2 Corinthians 11

Pol Ndi, Ik Kol Rui Nombuⱡa Rung Wamp Mbᵾ Nga Nitim

Enim ndi, na wak rangina kᵾn, na ik ⱡawa kat punt kᵾⱡ namp! Na enim kᵾn, numan ronduⱡ ti pᵾt ei, Got ndi, enim kᵾn i ku etpa pᵾtᵾm. Ei mel ku, enim amp wendᵾp kun kai na ti, na ndi, nᵾmp mᵾi rop, wu tenda ti mint pangga nimp ei, wu tenda ei kᵾn mint, moⱡpa mba ei, wu Kraist. Wote, na mundmong ent uⱡ ei, nambuⱡ emel, unt kimbuⱡa ti ndi, amp Ip, ik kol ropa ngurum uⱡ ei, enim kᵾn omba ei ka! Uⱡ kᵾⱡ ndi, enim nga pilpa kungᵾndi, etpa kit mondᵾmba. Enim Kraist kᵾn mormin uⱡ kun kai mbᵾ, wak ruing ei nga, pilik kai itᵾi! Uⱡ kᵾⱡ nga, na mundmong etᵾp nᵾnt. Wote, wamp mat ndi, enim kᵾn ok, wu Jisas ni nga mbi tek andᵾk ning. Ya tᵾn ndi, Jisas nga mbi tek, andpᵾn ninmin ei nga mon! Uⱡ i eng ei ndi, enim muⱡnga ti ku ting. Enim unt Muⱡnga Wingti tᵾtᵾng ni mel mon! Wote, rᵾnang ik ti nga ku ting. Enim unt rᵾnang ik kai pilik tᵾtᵾng ni mel kapⱡa mon! Wamp mat ndi, uⱡ etmin mbᵾ iting nᵾk, enim ndi kandᵾk, wak rormin ei ka! Enim pilik kai itᵾi! Na ndi, enim nga nombuⱡa rung wu kuimbal kᵾⱡ nga mana orunga moⱡᵾp, ni nanᵾnt mon!

Wote, na ik nimp ei, pilip rundᵾr nda, na nga pilpa kungᵾndi ila pᵾt mint. Uⱡ pilpa kungᵾndi tᵾn etmin mbᵾ ndi, enim rᵾk rᵾk ui mbila, tᵾpᵾn ora ndurmᵾn. Enim pᵾtmᵾn ni, na ndi, Got nga Rᵾnang Ik Kai nᵾmp, enim ngump ei kᵾn, mel mat yant ti natᵾt ni ka! Na nga orunga mep mana mbo moⱡᵾp, enim nga mbi paka rondᵾp et. Ei nga uⱡ kᵾⱡ, na uⱡ ⱡawa et nda? Ei mon! Wote na ndi, Got nga rapa tenda ila wamp mat nga ku moni mat tᵾp kᵾn, ku moni mbᵾ ndi, na tᵾpa rᵾpᵾndangga, enim kᵾn kongun itimp pilip et. Uⱡ et ei ndi, wamp mat nga ku moni mbᵾ, kindᵾp mel nor. Na unt enim kᵾn mur ui ei kᵾn, na mel mat mondrum. Na ndi, enim wamp ti, mbun ngump iti nᵾtᵾt mon! Ui ei kᵾn, na mel mat, mon ndurum mbᵾ, angmᵾn Masaroniya kona ila molk, orung wu kᵾⱡ ndi, na mel ronduⱡ mbᵾ ngurung ila, na kapⱡa itim. Na ndi, mel mbᵾ pora, unt rᵾp etᵾp kai mondᵾr. Wote, akup enim mbun ngui ngᵾngimp mon! Na ndi, rᵾk rᵾk rᵾp etᵾp kai mint mundimp. 10 Kraist rᵾk rᵾk ik kupa ei, mint nᵾtᵾm. Wote, na ik kupa ei ku nᵾt. Wote, Akeiya kona ila wamp mbᵾ ndi, ik kupa nᵾt kᵾⱡ, ropa mana ndumba mel, kapⱡa mon! 11 Na ndi, ik kᵾⱡ enim kᵾn nᵾt ik ei, nambuⱡ emel nᵾt? Na ndi, enim numan ngui nganggᵾp nᵾt ei? Ei mon! Got ndi, na pᵾtᵾm. Na ndi, enim numan minal ngump nᵾt. 12 Wote, wamp mat ndi, en enim nga mbi paka rok nᵾtmin mbᵾ ndi, wamp nga kuimp keta ila anggilik, tᵾn nombuⱡa rung wu monmin ei mel muⱡmin ning. Wamp mbᵾ nga ning ik ei, na ndi, mon nᵾmp nᵾnt. Muⱡmin nᵾk, en enim nga kᵾng orunga mek oⱡa puk, tᵾn kongun enmun ei mel etmin ning.

