 Got elim nga tip timal ti, tᵾn ngumba ei, Muⱡnga Wingti tᵾn nga rukᵾr orunga ngurum. Muⱡnga Wingti unt ngurum ei ndi, ora ndupa mel, Got ndi, mel mat wote, tᵾn ngumba uⱡ ei nga, pilᵾmin nimba itim. 23 Akup na ndi, enim kᵾn ik kol rop ni nanᵾnt. Na nga numan orunga, Got pilpa morum. Na ik kol rop nint ndam, ik kol kᵾⱡ, Got ndi, tᵾpa pena ila ekit ndangga kᵾning. Na ndi, enim Korin wamp kᵾⱡ kᵾn, ui nᵾwᵾr. Ei nambuⱡ emel, na ndi, enim mbun ngui ngᵾngimp ei nga pilip it. 24 Tᵾn ndi, enim nga mondpa pili uⱡ ei, nukundi nakᵾndᵾrmᵾn mon! Nambuⱡ emel, enim mondpa pili uⱡ ila molk, pora ndurmin. Wote tᵾn ndi, enim nga numan kai pili uⱡ ei nga kongun indimin.

Copyright information for `MED