13 Ik kol nga nombuⱡa rung wu kᵾⱡ ndi, ik kol rok kongun mbᵾ etmin. En enim nga ik kol rok etmin uⱡ kᵾⱡ, wote wamp mbᵾ ndi, pilik kᵾn, en enim Jisas nga nombuⱡa rung wu kupa kat, neng nᵾk pilik etmin. 14 Wote, uⱡ eng mbila, enim ndi, rot nᵾk kupa nᵾk, pili nᵾpᵾlᵾi mon! Enim pilik mormin, Seitan elim ropᵾl ropa kᵾn, anggelo mel rᵾⱡang mundpa orum, ni ka! 15 Seitan elim nga kongun wu kᵾⱡ i ku etᵾk, mbo wamp mbᵾ nga kuimp keta ila kongun wamp kupa ralk etmin. Uⱡ i eng mbᵾ, tᵾn ndi, uⱡ kupa mat enmun nimbun, pili nᵾpᵾlmᵾn mon! Uⱡ eng mbᵾ mel, wote en enim punt rok, mel mat ting.

Pol Ndi, Mbun Puⱡi Koma Rurum

16 Na unt nit ni mel, aldpa nᵾnt, na kupᵾr rop nᵾnt nᵾk, enim ndi, pili nᵾpilᵾi! Wote, na kupᵾr rop nint ndam, kapⱡa ku. Enim ndi, na wak rangina kᵾn, na nga mbi paka rop, ik onunga kat namp. 17 Na ndi, Nuim ei nga numan pᵾtᵾm ei mel, pep rop, ni nanᵾnt mon! Wamp wᵾlᵾ na ti, nᵾtᵾmin ik ni mel, na nga orunga mbi paka rop nᵾnt. 18 Wote, wamp ou ndupa ndi, ya mᵾi kona uⱡ mbᵾ nga mbi paka rok nᵾtmin ik ni mel, na ndi, na nga orunga mbi paka rop nᵾnt. 19 Enim wamp numan kai pilik mormin mbᵾ ndi, wu wᵾlᵾ ei nga ik nimba enim ei, numan nguk kᵾn, tᵾk waka ndᵾi, enim kundpa nangga! 20 Wote, wamp nam ti ndi, enim kundpa mepa mba, kan kongun indᵾi nimba, muna enim nga mel mat ranggᵾpa tᵾpa, enim tᵾpa ik kuldpa, ik kol ropa ngumba, muna enim nga ik tᵾpa roi ndupa, enim ki raka ndi ropa em ndam, enim ndi, itangga kandᵾk kui itᵾi!

21 Tᵾn ndi, enim kᵾn uⱡ kᵾⱡ itmin ei nga, pipil enim. Wote, wamp nam ti ndi, elim nga uⱡ etᵾm mbᵾ mel, ronduⱡ mundpa nim ndam, wote na nga et uⱡ mbᵾ mel, ronduⱡ mundᵾp nimp ku. Na akup kupᵾr wamp na ni mel, raⱡᵾp nᵾnt. 22 Wote, wamp kᵾⱡ Ipru ndam, na Ipru wu ei ku. Wote, wamp kᵾⱡ Isrel wamp kᵾⱡ ndam, na Isrel wu ei ku. Wote, wamp kᵾⱡ, Aparam nga wamp pundun kᵾⱡ ndam, na Aparam nga wu ei ku mor. 23 Wote, Kraist nga kongun wu kᵾⱡ, nint ndam, na nga ik ei ndi, na kupᵾr wamp mel, raⱡᵾp nᵾnt. Na Kraist nga kongun ronduⱡ mundᵾp et uⱡ ei ndi, wamp kᵾⱡ, tᵾp mana ndur. Ui ou ndupa, na kongun ronduⱡ mondᵾp elimba, wu mat ndi, na tᵾk kan nguk, tᵾmbᵾⱡ ndi rok etᵾk, mbun nguk etᵾng uⱡ kᵾⱡ tᵾp kᵾn, wu kᵾⱡ pora, tᵾp mana ndur. Na koⱡmba ui minal ei nga, wote kuⱡi nᵾkᵾr mon! 24 Jura wu mbᵾ ndi, na rumbᵾⱡ 5 kᵾⱡ ila, kan puⱡa rok 39 endᵾtᵾng. 25 Rom wu mbᵾ ndi, na kan puⱡa rok raldika endᵾk, wote ku ndi rok, elim nga num kuta ila sip kit moⱡpa, raldika enduⱡnga rumbᵾⱡ tenda mel, na ki nu tep mbo ekit pur. 26 Wote, ui ou ndupa mel, na nombuⱡa ruⱡ mat ila pur. Nu ila, na nu wᵾnggᵾr ku. Kindᵾp wu na mbᵾ ndi, na nga mel mbᵾ roldᵾk tᵾk, wote Jura wu na, wu rᵾⱡaip elpa mbᵾ ndi, na ruing etᵾng ku. Na nu ropa pitim na, kona peng ou na, kona kui waka na mbila, na etᵾk kit mondᵾk etᵾng. Wote, na nga ik kol wu ᵾngᵾn mbᵾ ndi, na rok etᵾk kit mondᵾk etᵾng ku. 27 Na mbun mindil elpa elpa mam mat tᵾp, rumbuldi minal ur pi nᵾpᵾt. Na kump kun moⱡᵾp, nu waka kuⱡᵾp, rung nui nandᵾp, wal pᵾki na, manga na mat mul nᵾmbrᵾm ila, na pilip rundᵾr. 28 Uⱡ mbun kᵾⱡ mendpᵾⱡ mon! Got nga rapa tenda ila wamp mbᵾ, tᵾp rᵾpᵾndimp nᵾmp et uⱡ mbᵾ ndi, mbun minal mat tᵾt ku. 29 Wote, wamp nam ti, ronduⱡ ti nᵾtᵾm ndam, wote na ronduⱡ ti nᵾtᵾt ku. Wamp nam ti, uⱡ kit mbila mana pum ndam, na ndi, wamp ei kᵾn, popᵾⱡ mundimp.

30 Wote, na nga mbi orunga, paka rundunt ndam, na nga mbi paka rundunt uⱡ ei ndi, tᵾpa ora ndupa, na nga ronduⱡ ti mon etmba. 31 Got Tipam Nuim Jisas ei ndi, pilpa kandrum ei, na ik kol rop ni nanᵾnt. Tᵾn ndi, rᵾk rᵾk, Got ei nga mbi paka rundamin! 32 Na Damaskas kona peng ou ila mur ei kᵾn, wu nuim mumuk Aretas nga el wu kᵾⱡ nokundᵾk molk, na tᵾk imp molk, kan ngumᵾn nᵾk etᵾng. 33 Wote, na nga wu ᵾngᵾnᵾl kat ndi, na tᵾk kowa wal ila rakilik tᵾk, paⱡa ila mek oⱡa puk, paⱡa ekit orunga mana ndurᵾng ila, nung nᵾmp pur.

Copyright information for `MED